Roma 10:1-21
10 Maun-alin sira, tuir loloos haʼu hakarak ho laran no harohan ba Maromak atu ema Izraél sira hetan salvasaun.+
2 Tanba haʼu fó sasin kona-ba sira katak sira laran-manas ba Maromak,+ maibé laʼós tuir koñesimentu neʼebé loos.
3 Sira la hatene buat neʼebé loos tuir Maromak nia hakarak,+ maibé sira buka dalan atu sai ema laran-loos tuir sira-nia hakarak rasik,+ sira la halo tuir buat neʼebé loos husi Maromak.+
4 Tanba Kristu mak Ukun-Fuan nia rohan,+ atu nuneʼe ema hotu neʼebé tau fiar bele sai ema laran-loos iha Maromak nia oin.+
5 Tanba Moisés hakerek kona-ba hahalok loos tuir Ukun-Fuan, hodi dehan: “Ema neʼebé halo buat sira-neʼe sei hetan moris liuhusi buat sira-neʼe.”+
6 Maibé eskritura mós hatudu katak liuhusi fiar mak ema bele sai laran-loos. Tanba hakerek nanis ona: “Keta hanoin iha imi-nia laran:+ ‘Sé mak sei saʼe ba lalehan?’+ neʼe katak, atu lori Kristu tun mai,
7 ka: ‘Sé mak sei tun ba rai-kuak neʼebé kleʼan tebes?’*+ neʼe katak, atu lori Kristu sai husi mate.”
8 Maibé eskritura dehan saida? “Maromak nia liafuan besik imi, ida-neʼe iha imi-nia ibun no iha imi-nia laran”,+ neʼe mak “liafuan” fiar nian neʼebé ami haklaken daudaun.
9 Tanba se iha ema nia oin ó fó sai ho ó-nia ibun katak Jesus mak Naʼi,+ no ó hatudu fiar iha ó-nia laran katak Maromak halo nia moris fali ona husi mate, ó sei hetan salvasaun.
10 Tanba ho laran mak ema hatudu fiar hodi sai ema laran-loos, maibé ho ibun mak ema fó sai iha ema barak nia oin+ hodi hetan salvasaun.
11 Tanba eskritura dehan: “Ema hotu neʼebé tau fiar ba nia sei la triste.”+
12 Tanba ema Judeu no ema Gregu hanesan deʼit.+ Iha Naʼi ida deʼit ba ema hotu, Naʼi neʼebé fó bensaun barak* ba sira hotu neʼebé bolu nia.
13 Tanba “ema hotu neʼebé bolu Jeová* nia naran sei hetan salvasaun”.+
14 Maibé oinsá mak sira sei bolu nia se sira la tau fiar ba nia? No oinsá mak sira sei tau fiar ba nia se sira la rona kona-ba nia? No oinsá mak sira sei rona kona-ba nia se la iha ema ida atu haklaken?
15 No oinsá mak sira sei haklaken se ema ida la haruka sira?*+ Hanesan hakerek nanis ona: “Ema neʼebé fó sai liafuan diʼak, ninia ain mak furak tebes!”+
16 Maski nuneʼe, laʼós sira hotu halo tuir liafuan diʼak. Tanba Isaias dehan: “Jeová,* sé mak tau fiar ba buat neʼebé ami fó sai?”*+
17 Entaun, fiar mai husi buat neʼebé ema rona.+ No buat neʼebé ema rona mak liuhusi liafuan kona-ba Kristu.
18 Maibé haʼu husu: Neʼe katak sira seidauk rona mensajen neʼe ka? Lae duni, tuir loloos, “sira-nia lian toʼo iha mundu tomak, no sira-nia lia-menon toʼo ba ema neʼebé hela iha fatin dook liu iha mundu”.+
19 Maibé haʼu husu: Neʼe katak Izraél seidauk hatene ka?+ Lae duni, tanba uluk Moisés hatete: “Haʼu sei halo imi sai laran-moras liuhusi nasaun seluk; haʼu sei halo imi sai hirus loos liuhusi nasaun neʼebé beik.”+
20 Maibé Isaias fó sai ho aten-brani tebes, hodi dehan: “Sira neʼebé la buka haʼu sei hetan haʼu;+ haʼu halo sira neʼebé la husu tuir haʼu atu hatene kona-ba haʼu.”+
21 Maibé kona-ba Izraél, nia dehan: “Loron tomak haʼu loke haʼu-nia liman ba povu ida neʼebé la halo tuir no ulun-toos.”+
Nota-rodapé
^ Ka “neʼebé laran-luak”.
^ Karik signifika katak “se Maromak la haruka sira”.
^ Ka “buat neʼebé sira rona husi ami”.
