BÍBLIA NIA MATADALAN: “Ema beik hasai ninia laran-hirus hotu, maibé ema neʼebé matenek halo nia an kalma nafatin.”—Provérbios (Amsal) 29:11.

OINSÁ MAK HAHALOK NEʼE LORI DIʼAK BA ITA? Se ita hakerek lista kona-ba buat diʼak neʼebé ita bele hetan, lista neʼe sei sai naruk loos! Maibé buat diʼak ida mak kona-ba ita-nia saúde. Bíblia hatete: “Fuan neʼebé kalma mak fó moris ba isin [ka, fó isin-diʼak].” “Laran neʼebé haksolok mak ai-moruk neʼebé diʼak.” (Provérbios [Amsal] 14:30; 17:22) Doutór sira dehan, fasil ba ema neʼebé nervozu lalais kona moras oioin, liuliu moras-fuan. Maibé, se ita kontrola an, ida-neʼe bele halo ita-nia saúde diʼak no lori buat diʼak barak liután.

Mane ida naran Cassius, neʼebé agora ho tinan 30 resin, hatete: “Uluk haʼu mak ema nervozu aat, raan saʼe lalais, no gosta provoka situasaun naran deʼit. Hahalok hanesan neʼe halo haʼu sente folin-laek. Maibé haʼu komesa halo tuir Bíblia nia matadalan no troka haʼu-nia hahalok. Haʼu aprende oinsá atu kontrola an, haraik-an, no prontu atu fó perdua. Se haʼu seidauk troka haʼu-nia hahalok karik, ohin loron haʼu iha komarka laran. Tuir loloos, haʼu sente haʼu-nia moris uluk nian mate ona, no agora haʼu haksolok ho moris foun neʼe!”