INFORMASAUN IHA OIN | KETA RENDE AN MASKI HASORU SUSAR
Susar: Serbisu barak demais
ITA-NIA moris loroloron mak, tenke tau matan ba Ita-nia kaben, oan sira no inan-aman neʼebé idade ona. Iha serbisu-fatin, patraun mós fó tan serbisu barak ba Ita. Uluk Ita la hanoin katak moris sei sai susar hanesan neʼe. Karik neʼe halo Ita sente dada iis ladiʼak, no hanoin: ‘Haʼu bele halo saida? Moris mak neʼe!’ Se hanesan neʼe, saida mak Ita bele halo?
EZEMPLU HUSI BÍBLIA: PROFETA MOISÉS
Ba tempu balu, Moisés deʼit mak sai tesi-lia naʼin ba povu Izraél tomak. Moisés hakaʼas an halo knaar neʼe ho laran, maibé ninia banin-mane hatete ba nia: “Buat neʼebé ó halo neʼe la diʼak. Ó sei kole duni.” Nia dehan: ‘Ó tenke hili mane balu atu tesi lia ba kazu kiʼik sira, no kona-ba kazu neʼebé boot, sira tenke lori ba ó. Se ó halo ida-neʼe, ó bele halo serbisu boot neʼe, no ema hotu sei fila ba uma ho kontente.’—Êxodo (Keluaran) 18:17-23.
SAIDA MAK DELINA HALO?
Delina neʼebé temi ona iha pájina 3, hetan moras ida neʼebé susar atu kura, maibé nia mós tenke tau matan ba ninia maun naʼin-tolu neʼebé aleijadu. Nia dehan: “Haʼu koko atu la hanoin barak kona-ba aban ka bainrua, no haʼu la dada tempu atu halo kedas buat neʼebé haʼu tenke halo, tan neʼe haʼu la sente estrese demais. Haʼu mós koʼalia sai haʼu-nia situasaun ba haʼu-nia la’en no ema seluk, no sira ajuda haʼu. Liután neʼe, dadeer-dadeer, haʼu gosta tau matan ba jardín. Neʼe halo haʼu kontente.”
“Kona-ba buat hotu-hotu iha ninia tempu neʼebé loos.”—Eclesiastes (Pengkhotbah) 3:1
SAIDA MAK ITA BELE HALO?
Se Ita sente estrese tanba halo serbisu barak demais, koko toʼok atu halo buat sira tuirmai neʼe:
-
Hanoin kona-ba buat balu neʼebé ema seluk bele halo atu ajuda Ita sente kmaan. Porezemplu, Ita-nia oan sira bele ajuda halo serbisu iha uma-laran ka lae? Iha família ka kolega neʼebé bele ajuda Ita ka lae?
-
Fó-hatene Ita-nia situasaun ba ema seluk. Porezemplu, se iha serbisu-fatin Ita-nia serbisu mak barak demais, fó-hatene ba patraun. Neʼe laʼós katak Ita ameasa nia atu husik ona serbisu, maibé Ita hakarak fó-hatene deʼit todan neʼebé Ita sente. Karik patraun sei hamenus Ita-nia serbisu.
-
Halo lista ba serbisu hotu neʼebé Ita tenke halo iha semana ida nia laran. Tuirmai, hanoin toʼok oinsá atu fahe serbisu balu ba ema seluk.
-
Se ema ruma konvida Ita atu ransu malu, tetu didiʼak lai. Se Ita-nia tempu ka forsa la iha, keta moe atu hatete: “Haʼu la bele.”
Keta haluha: Se ita koko atu halo buat barak demais, ikusmai ita sei sente kole no la bele tan halo buat ida.
Karik Ita sei gosta
MATAN-MORIS BÁ!
