1-3. (a) Karik Salmo 147 hakerek iha tempu saida? (b) Ita bele aprende saida husi Salmo 147?

BAINHIRA ema ida halo buat neʼebé diʼak, baibain ita gaba nia. Sá tan ho Maromak Jeová, ita hakarak gaba hodi fó hahiʼi ba nia! Ita hahiʼi nia kona-ba ninia forsa boot neʼebé ita haree husi ninia kriasaun. Ita mós hahiʼi nia kona-ba ninia domin neʼebé nia hatudu mai ita liuhusi ninia Oan-Mane mesak nia sakrifísiu.

² Ema neʼebé hakerek Salmo 147 hakarak tebes atu fó hahiʼi ba Jeová. Nia mós fó laran-manas ba ema seluk atu fó hahiʼi ba Maromak hamutuk ho nia.—Lee Salmo (Mazmur) 147:1, 7, 12. *

³ Ita la hatene sé mak hakerek Salmo 147. Maibé karik ema neʼe moris iha tempu neʼebé Jeová halo ema Izraél sira livre husi Babilónia hodi fila fali ba Jeruzalein. (Salmo [Mazmur] 147:2) Ema neʼebé hakerek salmo neʼe hahiʼi Jeová tanba Jeová nia povu iha oportunidade atu adora fali Jeová iha sira-nia rai rasik. Ema neʼebé hakerek salmo neʼe mós esplika razaun seluk tan tanbasá  mak nia hakarak fó hahiʼi ba Jeová. Razaun sira-neʼe mak saida? No tanba razaun saida mak Ita “fó hahiʼi ba Jah!”? *—Salmo (Mazmur) 147:1.

4. Bainhira Liurai Ciro halo ema Izraél livre, sira sente oinsá, no tanbasá?

⁴ Hanoin toʼok ema Izraél nia situasaun nuʼudar dadur iha Babilónia. Ema goza sira dehan: “Kanta knananuk Siaun nian ida ba ami.” Maibé ema judeu sira la iha vontade atu kanta, tanba Jeruzalein neʼebé lori ksolok ba sira harahun tiha ona. (Salmo [Mazmur] 137:1-3, 6) Sira-nia laran kanek tebes no presiza atu hetan fali kmaan. Maibé Jeová fó duni ajuda ba sira hanesan ninia Liafuan fó-hatene nanis ona. Oinsá? Bainhira Liurai Ciro husi rai-Pérsia manán tiha sidade Babilónia, nia hatete katak: “Nia [Jeová] haruka haʼu atu harii uma ida ba nia iha Jeruzalein.” Ciro mós hatete ba ema Izraél sira: “Imi hotu neʼebé nuʼudar ninia povu, haʼu hein katak Jeová imi-nia Maromak sei hamutuk ho imi, no imi tenke saʼe bá Jeruzalein.” (2 Crônicas [Tawarikh] 36:23) Liafuan sira-neʼe fó kmaan tebes ba ema Izraél neʼebé iha hela Babilónia!

5. Ema neʼebé hakerek salmo hatete saida kona-ba Jeová nia forsa atu kura ita?

⁵ Jeová fó kmaan ba nasaun Izraél no mós ba ema Izraél ida-idak. Ohin loron, Jeová mós fó kmaan ba ita iha dalan neʼebé hanesan. Ema neʼebé hakerek salmo dehan katak Maromak “kura ema neʼebé laran-kanek; nia falun sira-nia kanek”. (Salmo [Mazmur] 147:3) Bainhira ita moras ka laran-tun, ita bele fiar katak Jeová sei tau matan ba ita. Jeová hakarak tebes atu fó kmaan no kura ita-nia laran-kanek. (Salmo [Mazmur] 34:18; Isaías [Yesaya] 57:15) Nia fó matenek no forsa ba ita atu ita bele tahan hasoru problema naran deʼit.—Tiago 1:5.

6. Ita bele aprende saida husi Salmo 147:4? (Haree dezeñu iha pájina 17.)

⁶ Tuirmai ema neʼebé hakerek salmo hateke ba lalehan no hatete katak Jeová “sura fitun sira” no “bolu sira hotu tuir ida-idak nia naran”. (Salmo [Mazmur] 147:4) Ema neʼebé hakerek salmo bele haree ba fitun sira, maibé nia la hatene fitun sira-neʼe iha hira. Ohin loron, sientista sira hatene katak iha universu laran iha fitun biliaun ba biliaun! Ema la bele sura fitun sira-neʼe hotu, maibé Kriadór bele. Laʼós neʼe deʼit, nia mós hatene fitun ida-idak toʼo fó naran ba sira hotu. (1 Korinto 15:41) Maromak neʼebé hatene fitun ida-idak mós hatene kona-ba Ita. Nia sempre hatene Ita iha fatin neʼebé, Ita sente oinsá, no Ita presiza saida!

7, 8. (a) Jeová hatene saida kona-ba ita? (b) Fó toʼok ezemplu ida kona-ba oinsá Jeová komprende ema nia sentimentu.

⁷ Jeová hatene Ita hasoru daudauk problema saida, no nia iha forsa atu ajuda Ita. (Lee Salmo [Mazmur] 147:5. *) Karik Ita sente katak situasaun neʼebé Ita hasoru daudauk mak susar tebes no Ita la bele tahan ho situasaun neʼe. Maromak hatene ita-nia kbiit toʼo iha neʼebé, no “nia hanoin-hetan katak ita mak rai-rahun”. (Salmo [Mazmur] 103:14) Ita la perfeitu, tan neʼe mak ita sempre halo sala neʼebé hanesan, no neʼe bele halo ita laran-tun. Dala ruma ita arrepende tebes kona-ba liafuan sira neʼebé ita hasai, ita-nia hakarak neʼebé aat, ka laran-moras ba ema seluk. Maski Jeová la iha fraku hanesan neʼe, maibé nia komprende tebes kona-ba ita-nia sentimentu.—Isaías (Yesaya) 40:28.

⁸ Ita rasik sente ona oinsá Jeová uza ninia forsa neʼebé boot hodi ajuda Ita tahan  hasoru koko ruma ka lae? (Isaías [Yesaya] 41:10, 13) Irmán pioneiru ida naran Kyoko esperiénsia ona kona-ba neʼe. Bainhira nia muda ba fatin seluk atu komesa ninia knaar foun, nia hasoru problema ruma neʼebé halo nia sente laran-tun tebes. Maibé oinsá mak Kyoko hatene katak Jeová komprende kona-ba problema neʼebé nia hasoru? Iha ninia kongregasaun foun, nia bele haree katak ema barak iha neʼebá komprende ninia sentimentu. Neʼe halo nia sente hanesan Jeová hatete ba nia: “Haʼu hadomi ó, laʼós tan deʼit ó mak pioneiru ida, maibé tanba ó mós haʼu-nia oan-feto neʼebé dedika an ona ba haʼu. Haʼu hakarak ó atu iha moris neʼebé kontente nuʼudar haʼu-nia Testemuña ida!” Oinsá mak Jeová hatudu ona ba Ita rasik katak nia komprende kona-ba Ita?

9, 10. Buat importante liu hotu neʼebé Jeová fó atu ajuda ita mak saida? Fó toʼok ezemplu ida.

⁹ Ita hotu presiza hahán, roupa, no hela-fatin. Dala ruma karik ita bele hanoin barak kona-ba ita-nia hahán latoʼo. Maibé Jeová halo rai neʼe iha dalan neʼebé bele fó ai-han ba moris hotu, inklui mós “manu-metan nia oan sira neʼebé hakilar buka hahán”. (Lee Salmo [Mazmur] 147:8, 9. *) Se Jeová fó han ba manu-metan sira, ita mós bele fiar katak nia sei fó buat neʼebé ita presiza.—Salmo (Mazmur) 37:25.

¹⁰ Importante liu mak Jeová fó ba ita buat neʼebé bele hametin ita-nia fiar, no nia mós fó ninia “dame neʼebé aas liu ema nia hanoin hotu”. (Filipe 4:6, 7) Mutsuo ho ninia feen haree duni oinsá Jeová ajuda sira. Bainhira tsunami akontese iha rai-Japaun iha tinan 2011, sira besik atu lakon sira-nia moris no sira hakaʼas an saʼe ba uma leten. Sira-nia sasán barak lakon. Iha kalan neʼebé nakukun, sira toba deʼit iha kuartu neʼebé malirin tebes. Loron tuirmai, sira koko atu buka buat ruma hodi fó laran-manas ba sira. Sira hetan deʼit livru tinan nian ba 2006. Mutsuo loke livru neʼe no haree títulu “Tsunami boot liu neʼebé uluk nunka akontese.” Informasaun sira-neʼe koʼalia kona-ba rai-nakdoko neʼebé akontese iha Sumatra iha tinan 2004 neʼebé hamosu tsunami boot. Mutsuo ho ninia feen tanis bainhira sira lee kona-ba oinsá Jeová tau matan ba irmaun-irmán sira iha neʼebá. Sira naʼin-rua sente katak Jeová mak fó daudauk kmaan ba sira iha tempu neʼebá. Jeová mós tau matan ba sira kona-ba buat seluk tan. Irmaun-irmán sira husi fatin oioin iha Japaun haruka hahán no roupa ba sira. Maibé buat neʼebé hametin tebes sira mak irmaun reprezentante sira husi Maromak nia organizasaun bá vizita sira iha neʼebá. Mutsuo dehan: “Haʼu sente katak Jeová mak iha ami ida-idak nia sorin hodi tau matan ba ami. Neʼe fó kmaan tebes ba ami!” Sin, buat importante neʼebé Jeová halo mak tau matan ba ita-nia presiza espirituál nian, maibé nia mós sei fó buat seluk neʼebé ita presiza.

11. Ita presiza halo saida hodi bele simu ajuda husi Maromak?

¹¹ Jeová “foti saʼe ema laran-maus”. Nia hadomi ita no sempre prontu atu fó ajuda ba ita. (Salmo [Mazmur] 147:6a) Oinsá mak ita bele simu ajuda husi nia? Ita presiza iha relasaun neʼebé metin ho nia, no atu bele iha relasaun neʼebé diʼak ho nia, ita presiza hatudu laran-maus. (Sofonias [Zefanya] 2:3) Ema neʼebé laran-maus hein ba Jeová mak atu lori justisa no halakon susar no terus hotu. Jeová simu ema hanesan neʼe.

12, 13. (a) Ita tenke hasees an husi saida atu bele simu Jeová nia ajuda? (b) Jeová kontente deʼit ho sé?

 ¹² Maibé Jeová sei “soe tun ema aat ba rai”. (Salmo [Mazmur] 147:6b) Ita lakohi Maromak atu halo nuneʼe ba ita maibé hakarak nia atu hatudu domin neʼebé laran-metin. Tan neʼe mak ita tenke odi buat neʼebé nia odi. (Salmo [Mazmur] 97:10) Porezemplu, ita tenke hakribi sala-foʼer seksuál nian. Neʼe katak ita tenke hasees an husi buat hotu neʼebé bele book ita atu halo hahalok aat sira-neʼe, inklui mós pornografia. (Salmo [Mazmur] 119:37; Mateus 5:28) Maski presiza luta makaʼas hasoru buat sira-neʼe, maibé ita-nia hakaʼas-an la sai saugati deʼit tanba Jeová sei fó bensaun ba ita.

¹³ Ita la iha kbiit atu luta mesak deʼit. Ita presiza sadere ba Jeová. Maromak Jeová sente kontente ka lae se ita mak sadere deʼit ba buat neʼebé ema tau fiar? Lae, Jeová “la haksolok ho kuda nia kbiit”. Oinsá se ita sadere ba ita-nia an ka ba ema seluk? Jeová mós “la gaba mane nia ain neʼebé iha forsa”. (Salmo [Mazmur] 147:10) Ita presiza duni atu halo orasaun beibeik ba Jeová hodi husu ninia ajuda no husu makaʼas ba nia atu salva ita husi ita-nia fraku sira. Jeová nunka sai kole atu rona ba ita-nia orasaun sira-neʼe. “Jeová kontente ho ema sira neʼebé taʼuk ba nia, no kontente ho sira neʼebé hein ba ninia domin neʼebé laran-metin.” (Salmo [Mazmur] 147:11) Tanba Jeová mak Maromak neʼebé laran-metin no nia hadomi ita, tan neʼe ita bele fiar katak nia sei ajuda beibeik ita atu luta manán hasoru ita-nia hakarak sira neʼebé sala.

14. Ema neʼebé hakerek salmo fiar kona-ba saida?

¹⁴ Jeová promete katak se ita iha problema, nia sei ajuda ita. Bainhira ema Izraél sira fila fali ba Jeruzalein, ema neʼebé hakerek salmo hanoin kona-ba oinsá Jeová fó ajuda ba sira hodi dehan: “Nia halo metin ai-loos neʼebé uza atu xave ó-nia sidade nia portaun sira; nia haraik bensaun ba ó-nia oan-mane sira iha ó-nia leet. Nia lori dame ba ó-nia rai.” (Salmo [Mazmur] 147:13, 14) Tanba Jeová dehan katak nia sei hametin sidade nia portaun sira, neʼe halo ema neʼebé hakerek salmo sente seguru. Neʼe fó fiar ba nia katak Jeová sei proteje ninia povu.

15-17. (a) Dala ruma ita bele sente oinsá kona-ba ita-nia problema sira, maibé oinsá mak Jeová uza ninia Liafuan hodi ajuda ita? (b) Fó toʼok ezemplu ida neʼebé hatudu katak Maromak nia Liafuan “halai lalais” atu ajuda ita.

¹⁵ Karik ita sente laran-taridu tanba ita hasoru hela problema oioin, maibé Jeová bele fó matenek ba ita atu tahan. Ema neʼebé hakerek salmo hatete katak Maromak “haruka ninia mandamentu ba rai; ninia liafuan hanesan atan neʼebé halai lalais”. Nia mós temi kona-ba jelu-rahun ho udan jelu-fatuk no nia husu: “Sé mak bele tahan malirin neʼe?” Tuirmai nia dehan katak Jeová “fó sai ninia liafuan, no jelu nabeen tiha”. (Salmo [Mazmur] 147:15-18) Ita-nia Maromak neʼebé hatene buat hotu, bele halo buat hotu, bele kontrola udan jelu-fatuk no jelu-rahun, nia mós bele ajuda Ita atu luta manán hasoru problema naran deʼit.

¹⁶ Ohin loron, Jeová dirije ita liuhusi ninia Liafuan Bíblia. Ema neʼebé hakerek salmo dehan katak Jeová nia liafuan “halai lalais” atu fó ajuda ba ita. Maromak dirije ita iha dalan neʼebé loos no iha tempu neʼebé loos. Hanoin toʼok kona-ba ajuda sira neʼebé Ita hetan husi Bíblia, livru sira husi “atan laran-metin no matenek”, JW Broadcasting, jw.org, katuas kongregasaun, no irmaun-irmán sira. (Mateus 24:45) Ita rasik haree ona iha Ita-nia moris oinsá Jeová lalais fó matadalan ba Ita ka lae?

¹⁷ Simona esperiénsia ona oinsá Maromak nia Liafuan ajuda nia. Uluk nia sente ninia an la iha folin no nia hanoin katak  Jeová la kontente ho nia. Maibé iha tempu neʼebé nia sente laran-tun, nia halo orasaun beibeik ba Jeová hodi husu Jeová ajuda nia. Nia mós estuda beibeik Bíblia. Simona dehan: “La iha tempu ida mak haʼu la sente katak Jeová la fó forsa no matadalan ba haʼu.” Neʼe ajuda duni nia atu iha hanoin neʼebé pozitivu.

18. Tanbasá mak Ita sente katak Jeová besik ba Ita, no Ita iha razaun saida deʼit atu “fó hahiʼi ba Jah!”?

¹⁸ Ema neʼebé hakerek salmo hatene katak, husi nasaun hotu iha mundu, Jeová hili deʼit nasaun Izraél antigu hodi sai ninia povu. Sira mak nasaun neʼebé simu ona Maromak nia “liafuan” ho “ukun-fuan no desizaun” sira. (Lee Salmo [Mazmur] 147:19, 20. *) Ohin loron, ita iha priviléjiu boot atu lori Maromak nia naran. Ita agradese tebes tanba ita hatene nia, ita iha ninia Liafuan atu dirije ita, no bele iha relasaun neʼebé besik ho nia. Hanesan ho ema neʼebé hakerek Salmo 147, Ita mós iha razaun barak atu “fó hahiʼi ba Jah!” no anima ema seluk atu fó hahiʼi ba nia.