HAKEREK-NAʼIN ida naran Henry David Thoreau neʼebé moris besik tinan atus rua liubá, hakerek liafuan tuirmai neʼe: “Rusa-alse mak kómiku no la jeitu atu haree. Tansá mak animál neʼe aas loos? Tansá iha ulun neʼebé naruk?” Loloos, laʼós nia deʼit mak hanoin hanesan neʼe. Ema barak hanoin katak rusa-alse mak animál neʼebé beik tanba haree la jeitu. Neʼe loos ka lae? Matenek-naʼin sira iha Amérika Norte no Eurásia hetan informasaun barak kona-ba animál úniku neʼe.

Rusa-alse mak animál neʼebé boot tebes. Maski animál neʼe iha ain neʼebé naruk no halo nia haree la jeitu, maibé ninia ain bele tebe lakon asu-fuik grupu ida. Rusa-alse bele aprende nani kedas lakleur depois liutiha loron neʼebé nia moris mai. Sira bele nani ba kilómetru barak no bele luku toʼo metru 6 atu bele han ai-horis iha bee laran.

Rusa-alse bele book nia matan hodi haree buat neʼebé iha kotuk maski la fila nia oin. Ninia inus mós kapás loos. Matenek-naʼin sira hatete katak tanba rusa-alse nia inus-kuak dook malu, ida-neʼe ajuda sira atu hatene didiʼak buat neʼebé sira horon iha neʼebé loos. No buat furak ida tan mak rusa-alse bele rona ho didiʼak. Ninia tilun bele book an bá-mai, no bele sente lian husi rusa-alse seluk maski neʼe dook kilómetru tolu.

Hakerek-naʼin ida dehan kona-ba rusa-alse nia oan nuʼudar “animál neʼebé jeitu loos”. Rusa-alse nia oan hakarak hatene  buat oioin no la hanoin demais kona-ba buat ida. Sira-nia inan proteje sira hodi hatudu laran-diʼak no tau matan ba sira ho laran-metin. Sira-nia inan sei ataka buat naran deʼit neʼebé atu han ninia oan, neʼe inklui asu-fuik, ursu, no mós ema. Ikusliu kuandu rusa oan neʼe tinan ida ona no ninia inan kabuk fali, ninia inan sei sai siʼak loos hodi duni sees nia oan, atu nuneʼe oan neʼe bele tau matan ba ninia an rasik.

Tanba rusa-alse han deʼit ai-horis, oinsá mak sira bele moris iha tempu neʼebé malirin loos? Ida-neʼe tanba durante tempu manas sira han barak. Rusa-alse bele han toʼo kilograma 23 loron-loron. Sira han ai-horis neʼebé moris metru tolu husi rai ka iha bee okos. Ai-han neʼebé sira han tama iha sira-nia kabun neʼebé iha parte haat, no prosesu neʼe hasai enerjia neʼebé importante no aumenta bokur. Maibé, rusa-alse mós hasoru perigu kuandu tempu malirin.

Tempu neʼebé malirin loos no iha jelu mak perigu tebes ba rusa-alse. Iha tempu malirin rusa-alse ladún laʼo bá-mai, hodi nuneʼe bele rai enerjia iha ninia fulun nia laran atu nafatin sai manas. Atu halai sees husi asu-fuik iha tempu jelu mak susar tebes, maibé buat neʼebé perigu liu ba rusa-alse mak ema, liuliu kasadór sira no ema neʼebé kaer karreta.

Rusa-alse gosta tebes han masin neʼebé ema tau iha dalan atu halo jelu nabeen. Maski nuneʼe, tanba rusa-alse nia fulun mak metan no kuandu rai nakukun rusa neʼe sempre atu korta dalan, entaun susar ba xofér sira atu haree hodi la xoke sira. Ema no mós rusa-alse mate tanba asidente sira hanesan neʼe.

Rusa-alse dala barak halimar hodi halai hasoru laloran tasi no sente kontente loos atu hariis iha bee neʼebé manas. Rusa-alse aman no rusa-alse inan maus ba malu kuandu sira atu halo oan, no rusa-alse inan tau matan didiʼak ba ninia oan. Kuandu ema ida hakiak rusa-alse nia oan, rusa neʼe dala ruma sente katak nia naʼin neʼe mak hanesan nia inan. Doutór Valerius Geist hatete: “Animál kómiku no oin-aat neʼe bele hatudu matenek, domin, no laran-metin.”

Maibé presiza kuidadu: Rusa-alse iha forsa boot. Se ita hasoru rusa neʼe iha ai-laran, diʼak atu la besik liu ba rusa-alse neʼe. Ida-neʼe importante liuliu se rusa neʼe hamutuk ho ninia oan. Maski ita hamriik dook husi nia, maibé ita sei kontente nafatin hodi hateke ba animál jigante neʼe.