Imajina toʼok situasaun tuirmai neʼe: Sandra namora ho Miguel ba fulan rua deʼit, maibé tuir Sandra nia hanoin, nia koñese Miguel kleur ona. Sira haruka beibeik mensajen ba malu, telefone malu ba oras barak, no sira komprende malu ho didiʼak! Maibé agora, Miguel sente katak koʼalia ba malu deʼit la toʼo.

Durante fulan rua neʼe, Miguel ho Sandra kaer liman no dala ruma mós reʼi malu, no Sandra sente neʼe deʼit toʼo ona ba nia. Maibé, Sandra mós hanoin: ‘Haʼu lakohi lakon Miguel, tanba só nia deʼit mak bele halo haʼu sente bonita no espesiál tebes. Liután neʼe, ami hadomi malu duni . . .’

Se ó mak tinan toʼo ona atu namora, no iha Sandra nia situasaun, saida mak ó sei halo?

Se ita saʼe ai-hun ida, no haksoit hodi koko atu semo hanesan manu ida, konsekuénsia mak ita hetan kanek todan. Hanesan neʼe mós bainhira ita halo desizaun kona-ba morál hodi kontra Maromak nia Liafuan neʼebé dehan: “Hasees an husi sala-foʼer.”—1 Tesalónika 4:3.

Bainhira Bíblia temi liafuan “sala-foʼer”, neʼe inklui mós relasaun seksuál entre ema neʼebé seidauk kaben. Entaun, se ita la halo tuir Bíblia nia mandamentu neʼe, konsekuénsia saida mak ita sei hetan? Bíblia hatete: “Ema neʼebé halo sala-foʼer, nia halo sala kontra ninia isin-lolon rasik.” (1 Korinto 6:18) Neʼe katak sá?

 Tuir peskiza sira, joven barak neʼebé halo ona relasaun seksuál antes kaben hetan rezultadu tuirmai neʼe:

• LARAN-SUSAR. Husi joven sira neʼebé halo ona relasaun seksuál antes kaben, maioria mak dehan katak ikusmai sira sente arrepende an.

• LAKON FIAR BA MALU. Depois halo tiha relasaun seksuál, mane no feto hotu komesa hanoin: ‘Antes ho haʼu, nia toba ona ho sé tan?’

• SENTIMENTU TROKA. Feto barak gosta mane neʼebé proteje sira, laʼós aproveita sira. No bainhira mane ida konsege toba ona ho feto ida, dala barak mane neʼe nia sentimentu troka no la hanesan uluk ona.

• Hanoin-hetan: Se ó monu ba tentasaun atu halo relasaun seksuál maski seidauk kaben, neʼe katak ó la respeitu ó-nia an no ó sei lakon ó-nia dignidade. (Roma 1:24) Ó-nia isin mak folin-boot tebes, tan neʼe ó labele fó arbiru deʼit ba ema seluk!

Hatudu sai katak ó mak ema neʼebé hamriik metin atu “hasees an husi sala-foʼer”. (1 Tesalónika 4:3) No loron ida bainhira ó kaben, ó bele halo relasaun seksuál ho laran-kontente. Iha tempu neʼebá, ó sei la hanoin barak, la arrepende an, no la deskonfia malu hanesan ema neʼebé halo ona relasaun seksuál antes kaben.—Provérbios (Amsal) 7:22, 23; 1 Korinto 7:3.

• Ema neʼebé hadomi loos ó, sei halo buat neʼebé bele lori perigu ba ó-nia isin no neon ka lae?

• Ema neʼebé hanoin loos ó, sei koko atu estraga ó-nia relasaun diʼak ho Maromak ka lae?—Ebreu 13:4.