1-3. Saida mak Pedro haree iha loron neʼe? Esplika toʼok kona-ba kalan neʼe.

 KALAN boot, Pedro kontinua hakaʼas an atu hean ró. Nia hakarak tebes atu kalan neʼe ramata tanba ba oras barak ona nia hean ró neʼe, no ninia kotuk no kabaas mós sente moras ona. Anin halo Tasi Galileia sai siʼak no laloran baku nafatin ró bá-mai no halo Pedro bokon no malirin. Maibé Pedro hakaʼas an nafatin atu hean ró.

² Pedro no ninia maluk sira foin husik Jesus mesak iha tasi-ibun. Durante loron neʼe, sira haree Jesus halo milagre hodi fó han ema-lubun boot ho paun no ikan balu deʼit. Kuandu ema haree milagre neʼe, sira hakarak foti Jesus nuʼudar liurai, maibé nia lakohi hola parte iha buat polítiku nian. Jesus mós hakarak hanorin ninia dixípulu sira atu sees husi hakarak neʼe. Agora Jesus dada an husi ema-lubun boot. Nia haruka ninia dixípulu sira atu saʼe ró no bá tasi sorin, maibé Jesus bá mesak iha foho leten atu halo orasaun.—Marcos 6:35-45; lee João 6:14-17.

³ Maski dixípulu sira hean ró ba oras barak ona, maibé sira konsege halai toʼo kilómetru balu deʼit. Anin neʼebé huu makaʼas no lian husi laloran halo dixípulu sira la bele koʼalia ba malu. Nuneʼe, karik Pedro hanoin kleʼan deʼit kona-ba buat barak.

4. Pedro luta hasoru sentimentu saida deʼit?

 ⁴ Pedro iha buat barak atu hanoin. Tinan rua liu tiha ona husi tempu neʼebé nia foin hasoru Jesus husi Nazaré. Maski Pedro aprende buat barak ona husi Jesus, maibé nia sei iha buat barak tan atu aprende. Pedro hakarak luta hasoru ninia sentimentu taʼuk no laran-rua. Ohin loron, ita hotu hakarak banati-tuir ninia ezemplu neʼebé diʼak tebes. Tanbasá? Mai ita haree.

5, 6. Esplika toʼok kona-ba Pedro nia moris.

⁵ Pedro sei nunka haluha loron neʼebé nia hasoru Jesus. Iha loron neʼe, ninia alin André hatoʼo liafuan diʼak ba Pedro hodi dehan: “Ami hetan ona Mesias.” Ho liafuan neʼe, Pedro nia moris komesa atu troka.—João 1:41.

⁶ Pedro hela iha sidade naran Kafarnaum. Sidade neʼe besik bee-lihun boot naran Tasi Galileia. Pedro no André serbisu hamutuk ho Tiago no João nuʼudar peskadór sira. Tiago no João mak Zebedeu nia oan sira. Pedro hela hamutuk ho ninia feen, banin-feto no ninia alin André. Atu tau matan ba ninia família neʼe, nia tenke serbisu makaʼas no uza ninia forsa no matenek. Karik dala ruma sira tenke serbisu kalan tomak. Atu kaer ikan, sira uza ró rua iha sorin-sorin no hatún rede iha klaran. Tuirmai, sira rasta makaʼas rede neʼebé nakonu ho ikan ba ró laran. No kuandu loron saʼe ona, sira sei iha serbisu tan atu halo. Sira hili ikan neʼebé sira kaer, lori atu faʼan, depois hadiʼa no fase rede sira.

7. Liafuan saida mak Pedro rona kona-ba Jesus? Tanbasá mak ida-neʼe importante?

⁷ Bíblia dehan katak uluk André mak João Batista nia dixípulu. Karik Pedro gosta rona kuandu André konta istória kona-ba João nia hanorin sira. Loron ida, João Batista haree Jesus husi Nazaré liu daudaun no hatete ba André: “Haree, neʼe mak Maromak nia Bibi-Oan!” André sai kedas Jesus nia dixípulu. Ho laran-manas André hatoʼo liafuan importante ba Pedro, katak Mesias toʼo ona! (João 1:35-40) Sira hein namanas Mesias neʼe tanba horiuluk kedas, maizumenus tinan 4.000 antes neʼe, Maromak Jeová promete katak ema ida sei fó salvasaun ba ema hotu. (Gênesis  [Kejadian] 3:15) André foin hasoru Mesias neʼe, no agora Pedro mós halai lalais hodi hasoru Jesus.

8. Naran neʼebé Jesus fó ba Pedro iha arti saida? Tanbasá mak ema balu sente katak Pedro la merese naran neʼe?

⁸ Antes Jesus hasoru Pedro, ninia naran mak Simão. Maibé agora Jesus haree nia no dehan: “‘Ó mak Simão, João nia oan, no haʼu sei hanaran ó Cefas’ (katak Pedro).” (João 1:42) Liafuan “Cefas” iha arti katak “fatuk”. Jesus nia liafuan neʼe fó-hatene nanis kona-ba Pedro nia knaar iha futuru, katak nia sei sai hanesan fatuk neʼebé metin no forte loos atu ajuda ema neʼebé tuir Kristu. Pedro hanoin katak ninia hahalok metin hanesan fatuk ka lae? Karik lae. Ohin loron, ema balu neʼebé lee Bíblia hanoin katak Pedro nia desizaun sira la metin. Ema seluk hanoin katak nia mak ema neʼebé fraku, laran-rua no la bele tau fiar ba nia.

9. Maromak Jeová no Jesus haree ba saida? Tanbasá mak ita tenke fiar katak sira hatene didiʼak ita-nia laran?

⁹ Jesus hatene katak Pedro iha fraku oioin. Maibé tanba Jesus hanesan ninia Aman, Jeová, nia haree ba buat neʼebé diʼak iha ema nia laran. Nia hatene katak Pedro iha hahalok sira neʼebé diʼak no nia hakarak ajuda Pedro haburas hahalok sira-neʼe. Ohin loron, Jeová no Jesus mós buka buat neʼebé diʼak iha ita-nia laran. Karik ita la fiar an no hanoin katak ita ladún iha hahalok neʼebé diʼak. Maibé ita tenke fiar katak Maromak no Jesus hatene didiʼak ita-nia laran, no ita hakarak atu husik sira fó treinu ba ita no hadiʼa ita-nia hahalok, hanesan Pedro mós halo.—Lee 1 João 3:19, 20.

10. Buat saida deʼit mak Pedro haree neʼebé Jesus halo, maibé nia fila fali ba saida?

¹⁰ Bainhira Jesus komesa haklaken, karik Pedro mós tuir nia. Kuandu Jesus tuir festa kazamentu nian iha rai-Kaná no halo ninia milagre primeiru hodi troka bee sai fali tua-uvas, karik Pedro mós iha neʼebá. Liután neʼe, nia rona Jesus nia liafuan furak kona-ba Maromak nia Ukun neʼebé fó esperansa ba ema. Maski Pedro haree no rona buat neʼebé diʼak tebes, maibé nia husik Jesus no fila fali ba ninia serbisu nuʼudar peskadór. Maibé, fulan balu liutiha, Pedro hasoru  malu fali ho Jesus no agora Jesus konvida nia atu uza ninia moris tomak hodi tuir nia.

11, 12. (a) Esplika toʼok kona-ba Pedro nia serbisu iha kalan neʼe. (b) Kuandu Pedro rona Jesus koʼalia, karik nia hanoin kona-ba saida deʼit?

¹¹ Iha tempu neʼe, Pedro foin serbisu kalan tomak, maibé ninia serbisu iha kalan neʼe saugati deʼit. Pedro ho ninia maluk peskadór sira hatún sira-nia rede dala barak ona no koko atu buka ikan iha fatin oioin, maibé sira la kaer buat ida. Pedro hakarak tebes atu kaer ikan barak tanba ninia serbisu neʼe ajuda nia atu tau matan ba ninia família. Agora nia tun husi ró no komesa fase nia rede sira. Nia halo hela ida-neʼe kuandu Jesus hakbesik nia.

¹² Ema-lubun boot haleʼu Jesus, sira hakarak tebes atu rona ninia liafuan hotu. Tanba ema barak tebes toʼo sena malu, Jesus saʼe Pedro nia ró no husu nia atu hadook ró uitoan husi tasi-ibun. Bainhira Jesus koʼalia iha ró leten, ema bele rona ninia liafuan ho momoos. Jesus komesa hanorin ema-lubun boot neʼe no Pedro mós rona didiʼak ba Jesus nia liafuan, hanesan ho ema sira neʼebé hamriik iha tasi-ibun. Karik Pedro sente katak ajuda Kristu hodi haklaken no fó esperansa ba ema iha rai tomak mak knaar espesiál tebes. Maibé, Pedro bele halo knaar neʼe ka lae? Karik Pedro hanoin filafali oinsá nia serbisu makaʼas horikalan, no sente katak nia la bele halaʼo serbisu haklaken hamutuk ho Jesus, no iha tempu hanesan halo serbisu atu tau matan ba ninia família.—Lucas 5:1-3.

13, 14. Milagre saida mak Jesus halo? Oinsá mak Pedro sente kona-ba neʼe?

¹³ Bainhira Jesus koʼalia hotu ona, nia hatete ba Pedro: “Lori ró ba tasi klaran, no soe imi-nia rede ba tasi.” Pedro neʼebé sente laran-rua hela dehan: “Mestre, ami serbisu makaʼas ba kalan tomak no la hetan buat ida, maibé tanba Ita mak haruka, haʼu sei soe rede neʼe.” Pedro foin serbisu  makaʼas atu fase rede sira. Liután neʼe, nia hatene katak iha oras neʼe ikan ladún barak. Ita bele fiar katak Pedro lakohi duni hatún fali ninia rede, maibé Pedro halo tuir no bolu ninia kolega sira neʼebé lori ró segundu atu sira mós tuir nia.—Lucas 5:4, 5.

¹⁴ Pedro komesa atu rasta rede ba ró laran, maibé nia hakfodak hodi sente katak rede neʼe todan loos. Nia dada makaʼas liután no lakleur, nia haree ikan barak tebes iha rede laran. Ho lalais, Pedro bolu ninia kolega sira neʼebé iha ró seluk atu mai lalais hodi ajuda. Bainhira sira toʼo neʼebá no haree ikan barak, sira hatene kedas katak ró ida deʼit latoʼo. Sira tau ikan nakonu iha ró rua, maibé todan  loos toʼo halo ró sira-neʼe besik atu mout. Pedro hakfodak tebetebes. Nia haree ona Jesus uza ninia kbiit, maibé milagre neʼebé Jesus foin halo neʼe, kona duni Pedro nia laran. Sin, Jesus iha kbiit boot duni, nia mós bele halo ikan barak tama ba rede laran! Pedro sai taʼuk loos no monu ain ba Jesus hodi dehan: “Naʼi, hadook an husi haʼu, tanba haʼu ema sala-naʼin.” Nuʼudar ema sala-naʼin, Pedro sente nia la merese atu hamutuk ho ema neʼebé uza Maromak nia kbiit iha dalan furak hanesan neʼe.—Lee Lucas 5:6-9.

15. Oinsá mak Jesus hanorin Pedro kona-ba buat neʼebé importante liu?

¹⁵ Jesus koʼalia ho laran-diʼak hodi dehan: “Keta taʼuk. Hahú ohin, ó sei kail ema.” (Lucas 5:10, 11) Ida-neʼe laʼós tempu atu sente taʼuk ka laran-rua. Pedro presiza hanoin kona-ba serbisu haklaken, duké hanoin barak kona-ba buka moris ka hanoin kona-ba ninia fraku oioin, tanba Maromak neʼebé nia serbí mak ida neʼebé “sei fó perdua neʼebé boot tebes”. (Isaías [Yesaya] 55:7) Jesus iha serbisu importante atu halo, serbisu neʼebé sei troka ema hotu nia futuru. Sin, Pedro la presiza hanoin barak tanba Maromak Jeová sei fó buat neʼebé nia presiza atu halo serbisu haklaken, no mós atu tau matan ba ninia família.—Mateus 6:33.

16. Oinsá mak Pedro, Tiago, no João simu Jesus nia konvite? Tanbasá mak desizaun neʼe mak diʼak liu hotu?

¹⁶ Pedro halo tuir kedas Jesus, hanesan mós ho Tiago no João. Bíblia hatete: “Sira lori fali ró ba rai-maran, no husik tiha buat hotu, sira laʼo tuir nia.” (Lucas 5:11) Hodi halo ida-neʼe, Pedro hatudu ninia fiar ba Jesus no mós ba Ida neʼebé haruka nia mai. Pedro foti desizaun neʼebé diʼak liu hotu. Ohin loron, ema kristaun mós hatudu fiar hanesan Pedro bainhira sira la husik sentimentu taʼuk no laran-rua hanetik sira atu serbí Maromak. Jeová sei fó bensaun no tau matan ba ema neʼebé hatudu fiar-metin hanesan neʼe.—Salmo (Mazmur) 22:4, 5.

17. Durante tinan rua neʼebé Pedro koñese Jesus, nia haree saida deʼit?

¹⁷ Maizumenus tinan rua liutiha tempu neʼebé Pedro foin hasoru Jesus, hanesan ita lee tiha ona iha parágrafu primeiru, iha kalan ida Pedro hean ró iha Tasi Galileia neʼebé siʼak. Iha tempu neʼe, Pedro iha buat barak atu hanoin.  Porezemplu, uluk Jesus kura Pedro nia banin-feto. Nia mós hatoʼo ninia diskursu iha foho ida. Jesus hatudu dala barak liuhusi ninia hanorin no milagre sira katak nia mak ema neʼebé Jeová hili atu sai Mesias. Durante tempu neʼe hotu, Pedro nia toman atu sente taʼuk no laran-rua sai menus uitoan. Ita hatene ida-neʼe tanba Jesus mós hili Pedro atu sai ninia apóstolu ida. Maski nuneʼe, Pedro sei haree katak nia tenke luta hasoru nafatin sentimentu sira-neʼe.

18, 19. (a) Esplika toʼok saida mak Pedro haree iha Tasi Galileia. (b) Oinsá mak Jesus ajuda Pedro hametin ninia fiar?

¹⁸ Dadeer-saan nakukun maizumenus tuku tolu liu, derrepente deʼit Pedro para hean ró no tuur loos. Pedro haree buat ruma iha bee leten neʼebé book an. Saida mak neʼe? Neʼe laʼós fulan nia naroman neʼebé tiru bee leten tanba buat neʼebé Pedro haree neʼe hamriik loos. Pedro hakaʼas an atu haree saida mak mai daudaun. Ikusmai nia haree mane ida laʼo iha bee leten. Mane neʼe hakbesik sira no sira hanoin nia atu laʼo liu deʼit. Dixípulu sira taʼuk loos. Maibé mane neʼe koʼalia ba sira hodi dehan: “Aten-brani bá! Neʼe mak haʼu. Keta taʼuk.” Sin, mane neʼe mak Jesus!—Mateus 14:25-28.

¹⁹ Foufoun Pedro sente brani. Tan neʼe nia hatán fali: “Naʼi, se neʼe mak Ita, haruka haʼu laʼo iha bee leten hodi toʼo ba Ita.” Pedro hakarak hametin ninia fiar hodi hola parte rasik iha Jesus nia milagre kapás neʼe. Ho laran-diʼak, Jesus bolu nia. Pedro tun husi ró no komesa laʼo iha bee leten neʼebé book an daudaun. Hanoin toʼok oinsá mak Pedro sente bainhira nia ain sama bee leten. Karik nia sente hakfodak loos nuʼudar nia laʼo iha bee leten hodi bá toʼo Jesus. Maibé lakleur deʼit, nia komesa sente taʼuk fali.—Lee Mateus 14:29.

20. (a) Saida mak Pedro komesa atu hanoin, no saida mak akontese ba nia tanba ida-neʼe? (b) Jesus hanorin Pedro saida?

²⁰ Hodi uza Jeová nia kbiit, Jesus ajuda Pedro laʼo iha bee leten. Maibé, Pedro presiza tau fiar no haree nafatin ba Jesus. Pedro halo ida-neʼe ka lae? Lae. Nia komesa hanoin barak. Bíblia esplika katak “kuandu nia haree anin-boot, nia sai taʼuk”. Sin, Pedro haree ba tasi neʼebé siʼak no laloran neʼebé baku ró makaʼas no nia sai taʼuk. Karik nia hanoin nia atu mout no mate iha neʼebá. Nuʼudar nia sai taʼuk  liu, ninia fiar mós sai fraku liu. Maski Pedro iha naran neʼebé iha arti katak “Fatuk” tanba ninia fiar neʼebé metin, maibé agora nia komesa atu mout tanba ninia fiar sai namlele. Nia hakilar ba Jesus hodi dehan: “Naʼi, salva haʼu!” Jesus kaer kedas Pedro nia liman no dada nia saʼe. No bainhira sira hamriik hela iha bee leten Jesus uza tempu neʼe atu hanorin nia buat neʼebé importante hodi dehan: “Ó neʼebé fiar kiʼik, tansá ó laran-rua?”—Mateus 14:30, 31.

21. Tanbasá perigu atu sente laran-rua? Oinsá mak ita bele luta hasoru sentimentu neʼe?

²¹ Jesus husu: “Tansá ó laran-rua?” Pergunta neʼe diʼak loos. Se ita laran-rua, neʼe mak perigu duni. Neineik-neineik ida-neʼe bele halo ita-nia fiar sai fraku no ikusmai kona mós ita-nia relasaun ho Maromak. Tan neʼe ita tenke luta hasoru sentimentu hanesan neʼe. Maibé oinsá? Hodi hanoin nafatin ba buat neʼebé importante liu. Se ita hanoin demais kona-ba buat neʼebé halo ita taʼuk no laran-tun, ka ba buat neʼebé bele hadook ita husi Jeová no Jesus, ita-nia fiar sei sai fraku. Maibé, se ita hanoin nafatin kona-ba Jeová no Jesus, hanesan buat neʼebé sira halo tiha ona, buat neʼebé sira halo daudaun no sei halo iha aban-bainrua, ita-nia fiar sei sai metin duni.

22. Tanbasá diʼak mai ita atu banati-tuir Pedro nia fiar?

²² Bainhira Pedro tuir Jesus hodi saʼe fali ró, nia haree Tasi Galileia neʼebé siʼak sai hakmatek fali. Pedro no dixípulu sira seluk dehan: “Ita mak Maromak nia Oan duni.” (Mateus 14:33) Loro-matan saʼe ona no Pedro nia laran sente kontente no agradese tebes. Nia aprende atu husik sentimentu taʼuk no laran-rua. Maski Pedro presiza tempu hodi sai ema kristaun ho hahalok neʼebé metin hanesan Jesus dehan, maibé nia sei hakaʼas an nafatin atu haburas liután hahalok neʼe. Ita mós prontu atu halo hanesan neʼe ka lae? Diʼak se ita hotu banati-tuir Pedro nia fiar.