Fasil deʼit atu sempre halo tuir ó-nia inan-aman ka lae?— Lae, dala ruma ida-neʼe susar. Maibé Jesus halo tuir Jeová no mós nia inan-aman. Ó hatene Jesus halo ida-neʼe ka lae?— Jesus nia ezemplu bele ajuda ó atu halo tuir ó-nia inan-aman maski dala ruma ida-neʼe susar. Mai ita aprende tan kona-ba neʼe.

Antes Jesus hela iha rai, nia hamutuk ho ninia Aman Jeová iha lalehan. Maibé Jesus mós iha inan-aman iha rai. Sira-nia naran mak José no Maria. Ó hatene ka lae, saida mak akontese hodi sira sai Jesus nia inan-aman?—

Jeová foti Jesus nia moris iha lalehan no tau ida-neʼe iha Maria nia kabun hodi Jesus bele moris mai no hela iha mundu. Ida-neʼe mak milagre! Jesus iha Maria nia kabun, hanesan mós ho bebé sira seluk iha sira-nia inan nia kabun. No liutiha fulan sia, Jesus moris mai. Tan neʼe mak Maria no ninia laʼen, José, sai Jesus nia inan-aman iha rai.

Kuandu Jesus tinan 12 deʼit, nia halo buat ida neʼebé hatudu oinsá mak nia hadomi nia Aman Jeová. Ida-neʼe akontese kuandu Jesus no nia família laʼo ba Jeruzalein atu adora Jeová. Nuʼudar sira fila fali ba uma, José no Maria la bele hetan Jesus iha fatin hotu. Tuir ó-nia hanoin, Jesus iha neʼebé?—

José no Maria fila fali lalais ba Jeruzalein atu buka Jesus iha fatin hotu. Sira hanoin barak tebes tanba sira la hetan nia. Maibé liutiha loron tolu, sira hetan fali Jesus iha templu laran! Ó hatene tanbasá mak Jesus iha templu?— Tanba iha fatin neʼe nia bele aprende kona-ba ninia Aman Jeová. Jesus hadomi Jeová no nia hakarak aprende kona-ba oinsá nia bele halo Jeová kontente. Kuandu Jesus sai boot, nia mós halo tuir Jeová nafatin. Nia halo ida-neʼe maski dala ruma susar no nia hetan terus. Tuir ó-nia hanoin, Jesus mós halo tuir José no Maria ka lae?— Sin, Bíblia dehan katak Jesus halo tuir.

Saida mak ó bele aprende husi Jesus nia ezemplu?— Ó presiza halo tuir ó-nia inan-aman, maski dala ruma ida-neʼe susar. Ó sei halo nuneʼe ka lae?—