Delfina, neʼebé temi ona iha pájina 6, esplika katak ninia laran-susar book nia atu hemu tua demais. Bíblia hanorin katak la sala atu hemu tua, maibé Bíblia mós dehan: “Keta sai hanesan ema neʼebé hemu tua demais.” (Provérbios [Amsal] 23:20) Hemu tua demais bele hamosu problema oioin, hanesan problema saúde no estraga relasaun diʼak ho ema seluk. No mós tinan-tinan ema barak mate sedu tanba hemu tua demais. Ema bele hadook an husi problema sira-neʼe se sira moris tuir Bíblia nia matadalan.

Delfina halo ida-neʼe duni. Nia dehan: “Haʼu rekoñese katak hemu tua la ajuda haʼu. Haʼu aplika eskritura iha Filipe 4:6, 7, neʼebé dehan: ‘Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak.’ Kalan-kalan bainhira haʼu hanoin barak no sente laran-susar, haʼu halo orasaun no fó sai haʼu-nia sentimentu hotu ba Jeová, neʼe inklui hirus, laran-kanek no laran-taridu. Haʼu husu makaʼas ba nia atu haʼu bele iha hanoin neʼebé pozitivu. Loron tuirmai haʼu hakaʼas an atu la hanoin tan kona-ba sentimentu sira-neʼe. Halo orasaun ajuda haʼu atu hanoin deʼit kona-ba buat neʼebé haʼu iha duké buat neʼebé haʼu la iha. Haʼu deside atu la hemu tan tua, tanba haʼu lakohi lakon dame neʼebé haʼu sente iha laran.”

Hahalok seksuál neʼebé la morál bele hamosu laran-kanek no laran-triste. Problema sira-neʼe akontese tanba halimar ho ema seluk nia sentimentu ka haree pornografia, maibé Bíblia nia matadalan sira bele ajuda ita atu hadook an husi problema sira-neʼe. Porezemplu, joven mane ida naran Samuel hatete: “Uluk, fasil deʼit ba haʼu atu book feto sira. Se haʼu haree katak feto ida gosta haʼu, haʼu sei halimar ho ninia sentimentu, maski haʼu la gosta nia.” Tanba ema barak dehan katak Samuel sempre book feto sira, entaun neʼe book Samuel atu halo nuneʼe duni. Ikusmai, Samuel komesa hanoin barak kona-ba ninia hahalok neʼe no nia dehan: “Toman neʼe ladiʼak tanba halo ita haburas hahalok hanoin an deʼit.”

Samuel lee informasaun kona-ba joven sira iha sítiu www.mr1310.com. Nia mós hanoin kona-ba Provérbios (Amsal) 20:11, neʼebé dehan: “Ema bele hatene se labarik [ka labarik-mane] ida iha hahalok loos no moos liuhusi ninia hahalok.” Oinsá ida-neʼe ajuda nia? Samuel rekoñese katak halimar ho ema seluk nia sentimentu mak hahalok neʼebé la loos no la moos. Nia dehan: “Haʼu aprende katak joven neʼebé hatudu hahalok hanesan neʼe, sei sai kaben-naʼin neʼebé ladiʼak. Haʼu komesa hanoin, se loron ida haʼu kaben, haʼu-nia feen sei sente oinsá, se nia haree haʼu book feto seluk. Ikusmai, haʼu rekoñese katak toman neʼe ladiʼak duni.” Ikusmai, Samuel halakon toman neʼe. Hodi hadook an husi hahalok neʼe, ajuda Samuel atu hadook an husi hahalok seksuál neʼebé la morál.

António mós besik atu halo hahalok seksuál neʼebé la morál tanba nia iha toman atu haree pornografia. Maski nia hadomi tebes ninia feen, maibé nia monu beibeik ba toman neʼe. Nia hatete katak hodi hanoin kona-ba 1 Pedro 5:8 ajuda tebes nia. Eskritura neʼe dehan: “Sai matenek bá, no matan-moris bá. Imi-nia inimigu, katak Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.” António hatete: “Ohin loron pornografia ka foto aat sira mosu iha fatin barak, no buat sira-neʼe bele belit metin iha ita-nia neon. No eskritura neʼe ajuda haʼu atu hanoin-hetan katak tentasaun hotu mai husi Diabu, inklui mós pornografia. Agora haʼu hatene katak só Jeová deʼit mak bele ajuda haʼu atu ‘sai matenek no matan-moris’, atu nuneʼe toman aat neʼe la bele estraga haʼu-nia neon, laran no moris kaben nian.” António hetan duni ajuda neʼebé nia presiza, no ikusmai hadook an husi toman aat neʼe. Hodi hadook an husi hahalok neʼe, ajuda nia atu hasees an husi problema neʼebé boot liután.

Klaru katak Bíblia bele ajuda ita atu hadook an husi problema oioin. Maibé oinsá ho problema neʼebé susar atu rezolve? Mai ita haree oinsá mak Bíblia bele ajuda ita..