Hatudu laran-diʼak ba ema estranjeiru
“Keta haluha atu hatudu laran-diʼak [ka, hadomi ema estranjeiru sira, nota-rodapé.]”—EBREU 13:2.
KNANANUK: 31, 50
1, 2. (a) Susar saida deʼit mak ema estranjeiru hasoru ohin loron? (Haree foto iha leten.) (b) Bíblia hakarak ita atu halo saida, no ita sei koʼalia kona-ba pergunta saida deʼit?
TINAN 30 liubá, Osei muda husi rai-Gana ba Europa. [1] (Haree nota husi lisaun.) Iha tempu neʼebá nia seidauk sai Testemuña ba Jeová. Nia dehan: “Haʼu sente ema barak la iha interese ba haʼu. Haʼu la toman ho klima iha neʼebá. Bainhira sai husi aeroportu, haʼu komesa tanis tanba haʼu nunka sente rai-malirin hanesan neʼe iha haʼu-nia moris tomak.” Iha tempu neʼebá, Osei foin atu aprende língua foun, tan neʼe iha tinan ida nia laran, susar tebes ba nia atu bele hetan serbisu. No mós tanba dook husi ninia rai, neʼe halo nia hanoin ninia família no hanoin ninia uma.
2 Hanoin toʼok se ita mak iha situasaun hanesan neʼe, ita hakarak ema trata ita oinsá? Ita bele fiar katak bainhira ita toʼo iha Reuniaun-Fatin ita gosta ema atu simu ita ho didiʼak maski ita mai husi rai seluk ka kultura la hanesan, loos ka lae? Tuir loloos, Bíblia haruka ita atu “hatudu laran-diʼak”, ka “hadomi ema estranjeiru sira”. (Ebreu 13:2, nota-rodapé.) Mai ita koʼalia kona-ba pergunta sira tuirmai neʼe: Oinsá mak Jeová haree ema estranjeiru sira? Ita presiza hadiʼa ita-nia hanoin kona-ba sira ka lae? Oinsá mak ita bele simu ema neʼebé mai husi rai seluk ho didiʼak?
OINSÁ MAK JEOVÁ HAREE EMA ESTRANJEIRU SIRA?
3, 4. Tuir Êxodo 23:9, oinsá mak Jeová hakarak ema Izraél trata ema estranjeiru, no tanbasá?
3 Bainhira Jeová lori ninia povu sai husi rai-Ejitu, nia fó ukun-fuan balu ba sira atu tau matan ba ema estranjeiru neʼebé tuir sira. (Êxodo [Keluaran] 12:38, 49; 22:21) Baibain la fasil ba ema estranjeiru atu moris iha rai seluk, tan neʼe mak Jeová tau matan ba sira. Porezemplu, ukun-fuan fó lisensa ba sira atu hili ai-han restu husi toʼos.—Levítico (Imamat) 19:9, 10.
4 Duké haruka deʼit ema Izraél atu hatudu respeitu ba ema estranjeiru, Jeová haruka sira atu hanoin ema estranjeiru nia sentimentu. (Lee Êxodo [Keluaran] 23:9. *) Sira “hatene ona ema estranjeiru nia moris”, tanba horiuluk kedas, ema Ejitu la gosta sira no ikusmai halo sira sai atan tanba sira mak ema neʼebé la hanesan ho ema Ejitu. (Gênesis [Kejadian] 43:32; 46:34; Êxodo [Keluaran] 1:11-14) Ema Izraél sira hatene duni ema estranjeiru nia susar. Jeová hakarak sira hanoin-hetan nafatin kona-ba neʼe hodi sira bele kontinua hatudu laran-diʼak ba ema estranjeiru neʼebé hela iha sira-nia leet.—Levítico (Imamat) 19:33, 34.
5. Oinsá mak ita bele banati-tuir Jeová atu hatudu laran-diʼak ba ema estranjeiru sira?
5 Jeová nunka troka. Tan neʼe, ita bele fiar katak ohin loron, nia hanoin nafatin kona-ba ema estranjeiru neʼebé muda mai ita-nia kongregasaun. (Deuteronômio [Ulangan] 10:17-19; Malaquias [Maleakhi] 3:5, 6) Se ita mak hanoin kona-ba susar sira neʼebé ema estranjeiru hasoru daudauk, hanesan diskriminasaun ka la komprende língua foun, neʼe sei book ita atu buka dalan hodi ajuda no hatudu laran-diʼak ba sira.—1 Pedro 3:8.
ITA PRESIZA HADIʼA ITA-NIA HANOIN KONA-BA EMA ESTRANJEIRU KA LAE?
6, 7. Saida mak hatudu katak ema kristaun iha apóstolu sira-nia tempu aprende atu halakon hahalok diskriminasaun?
6 Iha apóstolu sira-nia tempu, baibain ema judeu iha hahalok diskriminasaun. Maibé ema kristaun aprende oinsá atu halakon toman neʼe. Porezemplu, iha loron Pentekostes tinan 33, ema kristaun judeu neʼebé hela iha Jeruzalein hatudu laran-diʼak ba ema kristaun foun neʼebé foin mai husi rai seluk. (Apóstolu 2:5, 44-47) Hahalok domin neʼebé ema kristaun judeu hatudu ba maluk fiar-naʼin hatudu duni katak sira “hadomi ema estranjeiru”.
7 Maibé liutiha tempu balu, iha buat ida akontese iha kongregasaun. Ema judeu neʼebé koʼalia lia-gregu muramura no dehan katak sira-nia feto-faluk la hetan hahán. (Apóstolu 6:1) Tan neʼe apóstolu sira hili mane naʼin-hitu atu tau matan ba problema neʼe. Apóstolu sira hili mane sira neʼebé ho naran gregu, karik neʼe tanba atu halo fasil liu ba feto-faluk sira hodi simu ajuda.—Apóstolu 6:2-6.
8, 9. (a) Hahalok saida deʼit mak bele hatudu katak ita komesa iha hanoin diskriminasaun? (b) Saida mak ita tenkesér fokit sai husi ita-nia laran? (1 Pedro 1:22)
8 Dala ruma ita-nia kultura mós bele book ita-nia hanoin. (Roma 12:2) Karik ita rona viziñu, kolega serbisu, ka kolega eskola koʼalia buat neʼebé hatún ema husi rai seluk, suku, ka rasa seluk. Ita mós iha hanoin hanesan sira ka lae? No bainhira ema ida hatún ita-nia nasaun ka kultura, ita halo saida?
9 Uluk, apóstolu Pedro mós iha hahalok diskriminasaun hasoru ema husi rasa seluk. Maibé neineik-neineik, nia aprende oinsá bele halakon sentimentu neʼe husi ninia laran. (Apóstolu 10:28, 34, 35; Galásia 2:11-14) Hanesan neʼe mós ho ita. Se ita mak sente hahalok diskriminasaun ka foti-an kona-ba ita-nia rasa foin atu komesa iha ita-nia laran, tenkesér hakaʼas an hodi fokit sai kedas hahalok neʼe. (Lee 1 Pedro 1:22.) Saida mak bele ajuda ita? Diʼak atu hanoin-hetan katak, maski ita mai husi rai neʼebé la hanesan, maibé ita hotu mak ema sala-naʼin no la merese atu hetan salvasaun. (Roma 3:9, 10, 21-24) Tan neʼe ita labele hanoin katak ita mak diʼak liu fali ema seluk. (1 Korinto 4:7) Ita tenke iha hanoin hanesan apóstolu Paulo. Nia fó-hanoin ba maluk fiar-naʼin sira katak sira “laʼós tan nuʼudar ema husi rai seluk, maibé . . . parte husi Maromak nia umakain”. (Éfeso 2:19) Loos duni, ita hotu presiza hakaʼas an atu bele halakon hahalok diskriminasaun hodi bele “tau fali ema foun”.—Koloso 3:10, 11.
DALAN ATU HATUDU LARAN-DIʼAK BA EMA ESTRANJEIRU
10, 11. Oinsá mak Boas haleno Jeová nia haree kona-ba ema estranjeiru?
10 Mane fiar-naʼin ida naran Boas haleno duni Jeová nia haree kona-ba ema estranjeiru. Oinsá? Iha tempu neʼebé nia bá ninia toʼos, nia haree iha ema estranjeiru ida naran Rute husi rai-Moab serbisu makaʼas halibur hela sevada nia fulin restu husi toʼos. Tuir Moisés nia Ukun-Fuan, Rute iha direitu atu hili hahán restu sira-neʼe. Maski nuneʼe, Rute husu nafatin lisensa atu hili fulin restu husi Boas nia toʼos, no neʼe book tebes Boas nia laran toʼo nia mós haruka ninia serbisu-naʼin sira losu sevada nia fulin balu neʼebé sira futu tiha ona no husik hela iha kotuk hodi Rute bele hili.—Lee Rute 2:5-7, 15, 16. *
11 Buat neʼebé Boas halo tuirmai hatudu katak nia hanoin duni Rute nia situasaun nuʼudar ema estranjeiru ida. Nia konvida Rute atu tuir ninia serbisu-naʼin feto sira hodi mane sira la bele book nia. Nia mós fó atensaun ba Rute hanesan ninia serbisu-naʼin rasik hodi fó ai-han no bee ba Rute. Boas hatudu respeitu ba nia nuʼudar ema estranjeiru ida no fó laran-manas ba nia.—Rute 2:8-10, 13, 14.
12. Tanbasá mak diʼak atu hatudu laran-diʼak ba ema estranjeiru sira?
12 Boas hatudu laran-diʼak ba Rute laʼós tan deʼit Rute iha domin neʼebé kleʼan ba ninia banin-feto Noemi, maibé mós tanba Rute sai ona ema neʼebé adora Jeová no hakarak buka protesaun husi Nia. Tuir loloos Boas nia laran-diʼak haleno duni Jeová nia domin neʼebé laran-metin. (Rute 2:12, 20; Provérbios [Amsal] 19:17) Hanesan neʼe mós ohin loron, se ita mak hatudu laran-diʼak ba “ema hotu”, inklui mós ema estranjeiru, karik ita bele ajuda sira atu simu lia-loos no sira rasik mós bele sente katak Jeová hadomi tebes sira.—1 Timóteo 2:3, 4.
Ita hasé no simu ema foun neʼebé mai tuir reuniaun ho didiʼak ka lae? (Haree parágrafu 13, 14)
13, 14. (a) Tanbasá mak ita tenke hasé ema estranjeiru iha ita-nia reuniaun sira? (b) Saida mak bele ajuda ita atu la sente moe hodi koʼalia ho ema husi rai seluk?
13 Ita bele hatudu laran-diʼak ba ema estranjeiru hodi simu sira didiʼak iha ita-nia reuniaun sira. Baibain ema neʼebé foin muda ba rai ida, sira sente moe no ladún ransu ho ema seluk. No dala ruma tanba kultura ka laiha pozisaun aas iha komunidade, karik sira bele sente katak ema seluk diʼak liu fali sira. Tan neʼe, diʼak ba ita atu hasé uluk sira no simu sira ho laran. Se ita mak iha aplikasi JW Language iha ita-nia língua, bele uza neʼe atu hasé ema estranjeiru iha sira-nia língua rasik.—Lee Filipe 2:3, 4.
14 Karik foufoun ita bele sente moe atu koʼalia ho ema husi rai seluk. Maibé se ita fó koñese ita-nia an no koʼalia ho sira, karik ita sei hakfodak hodi hatene katak iha buat barak kona-ba sira mak hanesan ho ita-nian. Diʼak atu hanoin-hetan katak kultura ida-idak iha ninia diʼak no fraku.
AJUDA EMA ATU SENTE HANESAN FAMÍLIA IDA
15. Saida mak bele ajuda ita atu komprende kona-ba sira neʼebé foin muda ba rai seluk?
15 Saida mak ita bele halo atu ajuda ema seluk sente ita-nia kongregasaun mak hanesan família ida? Husu ba ita-nia an, ‘Se haʼu mak iha ema nia rai, haʼu hakarak ema seluk trata haʼu oinsá?’ (Mateus 7:12) Hatudu pasiénsia ba sira neʼebé halo daudauk mudansa atu moris iha rai seluk. Foufoun karik ita la komprende tansá mak sira hanoin ka halo buat ruma. Maibé duké hanoin katak sira tenke moris tuir ita-nia kultura, diʼak liu simu malu tanba neʼe mak dalan neʼebé sira moris.—Lee Roma 15:7.
16, 17. (a) Saida mak bele ajuda ita atu koñese liután sira neʼebé muda mai ita-nia rai? (b) Iha dalan saida deʼit mak ita bele ajuda ema neʼebé muda mai ita-nia rai?
16 Se ita mak gasta tempu balu atu buka-hatene kona-ba rai ka kultura husi ema neʼebé muda mai ita-nia rai, karik neʼe sei halo fasil ba ita atu hatene liután sira. Karik ita bele halo riset kona-ba neʼe durante tempu halaʼo adorasaun família nian. Dalan seluk atu koñese liu sira mak konvida sira atu mai han iha uma. Jeová “loke ona odamatan ba nasaun sira atu sai fiar-naʼin”, tan neʼe ita mós hakarak husik ita-nia odamatan nakloke ba “ita-nia maluk fiar-naʼin” sira.—Apóstolu 14:27; Galásia 6:10; Jó (Ayub) 31:32.
Ita hatudu laran-diʼak hodi konvida maluk fiar-naʼin neʼebé foin muda husi rai seluk bá han iha ita-nia uma ka lae? (Haree parágrafu 16, 17)
17 Gasta tempu hamutuk ho família sira neʼebé muda mai ita-nia rai bele ajuda ita komprende no hafolin liután sira-nia hakaʼas-an hodi moris iha ita-nia rai. Karik ita bele ajuda sira atu aprende ita-nia língua. Ita mós bele ajuda sira atu buka uma ka atu hetan serbisu ruma. Fó liman ba ita-nia maluk fiar-naʼin iha dalan hanesan neʼe ajuda tebes sira-nia moris.—Provérbios (Amsal) 3:27.
18. Ezemplu diʼak saida mak ema estranjeiru bele halo tuir kona-ba hatudu respeitu no agradese?
18 Ema estranjeiru rasik mós presiza hakaʼas an atu bele halo mudansa hodi simu kultura foun. Rute hatudu ezemplu neʼebé diʼak kona-ba ida-neʼe. Oinsá? Primeiru, nia hatudu respeitu ba rai nia kostume hodi husu uluk lisensa atu bele hili hahán restu. (Rute 2:7) Nia la hanoin katak nia iha direitu, tan neʼe ema la bele hapara nia. Segundu, nia hatudu agradese ba ajuda neʼebé ema seluk fó. (Rute 2:13) Se ema estranjeiru mak hatudu hahalok diʼak sira-neʼe, irmaun-irmán no rai-naʼin sira sei hatudu respeitu liu ba sira.
19. Tanba razaun saida deʼit mak ita hakarak simu ema estranjeiru sira didiʼak?
19 Ita agradese tebes tanba Jeová hatudu laran-diʼak hodi fó oportunidade ba ema hotu atu bele rona kona-ba liafuan diʼak. Ba ema balu, karik sira la iha liberdade atu estuda Bíblia ka ransu ho Maromak nia povu iha sira rasik nia rai. Maibé agora sira muda mai ita-nia rai no iha ona oportunidade sira-neʼe, tan neʼe ita hakarak ajuda sira hodi sira la sente hanesan ema foun iha ita-nia leet. Karik ita la iha osan barak ka ita la bele fó ajuda barak ba sira, maibé se ita mak hatudu laran-diʼak ba ema estranjeiru, ita haleno Jeová nia domin ba sira. Tan neʼe, mai ita hotu hakaʼas an atu “banati-tuir Maromak” hodi simu ema estranjeiru sira ho didiʼak!—Éfeso 5:1, 2.
^ [1] (parágrafu 1) Naran neʼe laʼós naran neʼebé loos.
^ par. 4 Êxodo 23:9 Imi labele hanehan ema estranjeiru neʼebé iha imi-nia leet. Imi hatene ona ema estranjeiru nia moris, tanba imi mós uluk hela nuʼudar ema estranjeiru iha rai-Ejitu.
^ par. 10 Rute 2:5-7, 15, 16 5 Depois, Boas husu ba mane ida neʼebé tau matan ba serbisu-naʼin sira: “Feto-klosan neʼe husi sé-nia umakain?” 6 Mane neʼebé tau matan ba serbisu-naʼin sira hatán: “Feto neʼe mak ema Moab neʼebé mai hamutuk ho Noemi husi rai-Moab. 7 Ohin nia husu: ‘Favór ida, haʼu bele halibur sevada nia fulin restu neʼebé serbisu-naʼin sira koʼa no husik hela ka lae?’ Husi ohin dadeer toʼo agora, nia halo serbisu la para. No foin daudauk mak nia tuur iha barraka hodi deskansa uitoan.” 15 Bainhira nia hamriik fali atu halibur sevada nia fulin restu, Boas hatete ba ninia mane-klosan sira: “Husik nia halibur fulin restu sira husi sevada neʼebé imi koʼa tiha ona, no keta hanetik nia. 16 Imi mós tenke losu sevada nia fulin balu neʼebé imi futu tiha ona no husik hela iha kotuk, hodi nuneʼe nia bele hili fali, no keta koʼalia liafuan ruma atu hapara nia.”
