Liurai Saul nia oan-mane boot naran Jonatan mak asuwaʼin neʼebé aten-brani. David hatete katak Jonatan lalais liu fali manu-makikit no forte liu fali leaun. Loron ida Jonatan haree tropa Filístia sira iha foho leten. Nia hatete ba ninia atan neʼebé lori armas: ‘Se ema Filístia haruka ita saʼe bá atu kontra sira, neʼe mak sinál husi Jeová katak ita sei manán sira.’ Depois tropa Filístia hakilar: ‘Saʼe mai kontra ami!’ Entaun, sira naʼin-rua saʼe ba foho no oho tropa naʼin-20.

Tanba Jonatan mak Saul nia oan-mane primeiru, nia iha direitu atu sai liurai tuirmai. Maibé nia hatene katak Jeová hili ona David atu sai liurai tuirmai ba Izraél. Maski nuneʼe Jonatan la sai laran-moras. Jonatan no David sai belun neʼebé besik  loos. Sira promete atu defende no proteje malu. Jonatan fó ninia roupa, surik, rama, no sintu ba David nuʼudar sinál belun.

Kuandu David halai husi Saul, Jonatan bá hasoru nia no dehan: ‘Keta taʼuk, no aten-brani bá. Jeová hili ona ó atu sai liurai. Haʼu-nia aman mós hatene kona-ba neʼe.’ Ó mós hakarak iha belun diʼak hanesan Jonatan ka lae?

Jonatan tau beibeik ninia moris iha perigu laran atu ajuda ninia belun. Nia hatene katak Liurai Saul hakarak oho David, tan neʼe nia hatete ba ninia aman: ‘David la halo sala ida. Se apá oho nia, apá sei halo sala.’ Saul sai hirus tebes ba Jonatan.

Liutiha tinan balu, Saul no Jonatan mate iha funu. Depois Jonatan mate, David buka Jonatan nia oan-mane Mefiboset. Kuandu David hetan nia, nia hatete ba Mefiboset: ‘Tanba ó-nia apá haʼu-nia belun neʼebé diʼak, haʼu sei tau matan ba ó iha ó-nia moris tomak. Ó sei hela iha haʼu-nia palásiu no han iha haʼu-nia meza.’ David nunka haluha ninia belun Jonatan.