Maromak Jeová kria mundu nuʼudar ema nia hela-fatin. Maromak kria ema primeiru, Adão no Eva, laʼós atu hela iha lalehan tanba nia kria ona anju sira atu hela iha neʼebá. (Job 38:4, 7) Maromak fó fatin furak naran jardín Eden ba Adão nuʼudar ninia hela-fatin. (Génesis 2:15-17) Maromak Jeová fó oportunidade ba Adão, inklui mós ninia oan no bei-oan sira neʼebé seidauk moris atu hela ba nafatin iha mundu.​—Lee Salmo 37:29; 115:16.

Foufoun, jardín Eden deʼit mak paraízu neʼebé furak. Maromak hakarak feen-laʼen primeiru neʼe iha oan no halo mundu nakonu ho ema, no ikusmai sira sei halo luan paraízu neʼe toʼo mundu tomak. (Génesis 1:28) Mundu sei nunka lakon, no sei sai ema nia hela-fatin ba nafatin.​—Lee Salmo 104:5.

Haree vídeo Tanbasá mak Maromak kria mundu?

Adão no Eva la halo tuir Maromak Jeová, tan neʼe nia hasai sira husi jardín Eden. Paraízu neʼe lakon ona, no la iha ema ida mak konsege halo fali paraízu neʼe. Bíblia hatete: “Mundu neʼe entrega ona ba ema aat sira-nia liman.”​—Job 9:24.​—Lee Génesis 3:23, 24.

Neʼe katak Jeová lakohi tan atu kumpre ninia hakarak ba mundu ka lae? Lae! Maromak iha kbiit boot liu hotu, tan neʼe nia sempre kumpre ninia hakarak. (Isaias 45:18) Maromak sei hadiʼa situasaun hodi ema bele moris iha mundu hanesan ninia planu horiuluk kedas.​—Lee Salmo 37:11, 34.

Mundu sei sai fali Paraízu durante tempu neʼebé Jesus ukun nuʼudar Liurai. Iha funu ida naran Armagedon, Jesus hamutuk ho Maromak nia anju sira sei halakon ema hotu  neʼebé kontra Maromak. Depois, Jesus sei kesi metin Satanás durante tinan 1.000. Maromak nia povu sei hetan salvasaun tanba Jesus sei dirije no proteje sira. Sira sei moris ba nafatin iha mundu neʼebé sai fali Paraízu.​—Lee Apokalipse 20:1-3; 21:3, 4.

Bainhira mak Maromak sei halakon buat aat hotu iha mundu? Jesus fó-hatene nanis ona kona-ba “sinál” sira neʼebé hatudu katak mundu neʼe besik atu remata. Ohin loron, situasaun iha mundu sai aat ba beibeik, ida-neʼe hatudu katak ita moris daudauk iha tempu neʼebé “mundu neʼe nia rohan” besik ona.​—Lee Mateus 24:3, 7-14, 21, 22.

Durante tinan 1.000 neʼebé Liurai Jesus mak ukun mundu neʼe, nia sei halakon terus hotu. (Isaias 9:6, 7; 11:9) Jesus mós sei serbí nuʼudar Amlulik Boot ba ema neʼebé hadomi Jeová hodi kasu sira-nia sala. Liuhusi Jesus, Maromak sei halakon moras, ema sei la sai ferik-katuas ka mate.​—Lee Isaias 25:8; 33:24.

Ema neʼebé halo tuir Maromak sei moris iha Paraízu. (1 João 2:17) Jesus haruka ninia dixípulu sira atu buka ema laran-maus no hanorin saida mak sira presiza halo atu Maromak simu sira. Ohin loron, Jeová halibur daudauk ema rihun ba rihun atu moris iha mundu neʼebé sei sai Paraízu. (Sofonias 2:3) Iha Reuniaun-Fatin husi Testemuña ba Jeová, ema barak aprende daudauk atu hadiʼa sira-nia hahalok. Labarik sira no inan-aman mós adora Maromak hodi aprende oinsá mak liafuan diʼak lori benefísiu ba sira-nia moris.​—Lee Miqueias 4:1-4.