EMA ida bele laran-metin ba Maromak se nia hasoru susar neʼebé boot liu fali ninia kbiit, no la hetan buat diʼak ida maski nia halo tuir Maromak ka lae? Pergunta neʼe no ninia resposta iha ligasaun ho mane ida naran Job.

Job mak Abraão nia família ida neʼebé hela iha área neʼebé agora mak rai-Arábia. Iha tempu neʼebá, ema Izraél sei iha rai-Ejitu. Loron ida anju sira halibur iha Maromak nia oin, no Satanás mós iha sira-nia leet. Iha anju sira-neʼe nia oin, Jeová hatete katak nia tau fiar ba Job neʼebé laran-metin. Tuir loloos, Jeová fó sai katak la iha ema seluk neʼebé laran-metin hanesan Job. Maibé Satanás duun katak Job serbí Maromak tanba deʼit Maromak fó bensaun barak ba Job no proteje Job. Satanás duun katak se Job lakon buat hotu neʼebé nia iha, nia sei koʼalia aat Maromak.

Entaun Maromak husik Satanás atu halakon Job nia rikusoin hotu, halo mate Job nia oan hotu no tuirmai halo Job hetan moras aat. Job la komprende tanbasá Maromak husik buat aat sira-neʼe kona nia. Nia la hatene katak Satanás mak hamosu susar boot sira-neʼe. Maski nuneʼe, Job nunka fila kotuk ba Maromak.

Belun falsu naʼin-tolu mós vizita Job. Sira ida-idak nia liafuan neʼebé hakerek iha livru Job hatudu katak sira hakarak halo Job hanoin katak Maromak mak fó-kastigu ba nia tanba nia halo sala subasubar. Sira mós duun katak Maromak la tau fiar ba ninia atan sira no mós la kontente ho buat neʼebé ninia atan sira halo. Job lakohi duni simu sira-nia hanoin neʼebé la loos. Job ho fiar metin fó sai katak nia sei nafatin laran-metin toʼo nia mate!

Maibé Job mós halo sala hodi hanoin liu kona-ba ninia an rasik. Mane ida naran Eliú rona daudauk kuandu sira koʼalia hela. Ikusmai Eliú koʼalia hodi korrije Job no Job nia belun falsu sira. Eliú fó konsellu ba Job tanba Job haluha katak defende Maromak Jeová nia direitu atu ukun mak importante liu fali defende ema ida. Eliú mós fó konsellu makaʼas ba Job nia belun falsu sira.

Tuirmai Maromak Jeová koʼalia ba Job atu hadiʼa Job nia hanoin. Jeová uza ezemplu husi kriasaun kmanek oioin atu hanorin Job katak ema mak kiʼik liu se kompara ho Maromak neʼebé iha forsa boot liu hotu. Ho haraik an Job husik Maromak atu korrije nia. Jeová “iha domin neʼebé boot tebes no laran-sadiʼa”, tan neʼe Jeová kura Job, no fó fali rikusoin ba dala rua, no mós fó oan sanulu tan. (Tiago 5:11) Hodi laran-metin ba Jeová maski hetan susar boot, Job ho susesu prova katak ema bele laran-metin ba Maromak maski hasoru susar.

​—Informasaun neʼe mai husi livru Job.