1, 2. Ita ida-idak presiza halo saida? (Haree dezeñu iha leten.)

HANESAN ita koʼalia ona iha lisaun uluk, Diabu hatete katak Jeová la merese atu ukun ema. Nia dehan katak Jeová ukun iha dalan neʼebé la justisa no ema sei sai kontente liu se sira mak ukun rasik an. Satanás koʼalia liafuan neʼebé loos ka lae? Hanoin toʼok se ema neʼebé hili atu ukun rasik an bele moris ba nafatin, sira bele moris kontente haketak an husi Maromak nia ukun ka lae? Oinsá ho Ita? Ita sei sente kontente liu ka lae?

² Ema ida la bele hatán pergunta sira-neʼe ba Ita. Ita ida-idak mak presiza hanoin didiʼak kona-ba pergunta sira-neʼe. Bainhira ita halo nuneʼe, ita rasik sei haree katak dalan neʼebé Jeová ukun mak diʼak liu hotu no nia merese duni atu hetan apoiu husi ita. Mai ita haree toʼok razaun importante balu husi Bíblia neʼebé hatudu katak Jeová deʼit mak iha kbiit atu ukun lalehan no rai no dalan neʼebé nia ukun mak diʼak liu hotu.

3. Tanbasá Jeová deʼit mak iha direitu atu ukun?

³ Jeová deʼit mak iha direitu atu ukun tanba nia mak Maromak neʼebé aas liu hotu no Kriadór. (1 Crônicas [Tawarikh] 29:11; Apóstolu 4:24) Iha vizaun ida, Kristu nia maluk ukun-naʼin 144.000 iha lalehan dehan: “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.” (Apokalipse 4:11) Loos duni, tanba Jeová mak kria buat hotu,  tan neʼe nia deʼit mak iha direitu atu ukun kriatura hotu iha lalehan no rai.

4. Maski ita iha liberdade, tanbasá mak neʼe la fó direitu ba ita atu kontra hasoru Maromak?

⁴ Satanás nunka kria buat ida. Tan neʼe nia la iha direitu atu ukun lalehan no rai. Hodi nuneʼe mak bainhira nia, Adão ho Eva kontra Jeová nia direitu atu ukun, sira hatudu katak sira iha hahalok neʼebé foti-an. (Jeremias [Yeremia] 10:23) Maski sira iha liberdade, maibé neʼe fó direitu ba sira atu kontra Jeová nia ukun ka lae? Lae, tanba liberdade fó direitu ba kriatura sira atu hili no halo desizaun, maibé la fó direitu ba sira atu kontra hasoru Kriadór Jeová. Tan neʼe mak kontra hasoru Maromak hatudu katak sira uza sala sira-nia liberdade. Nuʼudar ema, ita presiza duni Jeová nia ukun no matadalan.

5. Tanbasá mak desizaun sira neʼebé Maromak halo sempre tuir justisa?

⁵ Razaun ida tan neʼebé hatudu katak Jeová iha direitu atu ukun mak, nia uza ninia podér iha dalan neʼebé justu liu hotu. Jeová dehan: “Haʼu mak Jeová, Ida neʼebé hatudu domin neʼebé laran-metin, justisa, no hahalok loos iha rai, tanba haʼu haksolok ho buat hirak-neʼe.” (Jeremias [Yeremia] 9:24) Jeová la presiza uza ema nia lei atu ajuda nia halo buat neʼebé loos, tanba nia mak hahalok loos nia hun. No nia halo ukun-fuan ba ema bazeia husi ninia justisa neʼebé loos. Ema neʼebé hakerek salmu dehan: “Hahalok loos no justisa mak hun ba [ninia] kadunan.” Tan neʼe mak ukun-fuan, prinsípiu, ka desizaun naran deʼit neʼebé mai husi Jeová sempre loos. (Salmo [Mazmur] 89:14; 119:128) Satanás hatete katak Jeová laʼós Ukun-Naʼin neʼebé justu, maibé Satanás rasik deʼit nunka lori justisa ba mundu neʼe.

6. Tanba razaun saida tan mak hatudu katak Jeová deʼit mak iha direitu atu ukun mundu neʼe?

⁶ Razaun seluk tan neʼebé hatudu katak Jeová iha direitu atu ukun mak, tanba nia iha koñesimentu no matenek kona-ba oinsá atu tau matan ba lalehan no rai. Ezemplu ida mak kona-ba oinsá nia fó kbiit ba ninia Oan-Mane atu kura moras oioin neʼebé ema nia doutór la bele kura. (Mateus 4:23, 24; Marcos 5:25-29) Maski ba ita neʼe mak milagre ida, maibé ba Jeová neʼe laʼós milagre. Tanba nia komprende kona-ba ema nia isin-lolon hotu no nia bele hadiʼa fali parte neʼebé aat ona. Nia mós bele halo ema neʼebé mate moris fali, no nia bele hapara dezastre sira hodi la bele akontese.

7. Tanbasá mak Jeová matenek liu ema hotu husi Satanás nia mundu neʼe?

⁷ Mundu neʼebé Satanás ukun daudauk la bele lori dame ba nasaun ida ka dame entre nasaun sira. Só liuhusi Jeová nia matenek deʼit mak bele lori dame ba mundu tomak. (Isaías [Yesaya] 2:3, 4; 54:13) Tan neʼe mak apóstolu Paulo hatete: “Oh, bensaun husi Maromak mak barak tebes! Ninia matenek no komprende mak kleʼan tebes! Ita-nia hanoin la toʼo atu komprende kona-ba ninia tesi-lia no ita la bele hatene ninia dalan hotu!”​—Roma 11:33.

8. Ita sente oinsá kona-ba dalan neʼebé Jeová ukun?

⁸ Ita haree ona tanbasá Jeová mak iha direitu atu ukun. Maibé Bíblia mós hatudu katak nia mak Ukun-Naʼin neʼebé diʼak liu hotu. Razaun ida mak tanba nia ukun ho domin. Bainhira ita hanoin kona-ba ninia hahalok hanesan “laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos”, neʼe halo ita hakarak hakbesik ba nia. (Êxodo [Keluaran] 34:6) Maromak hatudu dignidade no respeitu ba ita. Nia tau matan ba ita diʼak liu fali ita rasik tau matan ba ita-nia an. Diabu hatete katak Jeová la fó buat diʼak ba ninia atan, maibé neʼe bosok. Tanba Maromak fó ona ninia Oan-Mane  doben ba ita hodi ita bele iha esperansa atu moris ba nafatin.​—Lee Salmo (Mazmur) 84:11; * Roma 8:32.

9. Oinsá mak ita hatene katak Maromak iha interese ba ita ida-idak?

⁹ Jeová hadomi ninia atan hotu nuʼudar grupu. Maibé nia mós iha interese ba ema ida-idak. Hanoin toʼok buat neʼebé akontese iha tempu antigu. Maizumenus ba tinan atus tolu nia laran, Jeová uza juis sira mak dirije ninia nasaun no halo sira manán funu hasoru inimigu sira. Iha tempu sira-neʼe Jeová mós tau matan ba ema ida-idak. Ezemplu ida mak kona-ba feto ida naran Rute, nia laʼós ema Izraél, maibé nia husik buat barak hodi serbí Jeová. Tan neʼe Jeová fó bensaun ba nia hodi hetan laʼen ida no mós oan-mane ida. Laʼós neʼe deʼit, ninia oan-mane neʼe ikusmai sai liña jerasaun ba Mesias. Jeová mós rai Rute nia istória sira iha livru ida husi Bíblia neʼebé uza Rute nia naran rasik. Hanoin toʼok Rute sei sente oinsá bainhira nia hetan fali moris-hiʼas no haree buat sira-neʼe hotu?​—Rute 4:13; Mateus 1:5, 16.

10. Tanbasá mak ita hatene katak Jeová nunka ukun iha dalan neʼebé siʼak?

¹⁰ Jeová nunka ukun iha dalan neʼebé siʼak. Kriatura sira neʼebé halo tuir nia sempre sente livre no haksolok. (2 Korinto 3:17) David dehan: “Dignidade no kmanek mak iha ninia oin; kbiit no ksolok mak iha ninia hela-fatin.” (1 Crônicas [Tawarikh] 16:7, 27) Hanesan neʼe mós ho ema neʼebé hakerek salmu naran Etan hatete: “Ksolok ba povu neʼebé hahiʼi Ita ho lian kontente nian. Oh Jeová, sira laʼo iha naroman neʼebé sai husi Ita-nia oin. Loron tomak sira haksolok tanba Ita-nia naran, no sira hetan hahiʼi tanba Ita-nia hahalok loos.”​—Salmo (Mazmur) 89:15, 16.

11. Oinsá mak ita bele hametin liután ita-nia fiar katak dalan neʼebé Jeová ukun mak diʼak liu hotu?

¹¹ Se ita mak hanoin kleʼan liután kona-ba Jeová nia hahalok diʼak, neʼe sei hametin liután ita-nia fiar katak dalan neʼebé Jeová ukun mak diʼak liu hotu. Ema neʼebé hakerek salmu dehan: “Loron ida iha Ita-nia pátiu mak diʼak liu fali loron rihun ida iha fatin seluk!” (Salmo [Mazmur] 84:10) Jeová mak kria ita, tan neʼe nia hatene saida mak bele halo ita kontente. Ho laran-diʼak nia fó buat oioin ba ita. Buat naran deʼit neʼebé nia husu ita atu halo sempre lori diʼak ba ita, maski ita presiza halo sakrifísiu oioin atu halo tuir nia.​—Lee Isaías (Yesaya) 48:17. *

12. Tanba razaun importante liu saida mak ita hakarak apoia Jeová nia direitu atu ukun?

¹² Bíblia hatete katak bainhira Kristu nia ukun ba tinan rihun ida liu tiha, ema balu sei kontra hasoru Jeová nia direitu atu ukun. (Apokalipse 20:7, 8) Saida mak book sira atu halo nuneʼe? Iha tempu neʼebá, Diabu sei book ema atu hatudu hahalok neʼebé hanoin an deʼit, hanesan nia halo ona iha tempu uluk no mós ohin loron. Karik nia sei halo ema fiar katak sira bele moris ba nafatin maski la halo tuir Jeová. Maibé ita hatene katak neʼe la loos. Tan neʼe husu ba ita-nia an, ‘Haʼu sei fiar ba lia-bosok hanesan neʼe ka lae?’ Se ita mak hadomi tebes Jeová no fiar metin katak nia mak diʼak no iha direitu atu ukun lalehan no rai, ita hakribi se ita rona lia-bosok hanesan neʼe. Ita hakarak apoia deʼit Jeová nia direitu atu ukun tanba nia ukun ho domin.

13. Oinsá mak ita hatudu katak ita apoia Jeová nia direitu atu ukun?

¹³ Ita aprende ona katak Jeová mak iha direitu atu ukun, no dalan neʼebé nia ukun mak diʼak liu hotu. Ninia direitu atu ukun merese duni atu hetan apoiu husi ita. Ita bele hatudu ita-nia apoiu liuhusi laran-metin no banati-tuir nia. Se ita mak hakaʼas an atu halo tuir Jeová nia hahalok sira, ita hatudu katak ita hadomi nia no apoia ninia dalan atu ukun.​—Lee Éfeso 5:1, 2.

14. Oinsá mak família nia ulun ho katuas sira bele banati-tuir Jeová?

¹⁴ Ita aprende husi Bíblia katak Jeová sempre uza ninia podér iha dalan neʼebé domin. Família nia ulun no katuas sira neʼebé hakruʼuk ba Jeová nia direitu atu ukun hakarak banati-tuir Jeová hodi la siʼak ka kontrola ema seluk. Apóstolu Paulo hakaʼas an hodi halo tuir duni Maromak no ninia Oan-Mane. (1 Korinto 11:1) Nia nunka hamoe ema ka obriga ema atu halo buat ruma. Maibé ho laran-diʼak, nia fó laran-manas ba ema seluk atu halo buat neʼebé loos. (Roma 12:1; Éfeso 4:1; Filemon 8-10) Neʼe mak dalan neʼebé Jeová trata ema ida-idak. Tan neʼe ita mós hakarak trata ema seluk iha dalan neʼebé domin hodi hatudu katak ita apoia Jeová nia direitu atu ukun.

15. Oinsá mak ita hatudu katak ita hakruʼuk ba dalan neʼebé Jeová ukun?

¹⁵ Ita mós fó apoiu ba Jeová nia ukun liuhusi serbisu hamutuk ho sira neʼebé Jeová uza atu reprezenta nia. Maski dala ruma ita la komprende ka la konkorda ho desizaun ruma neʼebé sira foti, maibé ita hakarak fó apoiu nafatin ba sira. Ida-neʼe la hanesan duni ho ema iha mundu neʼe nia hanoin, maibé neʼe mak dalan neʼebé ita hakruʼuk ba Jeová nuʼudar ita-nia Ukun-Naʼin. (Éfeso 5:22, 23; 6:1-3; Ebreu 13:17) No mós halo tuir Maromak sempre lori diʼak ba ita, tanba Maromak hanoin ita hotu.

16. Oinsá mak desizaun sira neʼebé ita halo bele hatudu katak ita apoia Maromak nia direitu atu ukun?

¹⁶ Ita mós bele fó apoiu ba Jeová nia direitu atu ukun liuhusi dalan neʼebé ita halo  desizaun. Jeová la fó ukun-fuan ida-idak kona-ba oinsá atu foti desizaun iha ita-nia moris, maibé nia fó duni matadalan balu ba ita oinsá atu hanoin, no neʼe bele ajuda ita atu hatene saida mak ita tenke halo. Porezemplu, Jeová la fó lista naruk ba ema kristaun kona-ba roupa saida mak sira bele ka la bele hatais. Maibé nia esplika deʼit katak tenke hatais iha dalan neʼebé hatudu respeitu no dignidade nuʼudar ninia Testemuña sira. (1 Timóteo 2:9,10) Nia hakarak ita atu hanoin kona-ba oinsá mak ita-nia desizaun sira mós bele kona ema seluk. (1 Korinto 10:31-33) Se ita mak halo desizaun tuir Jeová nia haree, ita hatudu katak ita hadomi nia no apoia dalan neʼebé nia ukun.

17, 18. Oinsá mak kaben-naʼin sira bele hatudu katak sira apoia Jeová nia direitu atu ukun?

¹⁷ Kaben-naʼin kristaun sira mós bele apoia Jeová nia direitu atu ukun. Dala ruma moris kaben nian la tuir buat neʼebé sira hakarak. Karik sira bele hasoru problema boot kona-ba moris kaben nian. Se nuneʼe, diʼak ba sira atu hanoin kona-ba oinsá Jeová trata nasaun Izraél iha tempu uluk. Jeová bolu ninia an nuʼudar nasaun Izraél nia laʼen. (Isaías [Yesaya] 54:5; 62:4) Dala barak nasaun neʼe halo Jeová laran-tun. Sira-nia relasaun ho Jeová mak hanesan moris kaben nian neʼebé hasoru susar. Maibé Jeová sempre hatudu pasiénsia ba sira. Nia fó perdua beibeik ba sira no kumpre ninia promesa ba sira.​—Lee Salmo (Mazmur) 106:43-45. *

¹⁸ Kaben-naʼin kristaun sira neʼebé hadomi Jeová hakarak halo tuir nia. Maski problema mosu iha sira-nia moris kaben nian, maibé sira la buka dalan atu hakotu relasaun ho sira-nia kaben. Sira hatene katak Jeová haree juramentu kaben nian mak hanesan buat neʼebé sériu no ninia hakarak mak feen ho laʼen hela hamutuk ba nafatin. Bíblia temi razaun ida deʼit hodi feen-laʼen bele soe malu no kaben fali ho ema seluk, neʼe mak halo sala seksuál ho ema seluk. (Mateus 19:5, 6, 9) Se ema kristaun mak hakaʼas an atu hadiʼa sira-nia moris kaben nian, neʼe hatudu katak sira apoia Jeová nia direitu atu ukun.

19. Se ita mak halo sala ruma, ita tenke halo saida?

¹⁹ Ita hotu la perfeitu no dala ruma ita bele halo buat neʼebé hakanek Jeová nia laran. Jeová hatene kona-ba neʼe, tan neʼe mak nia fó Kristu nia sakrifísiu ba ita. Hodi nuneʼe mak se ita halo sala ruma, ita tenke husu perdua husi Jeová. (1 João 2:1, 2) Duké sente triste beibeik kona-ba ita-nia sala, diʼak atu aprende husi sala neʼe. Ita hakarak hakbesik nafatin ba Jeová tanba nia sei fó perdua ba ita no ajuda ita hadiʼa fali ita-nia relasaun ho nia hodi kontinua serbí nia.​—Salmo (Mazmur) 103:3.

20. Tanbasá mak ita tenke apoia Jeová nia direitu atu ukun ohin loron?

²⁰ Iha mundu foun, ema hotu sei hakruʼuk ba Jeová nia ukun no aprende hahalok loos sira husi nia. (Isaías [Yesaya] 11:9) Maibé agora ita mós bele aprende buat barak kona-ba Jeová nia hanoin no oinsá mak nia hakarak ita atu moris. Lakleur tan, kriatura hotu sei la duvida tan katak Jeová mak iha direitu atu ukun. Tan neʼe, mai ita hotu hakaʼas an atu fó apoiu ba Jeová nia direitu atu ukun ohin loron liuhusi halo tuir nia, serbí nia ho laran-metin, no koko atu banati-tuir nia kona-ba buat hotu neʼebé ita halo.