Maromak Jeová nia povu serbí nia ba tempu kleur ona. Ita bele hatene sira-nia istória laʼós deʼit husi ita-nia livru sira, maibé mós husi foto, karta, esperiénsia neʼebé ema konta, no sasán ruma neʼebé liga ho ita-nia adorasaun no serbisu haklaken. Tanbasá mak importante atu rai hela sasán sira-neʼe no atu buka-hatene liután kona-ba ita-nia istória iha tempu uluk? Iha Israel antigu nia tempu, família nia ulun sira tenke fó-hatene ba sira-nia oan kona-ba Maromak nia lei sira no kona-ba oinsá Jeová ajuda sira, hodi nuneʼe sira-nia oan bele “tau sira-nia fiar ba Maromak rasik”.—Sal 78:1-7.

Buka-hatene kona-ba dokumentu no sasán antigu, mós parte importante hodi Maromak Jeová nia hakarak bele laʼo nafatin. Porezemplu, kuandu ema koko atu hapara ema Israel atu harii fali templu iha Jerusalém, ema-boot ida haruka ema atu buka dokumentu neʼebé rai hela iha sidade kapitál naran Ecbátana iha rai-Média. Ikusmai sira hetan dokumentu ida neʼebé hatudu katak Liurai Ciro haruka ema Israel atu harii fali templu iha Jerusalém. (Esd 6:1-4, 12) Tan neʼe, templu harii fali tuir Maromak nia hakarak. Lucas neʼebé hakerek Evanjellu, mós buka tuir informasaun no dokumentu sira neʼebé halibur husi tempu uluk. Nia “buka-hatene loloos buat hotu horiuluk kedas”.—Lc 1:1-4.

Grupu Administradór hatudu duni interese kona-ba ita-nia istória nuʼudar Maromak nia povu. Membru ida husi Grupu Administradór fó komentáriu kona-ba tansá presiza rai didiʼak dokumentu no sasán sira husi tempu uluk no konta ita-nia istória ba jerasaun foun, nia hatete: ‘Buka-hatene kona-ba ita-nia istória husi tempu uluk ajuda ita atu hametin ita-nia fiar hodi kontinua  serbí Maromak.’ Tanba ida-neʼe, Grupu Administradór harii Departamentu Arkivu iha sede-jerál iha Brooklyn, Novaiorke. Departamentu neʼe nia serbisu mak atu halibur no rai didiʼak dokumentu no sasán antigu sira. Komisaun Hakerek nian mak tau matan ba departamentu neʼe.

ITA-NIA “ALBUM FAMÍLIA NIAN” NO “REKORDASAUN”

Tempu laʼo daudaun no ita la bele fila fali ba kotuk, karik ita barak hanoin, diʼak se uluk ita rai hela dokumentu no sasán sira neʼebé fó-hatene kona-ba ita-nia família nia istória. Tan neʼe, Departamentu Arkivu serbisu ho badinas hodi rai didiʼak dokumentu no sasán uluk nian, no atu hakerek informasaun hotu kona-ba ita-nia organizasaun nia istória. Foto sira neʼebé rai ho didiʼak iha Arkivu, bele dehan katak neʼe hanesan ita-nia “album família nian”. Ita-nia livru sira husi tempu uluk, esperiénsia kapás neʼebé ema konta no hakerek, no sasán sira neʼebé espesiál mak buat folin-boot seluk tan neʼebé rai hela iha Arkivu. Buat sira-neʼe mak hanesan “rekordasaun”, ka sasán neʼebé ema fó hodi fó-hanoin mai ita kona-ba tempu uluk. Buat sira-neʼe ajuda ita atu komprende ita-nia istória no ajuda ita atu hein namanas futuru neʼebé kapás hodi moris hamutuk ho ita-nia maluk kristaun iha mundu tomak.

Livru Haklaken iha série foun ho títulu “Husi ita-nia Arkivu”. Ida-neʼe sei mosu tinan ida dala haat iha Livru Haklaken estuda nian. Porezemplu, iha futuru ami planu atu fó sai informasaun no dezeñu sira neʼebé sei ajuda ita atu hatán pergunta sira tuirmai neʼe: Saida mak Dawn-Mobile? Sé deʼit mak uza ida-neʼe no bainhira? Sira uza ida-neʼe ba saida? Ami fó laran-manas ba imi atu buka-hatene kona-ba informasaun neʼebé série foun neʼe sei fó sai.

Hanesan album foto nian neʼebé ita rai, fó-hanoin ita kona-ba ita-nia família nia istória, buat sira neʼebé rai iha Arkivu hanorin buat barak mai ita kona-ba ita-nia maluk kristaun sira husi tempu uluk. Porezemplu, kona-ba sira-nia fiar no aten-brani, kona-ba haksolok no susar neʼebé sira hasoru nuʼudar sira serbí ita-nia Aman iha lalehan, no kona-ba oinsá Maromak ajuda no tau matan ba ninia povu. (Deut 33:27) Ita bele fiar katak Maromak Jeová sei haraik ninia bensaun ba ita-nia hakaʼas-an atu hanoin nafatin ita-nia organizasaun nia istória, hodi nuneʼe ita bele halo nafatin ninia hakarak ho unidade.

[Kaixa/Dezeñu iha pájina 31]

Kona-ba Departamentu Arkivu

Kuandu irmaun sira prepara ita-nia livru no DVD sira neʼebé koʼalia kona-ba Bíblia, sira neʼebé hakerek, pinta dezeñu, no sira neʼebé buka-hatene informasaun liután uza mós buat neʼebé rai hela iha Arkivu. Tan neʼe, Departamentu Arkivu kontinua atu halibur no tau matan didiʼak dokumentu no sasán sira neʼebé tuan, no sira hetan buat sira-neʼe husi sukursál sira, departamentu oioin iha Betel, kongregasaun sira, husi ema, no husi organizasaun seluk. Departamentu Arkivu nia serbisu envolve saida deʼit? Mai ita haree toʼok.

Halibur no estuda didiʼak: Toʼo agora, sasán sira neʼebé úniku kontinua aumenta iha Arkivu. Dala barak sasán sira-neʼe husi ema neʼebé sira-nia família serbí Jeová ho laran-metin husi tempu uluk. Hodi estuda didiʼak kona-ba sasán sira-neʼe no kompara ho sasán seluk ajuda ita atu komprende liután ita-nia istória no sira neʼebé moris iha tempu uluk.

Halo lista: Iha sasán rihun ba rihun neʼebé rai hela iha Arkivu, sasán balu husi tinan atus ida liubá. Sasán sira-neʼe haree la hanesan no boot la hanesan. Irmaun sira presiza hakerek iha lista sasán ida-idak hodi nuneʼe fasil atu hetan kuandu atu uza iha futuru.

Hadiʼa hodi bele tahan ba tempu kleur: Baibain sasán no livru antigu aat lalais, entaun irmaun sira uza dalan oioin atu hadiʼa buat sira-neʼe hodi bele tahan ba tempu kleur. Irmaun sira hatama iha komputadór dokumentu, foto, filme, buat neʼebé ema grava, no notísias ruma husi jornál, rádiu, ka televizaun. Nuneʼe, kuandu uza fali sasán antigu sira-neʼe, sira foti deʼit husi komputadór hodi la estraga ida neʼebé orijinál.

Haloot ho didiʼak: Sasán sira iha Arkivu haloot ho didiʼak hodi la lakon no hodi bee no naroman labele estraga. Agora daudaun irmaun sira iha Arkivu hakerek informasaun hotu kona-ba sasán ida-idak, hodi nuneʼe irmaun sira neʼebé buka informasaun atu uza iha ita-nia livru sira bele hetan lalais sasán folin-boot sira-neʼe.

[Dezeñu iha pájina 32]

1. Poster ba “Foto-Drama kona-ba Kriasaun”. 2. Lista ema neʼebé hameno livru. 3. Karreta ho koluna neʼebé hasai lian boot. 4. Livru Haklaken 15 Abríl 1912. 5. Surat atu bolu J. F. Rutherford tama komarka. 6. Mikrofone estasaun rádiu WBBR. 7. Fonógrafu. 8. Mala livru nian. 9. Ema nia nota. 10. Telegrama ba J. F. Rutherford.