IHA tinan 40 nia laran antes tinan 1914, estudante Bíblia balu dehan sai katak iha tinan 1914, akontesimentu sira neʼebé importante sei mosu. Akontesimentu saida deʼit mak mosu iha tinan neʼe? No sinál saida mak hatudu katak tinan 1914 mak tinan neʼebé importante duni?

Iha Lucas 21:24, Jesus hatete: “Nasaun sira sei sama Jeruzalein toʼo tempu nasaun sira-nian kumpre ona.” Iha tempu uluk, Jeruzalein mak sidade kapitál ba nasaun ema judeu nian, no husi sidade neʼe mak liurai sira husi David nia umakain tuur iha kadunan atu ukun. (Salmo [Mazmur] 48:1, 2) Maibé, liurai sira-neʼe la hanesan ho ukun-naʼin sira iha nasaun seluk. Sira tuur iha “Jeová nia kadunan” nuʼudar Maromak rasik nia reprezentante. (1 Crônicas [Tawarikh] 29:23) Tan neʼe, Jeruzalein mak reprezenta Maromak Jeová nia governu.

Maibé, oinsá no horibainhira mak nasaun sira “sama” Maromak nia governu? Ida-neʼe akontese kuandu ema Babilónia ataka no manán Jeruzalein iha tinan 607 molok Kristu. “Jeová nia kadunan” sai mamuk, no la iha tan liurai ida husi David nia umakain neʼebé tuur iha kadunan neʼe. (2 Reis [Raja-Raja] 25:1-26) Maibé, nasaun sira sei “sama” Jeruzalein ba nafatin ka lae? Lae. Tanba anju Gabriel hatete ba Maria kona-ba Jesus, dehan: “Maromak Jeová sei fó ba nia ninia aman David nia kadunan.”  (Lucas 1:32, 33) Tan neʼe, tempu neʼebé nasaun sira “sama” Jeruzalein sei ramata kuandu Jesus sai Liurai.

Bainhira loos mak akontesimentu importante neʼe mosu? Jesus hatete katak nasaun sira sei sama Jeruzalein toʼo “tempu nasaun sira-nian kumpre ona”. Daniel kapítulu 4 ajuda ita atu hatene “tempu nasaun sira-nian” mak tempu hira. Daniel haktuir mehi ida neʼebé Maromak fó ba liurai Babilónia, naran Nabucodonosor. Liurai neʼe haree ai-hun boot tebetebes neʼebé tesi tiha. Nia hun neʼe la bele sai boot fali tanba futu metin ho besi no riti. Anju ida hatete atu husik ai-hun neʼe ba “tinan hitu”.—Daniel 4:10-16.

Dala ruma, Bíblia uza ai-hun atu reprezenta governu. (Ezequiel [Yehezkiel] 17:22-24; 31:2-5) Tan neʼe, ai-hun neʼebé tesi tiha ona hatudu katak Maromak nia governu,  neʼebé liurai sira iha Jeruzalein mak reprezenta, sei kotu tiha. Maibé, mehi neʼe mós hatudu katak nasaun sira sei la “sama Jeruzalein” ba nafatin. Sira sei sama ba “tinan hitu” deʼit. Tinan sira-neʼe laʼós tinan baibain deʼit. Se nuneʼe, “tinan hitu” neʼe reprezenta tempu hira?

Eskritura iha Apokalipse 12:6, 14 hatudu katak tinan tolu ho balun mak “loron 1.260”. Tan neʼe “tinan hitu” sei sai loron 2.520 (1.260 × 2). Maibé, liutiha loron 2.520 depois Jeruzalein monu, nasaun sira “sama” nafatin Maromak nia governu. Tan neʼe, ita komprende ho klaru katak presiza tempu kleur liu fali loron 2.520 atu liafuan neʼe sai loos. Kuandu sura “loron ida ba tinan ida” tuir eskritura iha Números (Bilangan) 14:34 no Ezequiel (Yehezkiel) 4:6, “tinan hitu” neʼe sai tinan 2.520.

Ita komesa sura tinan 2.520 neʼe husi fulan-Outubru tinan 607 molok Kristu, kuandu Jeruzalein monu ba Babilónia no liurai husi David nia umakain lakon nia kadunan. Tinan 2.520 neʼe ramata iha fulan-Outubru tinan 1914. Iha momentu neʼe, “tempu nasaun sira-nian kumpre ona”, tanba Maromak halo Jesus Kristu sai Liurai iha lalehan. *—Salmo [Mazmur] 2:1-6; Daniel 7:13, 14.

Kuandu Jesus komesa atu ukun nuʼudar Liurai iha lalehan, sinál neʼebé nia hatete nanis akontese. Sinál sira-neʼe mak funu, hamlaha, rai-nakdoko, no moras aat. (Mateus 24:3-8; Lucas 21:11) Akontesimentu hirak-neʼe hatudu duni katak iha tinan 1914 mak Maromak nia Ukun harii iha lalehan, no iha tinan neʼe mak komesa “loron ikus sira” ba mundu aat neʼe.—2 Timóteo 3:1-5.