Maromak neʼebé loos mak Kriadór ba buat hotu-hotu. Nia la iha hun no la iha rohan. (Salmo 90:2) Liafuan diʼak hotu neʼebé ita hetan iha Bíblia mai husi Maromak. (1 Timóteo 1:11) Tanba Maromak mak fó moris mai ita, ita tenke adora nia mesak deʼit.​—Lee Apokalipse 4:11.

Ema labele haree Maromak tanba Maromak mak Espíritu. Neʼe katak nia kmanek liu fali ema no animál neʼebé moris iha mundu. (João 1:18; 4:24) Maski ita la haree Maromak, maibé ita bele hatene didiʼak ninia hahalok liuhusi buat neʼebé nia kria. Porezemplu, ai-fuan no ai-funan oioin hatudu Maromak nia domin no matenek. Universu neʼebé boot tebetebes hatudu katak Maromak iha forsa boot.​—Lee Roma 1:20.

Ita mós bele aprende buat barak liután kona-ba Maromak liuhusi Bíblia. Porezemplu, Bíblia fó-hatene ita kona-ba saida mak Maromak gosta no la gosta, oinsá nia tau matan ba ninia povu, no hahalok sira neʼebé nia hatudu iha situasaun oioin.​—Lee Salmo 103:7-10.

Jesus hatete: “Ami Aman iha lalehan, halo Ita-nia naran sai santu.” (Mateus 6:9) Maski Maromak iha títulu oioin, maibé nia iha naran ida deʼit. Ema temi naran neʼe iha dalan oioin tuir língua ida-idak. Iha lian Tetun, naran neʼe mak “Jeová”, no iha mós ema neʼebé temi nuʼudar “Yahweh”.​—Lee Salmo 83:18.

Tradusaun Bíblia barak hasai tiha Maromak nia naran no troka fali ho títulu sira hanesan Naʼi ka Maromak. Maibé iha Bíblia orijinál, Maromak nia naran hakerek maizumenus dala 7.000. Jesus mós haklaken Maromak nia naran bainhira nia hanorin ema kona-ba Maromak.​—Lee João 17:26.

Haree vídeo Maromak iha naran ka lae?

Tanba ita ema hasoru susar barak, ema balu hanoin katak Maromak Jeová la hanoin ita. Neʼe loos ka lae? Kuandu ita hasoru susar ruma, ema balu hatete katak Maromak mak koko ita, maibé hanoin neʼe la loos.​—Lee Tiago 1:13.

Maromak hatudu ninia domin hodi fó liberdade ba ita atu halo desizaun rasik. Ita kontente tanba ita bele hili atu serbí Maromak, loos ka lae? (Josué 24:15) Susar barak mosu tanba ema hili atu halo aat ba ema seluk. Kuandu Maromak haree buat neʼebé la iha justisa, ida-neʼe halo nia triste.​—Lee Génesis 6:5, 6.

Maromak Jeová hanoin ita. Nia hakarak ita moris kontente. Lakleur tan, nia sei halakon ema nia susar no mós ema neʼebé hamosu susar ba ema seluk. Maromak Jeová iha razaun atu husik susar sira-neʼe akontese ohin loron. Ita sei aprende kona-ba neʼe iha Lisaun 8.​—Lee 2 Pedro 2:9; 3:7, 13.

Maromak Jeová konvida ita atu hakbesik ba nia liuhusi orasaun. Nia hanoin ita ida-idak. (Salmo 65:2; 145:18) Nia prontu atu fó perdua mai ita. Maski dala ruma ita monu ba sala, maibé nia hafolin nafatin ita-nia hakaʼas an atu halo nia kontente. Tan neʼe, maski ita ema sala-naʼin, ita bele iha relasaun neʼebé besik ho Maromak.​—Lee Salmo 103:12-14; Tiago 4:8.

Tanba Maromak Jeová mak fó moris mai ita, ita tenke hadomi nia liu fali ita hadomi ema seluk. (Marcos 12:30) Kuandu ita hatudu ita-nia domin ba Maromak hodi aprende kona-ba nia no halo tuir ninia hakarak, ita bele hakbesik liután ba nia.​—Lee 1 Timóteo 2:4; 1 João 5:3.