ENOC mate bainhira nia tinan 365. Se kompara ho ita neʼebé moris ohin loron, Enoc moris kleur tebetebes! Maibé tuir loloos, se kompara ho ema seluk iha ninia tempu, Enoc nia moris mak badak deʼit. Iha Enoc nia tempu, ema moris ba tinan barak. Porezemplu, bainhira Enoc moris mai, Adão nia tinan 600 liu ona, no Adão moris ba tinan 300 tan! Adão nia bei-oan balu moris kleur liu fali nia. Tan neʼe, bainhira Enoc mate ho tinan 365, nia seidauk katuas. Sin, nia mate sedu.

Imajina toʼok Enoc iha perigu boot nia laran. Durante nia halai-sees daudaun husi ema sira neʼebé odi nia, nia hanoin kona-ba ema sira-neʼe nia reasaun ba lia-menon husi Maromak. Sira oin-buis, laran-nakali, no odi tebes Enoc. Sira hakribi lia-menon neʼebé Enoc hatoʼo, no mós hakribi Maromak Jeová neʼebé haruka Enoc atu hatoʼo lia-menon neʼe. Sira la bele ataka Jeová, maibé bele ataka Enoc! Karik Enoc komesa hanoin kona-ba ninia família hodi husu ba ninia an: ‘Haʼu sei bele hasoru fali haʼu-nia feen, haʼu-nia oan Metusalém, no haʼu-nia bei-oan Lamek ka lae?’ (Gênesis [Kejadian] 5:21-23, 25) Saida mak akontese tuirmai?

Maski Bíblia fó sai informasaun uitoan deʼit kona-ba Enoc, maibé ita bele hatene katak Enoc mak mane ida neʼebé fiar metin tebes. (Gênesis [Kejadian] 5:21-24; Ebreu 11:5; Judas 14, 15) Oinsá mak Ita bele banati-tuir Enoc nia fiar? Enoc nia ezemplu bele ajuda Ita liuliu se Ita tenke tau matan ba família nia presiza, ka bainhira Ita sente susar atu hamriik metin hodi defende Ita-nia fiar.

Bainhira Enoc moris, ema nia hahalok sira sai aat liután ba beibeik. Enoc mak jerasaun hitu husi Adão. Ema sira neʼebé moris iha tempu besik malu ho Adão no Eva iha isin neʼebé forte liu fali ita ohin loron, no tan neʼe mak sira moris ba tinan barak. Maski nuneʼe, sira-nia morál sai aat, no sira dook ona husi Maromak. Ida-neʼe hahú husi tempu bainhira Adão ho Eva nia oan Caim oho ninia alin Abel. No Caim nia oan ida sente orgullu atu halo violénsia neʼebé aat liu! Adão nia bei-oan sira mós komesa halo buat seluk tan neʼebé aat tebes. Sira temi Maromak nia naran santu, Jeová, iha dalan neʼebé la hatudu respeitu.—Gênesis (Kejadian) 4:8, 23-26.

Iha Enoc nia tempu, ema barak la adora ona Maromak Jeová. Tan neʼe, bainhira Enoc sai boot ba daudaun, nia tenke hili atu halo tuir deʼit ema seluk, ka atu buka Maromak Jeová neʼebé mak kria lalehan no rai. Enoc rona istória kona-ba Abel neʼebé mate tanba adora Jeová iha dalan neʼebé loos, no karik ida-neʼe book Enoc nia laran  atu banati-tuir Abel nia ezemplu. Gênesis (Kejadian) 5:22 dehan: “Enoc kontinua laʼo ho Maromak neʼebé loos.” Enoc la hanesan ho ema seluk neʼebé la hamtaʼuk Maromak. Tuir loloos, Enoc mak ema primeiru neʼebé Bíblia temi nuʼudar ema neʼebé laʼo ho Maromak.

Gênesis (Kejadian) 5:22 mós hatete katak, depois Enoc sai aman ba Metusalém, nia kontinua laʼo ho Maromak Jeová. Enoc nia tinan maizumenus 65 bainhira nia iha oan. Enoc iha feen no mós “oan-mane no oan-feto” barak. Aman neʼebé laʼo ho Maromak sei hakaʼas an atu tau matan didiʼak ba ninia família hodi halo tuir Maromak nia hakarak. Enoc hatene katak Jeová hakarak laʼen sira atu hatudu laran-metin ba sira-nia feen. (Gênesis [Kejadian] 2:24) No ita bele fiar katak nia mós hakaʼas an duni atu hanorin ninia oan sira kona-ba Maromak Jeová.

Tuir Bíblia, Enoc nia oan-mane Metusalém mak ema neʼebé moris kleur liu toʼo ikusmai mate iha tinan neʼebé Maromak halakon mundu aat hodi hatún udan boot. Maibé Bíblia la hatete buat ida kona-ba Metusalém nia fiar. Maski nuneʼe, bainhira Enoc mate, Metusalém nia oan-mane naran Lamek moris ona ba tinan 100 liu. Lamek hatudu fiar neʼebé metin. Jeová uza nia atu fó-hatene nanis kona-ba buat neʼebé sei akontese ba ninia oan-mane Noé, no neʼe sai loos duni depois Rai-Nabeen. Bíblia mós temi Noé nuʼudar ema neʼebé laʼo ho Maromak, hanesan ho ninia bizavó Enoc. Maski Enoc mate tiha ona bainhira Noé moris, maibé ninia ezemplu book duni Noé. Karik Noé hatene kona-ba Enoc liuhusi ninia aman Lamek, ka husi ninia avó Metusalém, ka husi Enoc nia aman Jaret, neʼebé mate bainhira Noé tinan 366.—Gênesis (Kejadian) 5:25-29; 6:9; 9:1.

Enoc nia hahalok la hanesan duni ho Adão. Maski Adão perfeitu, maibé nia kontra hasoru Jeová hodi lori sala no mate ba ninia oan no bei-oan hotu. Oinsá ho Enoc? Maski nia moris mai nuʼudar sala-naʼin, maibé nia laʼo ho Maromak no hatudu ezemplu diʼak ba ninia oan no bei-oan sira kona-ba fiar metin. Bainhira Adão mate, Enoc nia tinan 308. Ita la hatene saida mak Adão nia oan sira seluk sente iha tempu neʼebá, maibé ita hatene katak Enoc “kontinua laʼo ho Maromak neʼebé loos”.—Gênesis (Kejadian) 5:24.

Se Ita mak família nia ulun, saida mak Ita bele aprende husi Enoc nia fiar? Maski tau matan ba família nia presiza loron-loron nian mak importante, maibé buat neʼebé importante liu mak atu ajuda sira hakbesik ba Maromak. (1 Timóteo 5:8) Ita bele halo nuneʼe liuhusi Ita-nia liafuan no Ita-nia hahalok. Se Ita laʼo ho Maromak no moris tuir Ninia matadalan hanesan Enoc, Ita hatudu ezemplu diʼak ba Ita-nia família.

Karik Enoc sente mesamesak tanba nia hela iha mundu neʼebé nakonu ho ema neʼebé la fiar Maromak. Maibé Maromak Jeová tau atensaun ba Enoc ka lae? Sin. Loron ida, Jeová koʼalia ho Ninia atan diʼak neʼe hodi fó knaar atu hatoʼo Ninia lia-menon importante ba ema. Loos duni, Jeová  foti Enoc nuʼudar profeta. Tuir loloos, Enoc mak profeta primeiru neʼebé ninia liafuan fó sai iha Bíblia laran. Ohin loron, ita bele lee Enoc nia lia-menon neʼe iha Bíblia laran, iha livru neʼebé Jesus nia alin Judas mak hakerek. *

Entaun, Enoc hatoʼo liafuan saida? Nia dehan: “Haree! Jeová mai ho ninia anju santu sira rihun ba rihun atu tesi lia ba ema hotu, hodi hamonu kastigu ba ema aat hotu tanba hahalok aat sira neʼebé sira halo no tanba buat aat hotu neʼebé ema aat sira koʼalia hasoru nia.” (Judas 14, 15) Enoc la dehan: “Jeová sei mai”, maibé nia dehan: “Jeová mai.” Tuir loloos, iha lia orijinál iha lia-ebraiku, eskritura neʼe dehan: “Jeová mai ona.” Nuneʼe mós ho Jeová nia profeta sira seluk. Bainhira sira fó-hatene nanis kona-ba buat neʼebé sei akontese, sira uza liafuan neʼebé hatudu katak buat sira-neʼe akontese ona, tanba Jeová nia liafuan sempre sai loos!—Isaías (Yesaya) 46:10.

Hanoin toʼok, Enoc sente oinsá bainhira nia atu hatoʼo lia-menon neʼe ba ema hotu? Lia-menon neʼe mak avizu neʼebé makaʼas tebes tanba uza liafuan “aat” ba dala haat. Nia tenke hatete ba ema katak sira mak aat, sira-nia hahalok mós aat, no dalan neʼebé sira halo buat aat oioin mós aat hotu. Liafuan neʼe hatudu katak depois Maromak hasai ema primeiru husi jardín Eden, mundu sai fatin neʼebé aat tebetebes. No ikusmai Maromak sei lori anju santu rihun ba rihun atu halakon mundu neʼe. Maski la iha mak apoia Enoc, maibé nia hatoʼo Maromak nia liafuan neʼe ho aten-brani! Karik joven Lamek haree ida-neʼe, no nia admira tebes ninia avó-mane nia hahalok aten-brani.

Dalan neʼebé ita haree mundu neʼebé ita hela daudauk mak hanesan deʼit ho Maromak nia haree ka lae? Enoc nia liafuan neʼe mós kona mundu aat ohin loron, laʼós deʼit mundu aat iha ninia tempu. Hodi kumpre Enoc nia avizu, Maromak Jeová halo udan boot tun atu halakon mundu aat iha Noé nia tempu. No Bíblia fó sai katak lakleur tan Maromak sei halakon mundu ohin loron neʼe hanesan nia halo ona iha Noé nia tempu. (Mateus 24:38, 39; 2 Pedro 2:4-6) Ohin loron mós Maromak prepara ona anju rihun ba rihun atu tesi lia ba mundu aat neʼe. Ita ida-idak tenke rona Enoc nia avizu no fó-hatene ba ema seluk kona-ba buat neʼebé sei akontese. Karik ita-nia família no kolega sira lakohi simu ita. Dala ruma ita sei sente mesamesak. Maibé, hanesan Jeová nunka husik hela Enoc, Nia mós sei la husik hela Ninia atan sira ohin loron neʼebé laran-metin ba Nia!

Oinsá mak Enoc mate? Ita la hatene. Livru Gênesis (Kejadian) hatete deʼit: “Enoc nafatin laʼo ho Maromak loos. Tuirmai nia la iha tan, tanba Maromak foti nia.” (Gênesis [Kejadian] 5:24) Oinsá mak Maromak foti Enoc? Apóstolu Paulo esplika: “Liuhusi fiar mak Enoc la haree mate tanba Maromak foti tiha nia, no ema la hetan tan nia tanba Maromak foti nia; maibé antes foti nia, Maromak fó sasin katak Enoc halo nia laran kontente.” (Ebreu 11:5) Paulo nia liafuan neʼebé dehan “la haree mate tanba Maromak foti tiha nia”, neʼe katak sá? Tradusaun Bíblia balu hatete katak Maromak foti Enoc ba lalehan. Maibé neʼe la bele akontese tanba Bíblia fó sai katak Jesus Kristu mak ema primeiru neʼebé hetan moris-hiʼas ba lalehan.—João 3:13.

 Se nuneʼe, oinsá mak Maromak “foti” Enoc atu “la haree mate”? Karik Maromak Jeová ho laran-diʼak halo Enoc mate la ho terus ka moras. Maibé antes neʼe, “Maromak fó sasin” katak Enoc halo Ninia laran kontente. Karik Maromak halo ida-neʼe hodi hatudu ba Enoc vizaun ida kona-ba mundu sai fali fatin neʼebé furak tebes. Tuirmai Enoc mate ho dame. Bainhira apóstolu Paulo hakerek kona-ba Enoc no fiar-naʼin sira seluk, nia dehan: “Ema sira-neʼe hotu mate iha fiar.” (Ebreu 11:13) Depois Enoc mate, karik ninia inimigu sira buka ninia mate-isin, maibé sira “la hetan”. Karik Jeová halakon tiha Enoc nia mate-isin hodi ema la estraga ka uza ida-neʼe atu halo adorasaun falsu. *

Agora, mai ita koko imajina toʼok oinsá mak Enoc mate. Enoc halai hela husi ema neʼebé duni tuir nia. Nia kole tebes, no dada iis makaʼas. Ema aat sira-neʼe odi tebes Enoc no ninia liafuan tesi-lia nian. Ikusmai, karik Enoc konsege hetan fatuk-kuak ida atu subar ninia an. Maski nuneʼe, Enoc hatene katak lakleur tan sira sei hetan nia no oho nia. Tan neʼe, nia halo orasaun ba Maromak. Tuirmai, Enoc sente kalma tebes. Derrepente deʼit nia haree vizaun furak ida, no nia sente katak nia mós sai parte iha vizaun neʼe.

Karik vizaun neʼe mak kona-ba mundu neʼebé la hanesan ho mundu neʼebé nia hela daudauk. Mundu neʼe haree furak tebetebes, hanesan jardín Eden, maibé la iha anju kerubín sira neʼebé hapara ema atu tama. Iha fatin neʼe iha mane no feto barak neʼebé isin-diʼak, sira hotu joven hela. Sira moris iha dame, la iha odi malu, ka ema neʼebé haterus malu tanba fiar la hanesan. Enoc sente katak Jeová hadomi nia no kontente ho ninia hahalok, no nia merese duni atu hela iha neʼebá. Enoc taka ninia matan, no ninia laran sai nakonu ho dame. Ikusmai, nia sai dukur, no toba tiha ba nafatin.

Sin, Enoc mate hela, maibé Maromak Jeová hanoin-hetan nia nafatin! Maromak la haluha ema neʼebé mate ona, no loron ida, sira sei rona Kristu nia lian no moris hiʼas. Iha tempu neʼebá, sira sei haree ho sira-nia matan rasik mundu foun neʼebé furak tebetebes.—João 5:28, 29.

Ita mós hakarak tama ba mundu foun ka lae? Imajina toʼok, Ita sei hasoru Enoc neʼebé moris hiʼas, no rona ninia esperiénsia oioin! Hodi halo hanesan neʼe mak ita bele hatene ho loloos iha situasaun saida mak Enoc mate. Maibé agora, ita aprende lisaun importante husi Enoc nia ezemplu. Bainhira apóstolu Paulo temi Enoc, nia dehan: “Se fiar la iha, ita la bele halo Maromak nia laran kontente.” (Ebreu 11:6) Loos duni, mai ita banati-tuir Enoc nia fiar metin no aten-brani!