Ita neʼebé “hatene ona Maromak” presiza halo saida?
“Imi hatene ona Maromak.”—GAL 4:9.
1. Tanbasá mak pilotu sira presiza haree didiʼak buat neʼebé hakerek iha lista antes aviaun atu semo?
EMA neʼebé serbisu nuʼudar pilotu, antes nia atu lori aviaun, nia presiza haree didiʼak buat 30 liu neʼebé hakerek iha lista atu haree se buat hotu iha aviaun neʼe laʼo ho diʼak. Se nia la halo nuneʼe, ida-neʼe bele lori perigu boot. Maski pilotu sira neʼebé iha esperiénsia barak ona, sira mós presiza haree didiʼak tuir lista neʼe.
2. Ema kristaun sira presiza haree didiʼak kona-ba saida?
2 Hanesan ho pilotu sira, ita mós bele uza lista ida hodi haree didiʼak se ita-nia fiar metin nafatin ka lae. Maski ita foin hetan batizmu ka tinan barak ona iha lia-loos, ita hotu presiza haree beibeik kona-ba ita-nia fiar. Se ita la halo nuneʼe, ida-neʼe bele lori perigu tanba ita bele lakon ita-nia relasaun diʼak ho Jeová. Tan neʼe, Bíblia fó avizu hodi dehan: “Ema neʼebé hanoin katak nia hamriik metin, matan-moris bá atu nia labele monu.”—1 Kor 10:12.
3. Ema kristaun iha Galásia presiza halo saida?
3 Jesus nia sakrifísiu loke dalan ba ema kristaun atu bele hatene Maromak iha dalan neʼebé furak tebes, neʼe mak atu sira bele sai Maromak nia oan. Maibé ema kristaun iha Galásia presiza haree didiʼak kona-ba sira-nia fiar. (Gal 4:9) Atu sira bele sai Maromak nia oan, sira labele simu hanorin husi ema neʼebé kaer metin ba relijiaun judeu nian, neʼebé dehan katak sira tenke halo tuir nafatin Moisés nia Ukun-Fuan. Tuir loloos, Maromak la uza ona Ukun-Fuan neʼe, no ema jentiu sira iha kongregasaun kristaun nunka iha Ukun-Fuan nia okos! Tan neʼe, ema kristaun judeu no jentiu sira presiza laʼo ba oin iha lia-loos, hodi rekoñese katak la presiza ona atu halo tuir Moisés nia Ukun-Fuan.
HAKAT SIRA ATU HATENE MAROMAK
4, 5. Paulo fó konsellu saida ba ema kristaun iha Galásia? Tanbasá mak ninia karta importante mós mai ita ohin loron?
4 Iha apóstolu Paulo nia karta ba ema kristaun iha Galásia, nia fó konsellu ba ema kristaun loos atu labele husik lia-loos no labele fila fali ba buat uluk nian neʼebé sira husik tiha ona. Sin, liuhusi Paulo, Maromak Jeová fó konsellu ba ninia atan sira hotu atu hamriik metin nafatin iha adorasaun neʼebé loos.
5 Ita hotu presiza hanoin-hetan desizaun neʼebé ita halo ona atu serbí Jeová. Hanoin toʼok kona-ba pergunta sira tuirmai neʼe: Ita hanoin-hetan hakat saida deʼit mak ita halo antes atu hetan batizmu? Ita hanoin-hetan oinsá mak ita hatene kona-ba Maromak no oinsá ita sente kuandu Maromak haree ona ita nuʼudar ninian?
6. Ita sei koʼalia kona-ba lista saida?
6 Atu bele tama lia-loos, ita hotu presiza halo uluk hakat sia. (Haree kaixa “Hakat sira atu hetan batizmu no kontinua laʼo ba oin”.) Ita bele haree hakat sira-neʼe nuʼudar lista ida atu hametin ita-nia fiar no atu labele fila fali ba buat mundu neʼe nian. Hanesan ho pilotu sira neʼebé haree didiʼak ba lista antes aviaun atu semo, ita mós presiza haree beibeik ba ita-nia lista.
SIRA NEʼEBÉ MAROMAK HATENE ONA KONTINUA LAʼO BA OIN
7. Ita presiza komprende kona-ba saida? Tanbasá?
7 Hanesan ho pilotu neʼebé haree didiʼak ba ninia lista antes atu lori aviaun, ita mós presiza haree didiʼak kona-ba oinsá ita laʼo ba oin iha lia-loos. Paulo hakerek ba Timóteo hodi dehan: “Haree nuʼudar doutrina loos liafuan sira neʼebé ó rona husi haʼu, iha fiar no domin neʼebé iha Kristu Jesus.” (2 Tim 1:13) “Doutrina loloos” neʼe inklui hanorin hotu husi Maromak nia Liafuan. (1 Tim 6:3) Hanesan dezeñu ajuda ita atu komprende buat ruma, nuneʼe mós “doutrina loos” ajuda ita atu komprende lia-loos kona-ba buat neʼebé Jeová hakarak ita atu halo. Nuneʼe, mai ita koʼalia kona-ba hakat sira neʼebé ita halo antes atu hetan batizmu hodi haree se ita nafatin halo tuir lia-loos neʼe ho didiʼak ka lae.
8, 9. (a) Maski ita hetan ona batizmu, saida mak ita presiza halo? (b) Esplika toʼok tansá mak importante atu kontinua sai “boot” iha dalan espirituál.
8 Hakat primeiru antes atu hetan batizmu mak hatene didiʼak kona-ba Maromak hodi estuda Bíblia. Depois, ita hametin ita-nia fiar. Maibé, ita presiza kontinua aumenta ita-nia koñesimentu kona-ba Maromak no hametin nafatin ita-nia fiar. (2 Tes 1:3) Maski ita hetan ona batizmu, ita presiza haburas nafatin ita-nia relasaun diʼak ho Jeová.
Hanesan ho ai-hun, ita mós presiza kontinua sai “boot” iha dalan espirituál
9 Ita bele kompara ida-neʼe ho ai-hun neʼebé sai boot ba beibeik. Ai-hun balu bele sai boot tebetebes, liuliu kuandu sira-nia abut sai naruk no metin iha rai-okos. Porezemplu, ai-sedru iha rai-Líbanu sai aas toʼo metru 37 ho hun mahar tebes no abut boot. (Cân 5:15) Foufoun ita haree ai-hun hanesan neʼe sai boot lalais, maibé depois neʼe, ita ladún haree oinsá ai neʼe nia hun neineik-neineik kontinua sai mahar no abut sai naruk liután. Nuneʼe mós ho ema kristaun. Kuandu ita komesa estuda Bíblia, ita troka buat barak iha ita-nia moris, no depois hetan batizmu. Karik tanba ita laʼo ba oin lalais iha lia-loos, ita-nia maluk kristaun sira iha kongregasaun kontente atu haree ida-neʼe. Karik ita balu komesa serbí nuʼudar pioneiru ka hetan knaar oioin iha kongregasaun. Maibé depois neʼe, ema ladún haree ona oinsá mak ita neineik-neineik kontinua laʼo ba oin. Maski nuneʼe, ita presiza nafatin atu hametin ita-nia fiar no hatene diʼak liután kona-ba Maromak hodi bele sai “ema boot loloos ona, hanesan ho Kristu rasik”. (Ef 4:13) Hodi halo nuneʼe, ita bele sai boot ba beibeik iha dalan espirituál, hanesan ai kiʼik ida sai ai-hun neʼebé boot no metin.
10. Tanbasá mak ema kristaun neʼebé kleur ona iha lia-loos mós presiza kontinua sai boot liután iha dalan espirituál?
10 Maibé, ita labele para atu sai boot liután iha dalan espirituál. Ita presiza kontinua aumenta ita-nia koñesimentu kona-ba Maromak nia Liafuan no hametin liután ita-nia fiar tanba hodi halo nuneʼe mak ita bele sai metin iha lia-loos, hanesan abut sai naruk no metin iha rai-okos. (Prov 12:3) Iha kongregasaun, ita iha maluk kristaun barak neʼebé halo hanesan neʼe. Porezemplu, irmaun ida neʼebé serbí nuʼudar katuas kristaun ba tinan 30 liu ona, nia hakaʼas an nafatin atu laʼo ba oin iha lia-loos. Nia hatete katak nia hafolin liután Bíblia. Nia nafatin aprende dalan foun oioin kona-ba oinsá Bíblia bele ajuda nia atu halo desizaun, no ninia haksolok ba serbisu haklaken aumenta ba beibeik.
HAKBESIK LIUTÁN BA MAROMAK
11. Atu hatene liután kona-ba Jeová, saida deʼit mak ita presiza halo?
11 Atu laʼo ba oin nafatin iha lia-loos, ita tenke hakbesik liután ba Jeová nuʼudar ita-nia Belun no Aman. Maromak Jeová hakarak ita atu sente katak nia hadomi ita no proteje ita hanesan labarik ida sente kuandu ninia inan ka aman hakoʼak nia, ka hanesan ita sente kuandu ita hamutuk ho ita-nia belun neʼebé diʼak. Maibé, atu hatene Jeová diʼak liután no atu ita-nia relasaun ho nia sai besik liután, ita presiza uza tempu atu lee Bíblia loroloron. Ita mós presiza lee Livru Haklaken, Matan-moris bá!, no ita-nia livru sira seluk.
12. Atu hametin ita-nia relasaun ho Jeová, ita presiza halo saida deʼit?
12 Atu hametin ita-nia relasaun ho Jeová, ita mós presiza halo orasaun no halibur hamutuk ho maluk sira neʼebé hadomi nia. (Lee Malaquias 3:16. a) Jeová ‘see tilun ba ita-nia orasaun’. (1 Ped 3:12) Hanesan ho aman neʼebé hadomi ninia oan, Jeová mós rona ba ita kuandu ita husu ninia ajuda. Tan neʼe, ita ‘labele kole atu harohan’. (Rom 12:12) Se ita la husu ajuda husi Jeová, ita la bele iha forsa atu hamriik metin nafatin iha lia-loos. Mundu aat neʼe iha tentasaun barak toʼo ita la bele tahan hotu ho ita-nia forsa rasik, maibé Jeová prontu atu ajuda ita se ita husu nia. Ita halo orasaun ba Jeová hanesan ita koʼalia ba ita-nia belun neʼebé ita tau fiar ka lae? Ita iha buat ruma neʼebé ita presiza hadiʼa kona-ba ita-nia orasaun ka lae?—Jer 16:19.
13. Atu bele hakbesik liután ba Jeová, tanbasá mak ita presiza tuir reuniaun beibeik?
13 Ita presiza besik nafatin ho kongregasaun hodi bele hamutuk ho ita-nia maluk neʼebé iha relasaun diʼak ho Jeová tanba nia hadomi ema neʼebé “buka protesaun iha nia”. (Naum 1:7) Tanba mundu neʼe nakonu ho buat neʼebé halo ita laran-tun, ita presiza duni atu halibur hamutuk ho ita-nia maluk kristaun sira. Kuandu ita halo nuneʼe, ita bele ajuda malu atu sai metin iha lia-loos no sira sei book ita atu hatudu domin no “halo hahalok diʼak”. (Ebr 10:24, 25) Maibé se ita la halibur malu ho ita maluk kristaun sira iha kongregasaun, ita la bele halo tuir Paulo nia konsellu atu haburas domin ba malu. Tan neʼe, mai ita badinas nafatin atu tuir reuniaun beibeik no hola parte iha reuniaun hodi fó komentáriu.
14. Tanbasá mak ita presiza sai prontu nafatin atu arrepende an no halo mudansa iha ita-nia moris?
14 Kuandu ita sai ema kristaun, ita hotu arrepende an hodi hakribi ita-nia sala no fila hikas ba dalan neʼebé loos. Maibé, ita presiza sai prontu nafatin atu arrepende an no halo mudansa iha ita-nia moris. Tanbasá? Tanba ita ema sala-naʼin no iha fraku. Sala mak hanesan samea neʼebé hakarak atu tata ita kedas kuandu nia hetan oportunidade. (Rom 3:9, 10; 6:12-14) Tan neʼe, ita presiza duni atu rekoñese ida-neʼe. Se ita hakaʼas an atu luta hasoru ita-nia fraku, Jeová sei hatudu pasiénsia mai ita. (Flp 2:12; 2 Ped 3:9) Buat ida neʼebé ajuda ita mak uza ita-nia tempu no forsa atu serbí Jeová duké buka ita rasik nia diʼak. Irmán ida neʼebé iha lia-loos husi kiʼik, nia hanoin katak nia tenkesér taʼuk tebes ba Jeová, no sente katak nia la bele halo Jeová kontente. Nia la sente besik ho Jeová, no ikusmai nia halo desizaun sala barak iha ninia moris. Nia dehan: “Ida-neʼe laʼós tanba haʼu la hadomi Jeová, maibé tanba haʼu la hatene didiʼak nia. Maibé haʼu halo orasaun ho laran, no haʼu komesa fila fali ba dalan neʼebé loos.” Nia hatutan tan: “Haʼu haree katak Jeová hamutuk ho haʼu hanesan aman hamutuk ho ninia oan, nia ajuda haʼu ho laran-diʼak atu hasoru susar oioin hodi hatudu ba haʼu buat neʼebé haʼu presiza halo.”
15. Jeová no Jesus haree no hafolin saida?
15 Ita mós presiza kontinua haklaken ba ema seluk. Maromak nia anju haruka Pedro no apóstolu sira seluk atu halo ida-neʼe kuandu sira sai livre husi kadeia ho milagre. (Apos 5:19-21) Ita mós presiza haree didiʼak se ita iha toman ka lae atu hola parte iha serbisu haklaken semana-semana. Jeová no Jesus haree ita-nia fiar no hafolin ita-nia serbisu haklaken. (Apok 2:19) Sin, ita tenke haree serbisu haklaken nuʼudar buat ida neʼebé importante tebes iha ita-nia moris.
16. Tanbasá mak diʼak atu hanoin beibeik kona-ba ita-nia dedikasaun ba Jeová?
16 Ita mós presiza hanoin beibeik kona-ba ita-nia dedikasaun. Buat neʼebé folin-boot liu hotu mai ita mak ita-nia relasaun ho Jeová. Maromak hatene ema hotu neʼebé sai ona ninian. (Lee Isaías 44:5. b) Tan neʼe, ita presiza hanoin didiʼak kona-ba ita-nia relasaun ho Jeová, no halo orasaun hodi husu Jeová nia ajuda atu hametin liután ita-nia relasaun ho nia. Ita mós presiza hanoin nafatin kona-ba ita-nia batizmu no labele haluha data neʼe. Kuandu ita hetan batizmu ita hatudu ba ema seluk katak ita dedika ona ita-nia an ba Jeová, no ida-neʼe mak desizaun importante tebes neʼebé ita halo iha ita-nia moris.
HAKBESIK NAFATIN BA JEOVÁ HODI LA KOLE
17. Tanbasá mak ita presiza tahan susar oioin hodi bele hakbesik nafatin ba Jeová?
17 Paulo hatete ba ema kristaun iha Galásia atu labele kole atu tahan susar oioin. (Gal 6:9) Nuneʼe mós ho ema kristaun ohin loron. Maski ita hasoru susar oioin, Jeová sei ajuda ita. Tan neʼe, mai ita nafatin halo orasaun hodi husu ninia espíritu santu. Jeová sei ajuda ita atu sente haksolok no dame iha laran maski ita hasoru susar oioin. (Mt 7:7-11) Hanoin toʼok kona-ba neʼe: Jeová tau matan ba manu iha lalehan, sá tan ho ita ema neʼebé hadomi nia no dedika an ona ba nia. (Mt 10:29-31) Tan neʼe, maski ita hasoru susar naran deʼit, keta rende an hodi husik lia-loos. Jeová hatene ita nuʼudar ninian, no nia sei haraik bensaun barak mai ita!
18. Ita neʼebé “hatene ona Maromak” presiza halo saida?
18 Maski ita foin hetan batizmu ka kleur ona iha lia-loos, ita hotu presiza halo saida? Ita presiza kontinua hatene Jeová ho diʼak liután no sai boot nafatin iha dalan espirituál. Ita presiza kuidadu atu labele hanoin katak ita hatene didiʼak ona Jeová no la presiza hakbesik liután ba nia. Tan neʼe, diʼak ba ita hotu atu dala ruma haree fila fali lista neʼebé ita foin estuda iha lisaun neʼe. Hodi halo nuneʼe, ita sei hakbesik nafatin ba Jeová, ita-nia Aman, Belun, no Maromak.—Lee 2 Korinto 13:5, 6.
a Malaquias 3:16: “Iha tempu neʼebá, sira neʼebé taʼuk ba Jeová koʼalia ba malu, sira ida-idak ho nia maluk, no Jeová kontinua atu see tilun no rona ba sira. No iha nia oin komesa hakerek livru ida hodi hanoin-hetan sira neʼebé taʼuk ba Jeová no ba sira neʼebé hanoin kona-ba nia naran.”
b Isaías 44:5: “Ema neʼe sei hatete: ‘Haʼu Jeová ninian.’ No ema seluk sei bolu ninia an hodi Jacob nia naran, no ida fali sei hakerek iha ninia liman: ‘Jeová ninian.’ No nia sei hanaran ninia an hodi Israel nia naran.”
