1-2. (a) Bainhira Paulo hakerek karta ba ema Kristaun Ebreu, sira-nia situasaun mak oinsá? (b) Tanbasá ema Kristaun Ebreu simu karta iha tempu neʼebé loos?

 DEPOIS Jesus mate iha tinan 33 EC, ema Kristaun iha Jeruzalein no Judeia hasoru susar oioin. Lakleur depois kongregasaun Kristaun hahú, ema komesa fó-terus makaʼas ba sira. (Após 8:1) Maizumenus tinan 20 liu tiha, sira mós hasoru problema ekonomia no rai-hamlaha. (Após 11:​27-30) Maibé, maizumenus tinan 61 EC, ema Kristaun tama ba tempu dame nian. Durante tempu neʼe, Jeová dirije apóstolu Paulo atu hakerek karta ba sira. Konsellu husi karta neʼe ajuda sira prepara an ba buat neʼebé sei akontese.

² Ema Kristaun Ebreu iha Judeia simu karta iha tempu neʼebé loos tanba lakleur tan tempu dame nian sei remata. Paulo nia konsellu bele ajuda sira atu tahan durante susar boot neʼebé sira sei hasoru. Jesus fó-hatene nanis katak ema Judeu nia sistema sei lakon, no profesia neʼe lakleur tan sei akontese. (Lc 21:20) Klaru katak Paulo no ema Kristaun iha Judeia la hatene ho loloos bainhira mak neʼe sei akontese. Maski nuneʼe, sira bele uza sira-nia tempu atu prepara an hodi hametin sira-nia fiar no kbiit atu tahan.—Ebr 10:25; 12:​1, 2.

3. Tanbasá ema Kristaun ohin loron presiza aprende kona-ba livru Ebreu?

 ³ Lakleur tan, ita mós sei hasoru susar neʼebé boot liu fali ema Kristaun Ebreu hasoru. (Mt 24:21; Apok 16:​14, 16) Entaun, mai ita aprende kona-ba konsellu balu neʼebé Jeová fó ba ema Kristaun sira-neʼe tanba neʼe mós bele ajuda ita.

“LAʼO BA OIN HODI SAI EMA MADURU”

4. Ema Judeu neʼebé sai ona Kristaun hasoru susar saida? (Haree mós dezeñu.)

⁴ Ema Judeu neʼebé sai ona ema Kristaun tenke halo mudansa oioin, no neʼe la fasil. Ba tinan barak, ema Judeu mak Jeová nia povu espesiál. No Jeruzalein mak fatin neʼebé importante tebes tanba liurai neʼebé reprezenta Jeová, ukun husi fatin neʼe. No Jeruzalein mak sentru ba adorasaun neʼebé loos. Ema Judeu hotu neʼebé fiar metin halo tuir Moisés nia Ukun-Fuan neʼebé ulun-naʼin relijiaun sira hanorin. Ukun-Fuan sira-neʼe inklui kona-ba hahán, sirkunsizaun, no oinsá sira trata ema husi nasaun seluk. Maibé depois Jesus mate, Jeová la simu tan sakrifísiu neʼebé hasaʼe iha templu. Neʼe la fasil ba ema Kristaun Judeu tanba sira toman ona atu halo tuir Moisés nia Ukun-Fuan. (Ebr 10:​1, 4, 10) Ema Kristaun neʼebé maduru hanesan apóstolu Pedro mós sente susar atu halo tuir mudansa balu. (Após 10:​9-14; Gal 2:​11-14) Tanba ema Kristaun sira-neʼe iha fiar neʼebé foun, sira hetan terus husi ulun-naʼin relijiaun Judeu nian.

5. Ema Kristaun Ebreu hasoru susar saida husi grupu rua?

⁵ Ema Kristaun Ebreu hasoru susar husi grupu rua. Grupu primeiru mak ulun-naʼin relijiaun Judeu neʼebé trata sira hanesan apóstata. Grupu segundu mak ema balu husi kongregasaun neʼebé hatete katak ema Kristaun presiza kontinua halo tuir Moisés nia Ukun-Fuan. Karik sira koʼalia hanesan neʼe tanba taʼuk atu hetan terus. (Gal 6:12) Saida mak  bele ajuda ema Kristaun Ebreu atu kaer metin ba lia-loos?

6. Paulo anima ninia maluk fiar-naʼin sira atu halo saida? (Ebreu 5:14–6:1)

⁶ Iha Paulo nia karta ba ema Ebreu, nia anima ninia maluk fiar-naʼin atu estuda kleʼan Maromak nia Liafuan. (Lee Ebreu 5:14–6:1.) Hodi uza Eskritura Lian Ebraiku, nia esplika tanbasá mak dalan neʼebé ema Kristaun adora Jeová mak diʼak liu fali ema Judeu nian. a Paulo anima ema Kristaun atu estuda no komprende diʼak liután lia-loos husi Bíblia hodi nuneʼe sira bele rekoñese hanorin falsu no la simu ida-neʼe.

7. Susar saida mak ita hasoru ohin loron?

⁷ Ohin loron, ita mós hasoru susar husi ema neʼebé habelar informasaun no ideia oioin neʼebé kontra Jeová nia matadalan. Ema balu kontra ita-nia fiar neʼebé bazeia ba Bíblia kona-ba morál. Sira dehan katak ita la hatudu toleránsia no laran-aat. Ema nia hanoin no hahalok sai aat ba beibeik no la tuir Jeová nia hanoin. (Prov 17:15) Tan neʼe, importante tebes ba ita atu rekoñese ideia neʼebé sala no la simu ida-neʼe. Ita lakohi husik kontradór sira halakon ita-nia aten-brani no para atu serbí Jeová.—Ebr 13:9.

8. Oinsá ita bele laʼo ba oin hodi sai maduru?

⁸ Apóstolu Paulo anima ema Kristaun Ebreu atu kontinua laʼo ba oin hodi sai maduru, no ita mós tenke halo nuneʼe. Neʼe katak ita presiza estuda didiʼak Bíblia atu bele hatene lia-loos no Jeová nia dalan atu hanoin. Ita presiza kontinua halo ida-neʼe maski ita hetan ona batizmu. No maski ita iha ona lia-loos ba tempu kleur ka lae, ita hotu presiza lee no estuda beibeik Maromak nia Liafuan. (Sal 1:2) Hodi iha toman atu estuda mesak sei ajuda ita hametin ita-nia fiar, neʼe mak hahalok importante ida neʼebé Paulo temi ba ema Kristaun Ebreu.—Ebr 11:​1, 6.

“IHA FIAR NO BELE KONTINUA MORIS”

9. Tanbasá mak ema Kristaun Ebreu presiza iha fiar neʼebé metin?

⁹ Ema Kristaun Ebreu presiza iha fiar neʼebé metin atu bele moris liu susar boot neʼebé lakleur tan sei akontese iha Judeia. (Ebr 10:​37-39) Jesus hatete ba ninia dixípulu sira katak bainhira sira haree tropa haleʼu Jeruzalein, sira presiza halai ba foho. Ninia konsellu neʼe aplika ba ema Kristaun hotu iha tempu neʼebá maski sira hela iha sidade laran ka sidade liʼur. (Lc 21:​20-24) Baibain bainhira tropa mai atu ataka, ema neʼebé hela iha sidade liʼur halai ba sidade laran tanba moru neʼebé bele proteje sira. Tuir ema nia haree, atu halai ba foho mak ideia neʼebé la lójiku, tan neʼe ema Kristaun presiza iha fiar neʼebé metin atu halo tuir Jesus nia liafuan.

10. Se ema Kristaun iha fiar neʼebé metin, neʼe sei book sira atu halo saida? (Ebreu 13:17)

¹⁰ Ema Kristaun Ebreu mós presiza tau fiar ba ema neʼebé Jesus uza atu dirije kongregasaun. Karik sira neʼebé dirije kongregasaun fó matadalan espesífiku kona-ba bainhira atu halai no oinsá atu halo ida-neʼe. (Lee Ebreu 13:17.) Liafuan Gregu iha Ebreu 13:17 neʼebé tradús nuʼudar “halo tuir” fó ideia katak halo  tuir ema neʼebé fó matadalan tanba tau fiar ba ema neʼe, laʼós tanba ema neʼe iha podér. Entaun ema Kristaun Ebreu presiza hametin sira-nia fiar ba ema neʼebé dirije kongregasaun antes susar boot akontese. Se sira halo tuir matadalan husi ema neʼebé dirije iha tempu dame nian, neʼe sei halo fasil ba sira atu halo tuir iha tempu susar.

11. Tanbasá mak ema Kristaun ohin loron presiza iha fiar neʼebé metin?

¹¹ Ohin loron ita mós presiza iha fiar. Ita moris iha tempu neʼebé ema barak la simu Bíblia nia avizu katak mundu nia rohan besik ona, no sira mós goza ita tanba ita tau fiar ba ida-neʼe. (2 Ped 3:​3, 4) Liután neʼe, maski Bíblia fó sai informasaun oioin kona-ba saida mak sei akontese durante terus boot, maibé iha mós buat barak neʼebé ita seidauk hatene. Ita presiza iha fiar neʼebé metin katak mundu aat neʼe nia rohan sei mai iha tempu neʼebé loos no Jeová sei tau matan ba ita durante tempu neʼe.—Hab 2:3.

12. Saida mak bele ajuda ita atu moris liu terus boot?

¹² Ita mós presiza hametin ita-nia fiar ba “atan laran-metin no matenek” neʼebé Jeová uza atu dirije ita ohin loron. (Mt 24:45) Bainhira terus boot hahú, karik ita sei simu matadalan espesífiku oioin neʼebé bele salva ita-nia moris, hanesan ho ema Kristaun Ebreu neʼebé simu matadalan oioin husi sira neʼebé dirije kongregasaun bainhira tropa Roma haleʼu Jeruzalein. Agora mak tempu atu hametin ita-nia fiar ba sira neʼebé dirije Jeová nia organizasaun. Se ita sente susar atu halo tuir sira-nia matadalan agora, neʼe sei halo susar liután ba ita atu halo tuir matadalan neʼebé ita sei simu durante terus boot.

13. Tanbasá konsellu iha Ebreu 13:5 mak diʼak?

¹³ Nuʼudar ema Kristaun Ebreu hein ba sinál atu halai, sira mós presiza halaʼo moris neʼebé simples no ‘la hadomi osan’. (Lee Ebreu 13:5.) Sira balu liu ona tempu hamlaha no kiak. (Ebr 10:​32-34) Maski uluk sira prontu atu tahan susar tanba liafuan diʼak, maibé karik sira balu komesa buka rikusoin hodi hanoin katak osan bele fó protesaun. Maibé osan labele proteje sira-nia moris bainhira Jeruzalein naksobu. (Tgo 5:3) Realidade mak domin ba osan no sasán halo susar ba ema atu halai no husik sira-nia rikusoin.

14. Oinsá mak fiar neʼebé metin afeta ita-nia desizaun agora kona-ba rikusoin?

¹⁴ Se ita iha fiar neʼebé metin katak lakleur tan Jeová sei halakon mundu aat neʼe, neʼe sei ajuda ita atu la hadomi osan no sasán. Bíblia hatete katak durante terus boot, ema sei “soe sira-nia osan-mutin iha dalan” tanba sira rekoñese katak “osan-mutin no osan-mean sei la salva sira iha Jeová nia loron hirus nian”. (Eze 7:19) Duké tau fokus atu manán osan barak, ita presiza halo desizaun neʼebé ajuda ita atu halaʼo moris neʼebé simples no balansu. Neʼe inklui hakaʼas an atu la debe osan, no la gasta tempu demais atu tau matan ba ita-nia sasán. Ita mós presiza kuidadu atu rikusoin la sai fali buat neʼebé importante liu iha ita-nia moris. (Mt 6:​19, 24) Nuʼudar ita hein ba mundu neʼe nia rohan, ita presiza tau fiar ba Jeová duké rikusoin.

 “IMI PRESIZA TAHAN”

15. Tanbasá ema Kristaun Ebreu presiza tahan?

¹⁵ Ema Kristaun Ebreu presiza tahan susar oioin nuʼudar situasaun sai aat ba beibeik. (Ebr 10:36) Maski ema Kristaun Ebreu balu hasoru ona terus makaʼas, maibé ema barak mak sai Kristaun durante tempu dame nian. Tan neʼe Paulo fó-hanoin sira atu prepara an ba susar boot no sai prontu atu laran-metin toʼo mate hanesan Jesus. (Ebr 12:4) Nuʼudar ema barak sai Kristaun, neʼe halo kontradór Judeu sira sai hirus liután no halo violénsia. Tinan balu antes Paulo hakerek Livru Ebreu, ema-lubun ataka nia bainhira nia haklaken iha Jeruzalein. Ema Judeu naʼin-40 liu “jura katak sira sei hetan malisan se sira han ka hemu buat ruma bainhira sira seidauk oho Paulo”. (Após 22:22; 23:​12-14) Maski ema odi no fó susar ba ema Kristaun, maibé sira presiza kontinua halibur hamutuk hodi adora Jeová, haklaken liafuan diʼak, no hametin sira-nia fiar.

16. Oinsá mak Livru Ebreu ajuda ita atu iha hanoin neʼebé loos kona-ba terus husi ema neʼebé kontra? (Ebreu 12:7)

¹⁶ Saida mak bele ajuda ema Kristaun Ebreu atu tahan terus husi ema neʼebé kontra? Paulo hatene katak sira presiza iha hanoin neʼebé loos kona-ba sira-nia susar. Nia esplika katak bainhira ema Kristaun hasoru susar, karik Maromak husik neʼe akontese atu bele treinu sira. (Lee Ebreu 12:7.) Treinu hanesan neʼe bele ajuda sira atu haburas hahalok neʼebé halo Jeová kontente. Hodi fokus ba rezultadu diʼak husi susar sira, neʼe sei halo fasil ba ema Kristaun Ebreu atu tahan.—Ebr 12:11.

17. Saida mak Paulo aprende ona kona-ba tahan terus?

¹⁷ Paulo anima ema Kristaun Ebreu atu  tahan susar ho aten-brani no la rende an. Nia bele fó konsellu diʼak kona-ba neʼe tanba antes nia sai Kristaun, nia fó-terus ona ba ema Kristaun no haree oinsá ema trata aat sira. Nia mós hatene oinsá atu tahan kuandu ema fó-terus. Nia rasik hasoru susar oioin kuandu nia sai ona ema Kristaun. (2 Kor 11:​23-25) Tan neʼe Paulo bele koʼalia ho fiar metin kona-ba saida mak ema Kristaun presiza halo atu bele tahan. Nia fó-hanoin sira katak bainhira hasoru susar, sira presiza sadere ba Jeová laʼós ba sira-nia an rasik. Tan neʼe Paulo koʼalia ho aten-brani: “Jeová mak haʼu-nia ajuda-naʼin.”—Ebr 13:6.

18. Saida mak sei akontese ba ita hotu iha futuru, no saida mak ita tenke halo agora?

¹⁸ Ita-nia irmaun-irmán balu tahan daudaun susar. Ita bele apoia hodi halo orasaun ba sira, no ita mós bele ajuda sira hodi fó buat ruma neʼebé sira presiza. (Ebr 10:33) Maibé, Bíblia hatete: “Ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus.” (2 Tim 3:12) Tan neʼe, ita hotu presiza prepara an ba buat neʼebé lakleur tan sei akontese. Mai ita kontinua tau fiar tomak ba Jeová no iha konfiansa katak nia sei ajuda ita tahan susar naran deʼit neʼebé ita hasoru. No iha tempu neʼebé loos, nia sei fó kmaan no salva ninia atan hotu neʼebé laran-metin.—2 Tes 1:​7, 8.

19. Ita bele halo saida atu prepara an ba terus boot? (Haree mós dezeñu.)

¹⁹ Klaru katak Paulo nia karta ba ema Kristaun Ebreu ajuda sira atu prepara an ba susar boot neʼebé sira sei hasoru. Paulo anima irmaun-irmán sira atu estuda didiʼak no komprende Maromak nia Liafuan. Hodi halo nuneʼe sei ajuda sira atu rekoñese hanorin neʼebé bele estraga sira-nia fiar. Nia anima sira atu hametin sira-nia fiar hodi bele sai prontu atu halo tuir matadalan husi Jesus no husi sira neʼebé dirije kongregasaun. No nia mós ajuda ema Kristaun sira atu haburas kbiit atu tahan hodi iha hanoin neʼebé loos kona-ba sira-nia susar, no haree susar sira-neʼe nuʼudar treinu husi Aman Jeová. Ita mós presiza halo tuir konsellu sira-neʼe husi Bíblia, tanba neʼe bele ajuda ita tahan ho laran-metin toʼo rohan.—Ebr 3:14.