Habakuk 2:1-20
2 Haʼu sei kontinua hamriik iha fatin neʼebé haʼu hein nuʼudar guarda,+No haʼu sei hamriik iha moru leten.
Haʼu sei hein nafatin* atu haree saida mak nia hakarak koʼalia liuhusi haʼuNo saida mak haʼu sei hatán bainhira nia korrije haʼu.
2 Depois neʼe, Jeová hatán mai haʼu:
“Hakerek vizaun neʼe, no bahat ho momoos iha fatuk-belar sira,+Atu nuneʼe fasil ba ema atu lee ida-neʼe ho lian makaʼas.*+
3 Vizaun neʼe sei kumpre tuir tempu neʼebé hili tiha ona,Neʼe halai lalais toʼo ninia rohan,* neʼe laʼós lia-bosok.
Maski vizaun neʼe demora karik,* hein nafatin bá!*+
Tanba vizaun neʼe sei kumpre duni.
Neʼe sei la tarde!
4 Haree ba ema neʼebé foti an;Nia laʼós ema laran-loos.
Maibé ema laran-loos sei moris tanba ninia laran-metin.*+
5 Tuir loloos, tua-uvas bele halo ema hatudu hahalok beik,Tan razaun neʼe, ema foti an sei la kumpre ninia planu.
Nia* kaan-teen hanesan rate;*Nia mak hanesan mate neʼebé nunka sente bosu.
Nia kontinua halibur nasaun sira hotuNo halibur povu sira hotu ba ninia an.+
6 Sira hotu sei koʼalia lia-dadolin, ai-knanoik no ai-sasiʼik kontra nia, loos ka lae?+
Sira sei dehan:
‘Susar ba nia neʼebé halibur buat neʼebé laʼós ninianNo aumenta tan ninia debe!Nia sei halo nuneʼe toʼo bainhira?
7 Ema sira neʼebé fó debe ba ó sei hamriik derrepente deʼit, loos ka lae?
Sira sei hadeer no doko makaʼas ó,No sira sei hadau ó-nia sasán.+
8 Ema restu hotu husi nasaun barak sei hadau ó-nia sasán sira,Tanba ó hadau ona sira-nia sasán,+Tanba ó fakar ema nia raanNo tanba violénsia neʼebé ó halo hodi estraga rai,Sidade sira no mós ema neʼebé hela iha sidade laran.+
9 Susar ba ema neʼebé halo hahalok aat atu manán rikusoin ba ninia uma,Hodi halo ninia knuuk iha fatin aas,Atu susar labele kona nia!
10 Ó halo ona planu neʼebé lori moe ba ó-nia uma.
Ó halo sala kontra ó-nia an tanba ó halakon ema barak.+
11 Tanba fatuk ida iha didin laran sei halerik,No ai ida husi uma-kakuluk sei hatán ba nia.
12 Susar ba ema neʼebé fakar ema nia raan hodi harii sidade ida,No hametin sidade neʼe ho hahalok aat!
13 Ema halo serbisu makaʼas ba buat neʼebé ahi sei han tiha,No nasaun sira sai kole maibé la hetan buat ida. Jeová neʼebé ukun tropa lalehan nian mak halo nuneʼe.+
14 Mundu tomak sei nakonu ho koñesimentu kona-ba Jeová nia glóriaHanesan bee taka tasi tomak.+
15 Susar ba ema neʼebé fó buat ruma ba ninia belun sira atu hemu,Hodi kahur neʼe ho laran-nakali no hirus, no halo sira lanu,Atu nuneʼe bele hateke ba sira-nia isin-tanan!
16 Ó sei hetan moe boot duké hetan glória.
Ó mós tenke hemu no hatudu sai katak ó seidauk hetan sirkunsizaun.*
Kopu neʼebé iha Jeová nia liman-loos sei mai toʼo ó,+No moe sei taka tiha ó-nia glória.
17 Violénsia neʼebé ó halo ba Líbanu sei kona fali ó,No ó-nia hahalok aat neʼebé hataʼuk animál fuik sira sei kona fali ó,Tanba ó fakar ema nia raanNo tanba ó halo violénsia ba rai,Ba sidade sira no ba ema neʼebé hela iha sidade laran.+
18 Ema tau fiar ba estátua neʼebé sira halo,Neʼebé halo husi ai, besi no fatuk.
Maibé konsellu husi sira mak lia-bosok.Maromak folin-laek sira-neʼe labele koʼalia,Entaun buat diʼak saida mak ema neʼebé halo estátua sira-neʼe bele hetan?+
19 Susar ba ema neʼebé dehan ba ai-pedasuk ida: “Hadeer bá!”
Ka dehan ba fatuk neʼebé labele koʼalia: “Hadeer bá! Hanorin ami bá!”
Ema taka buat sira-neʼe ho osan-mean no osan-mutin,+No la iha iis iha buat sira-neʼe nia laran.+
20 Maibé Jeová iha ninia templu santu.+
Oh mundu tomak, nonook bá iha ninia oin!’”+
Nota-rodapé
^ Ka “kontinua matan-moris”.
^ Ka “Atu nuneʼe, ema neʼebé lee ho lian makaʼas bele lee ho momoos”.
^ Ka “halai lalais atu kumpre”.
^ Ka “Maski vizaun neʼe haree hanesan demora”.
^ Ka “hein namanas bá!”
^ Ka karik “fiar”.
^ Haree “Nefes” iha Glosáriu.
^ Haree “Siol” iha Glosáriu.
^ Ka karik “no laʼo sidi”.
