PASCAL sai boot iha área neʼebé kiak iha rai-Kosta Marfín. Nia hakarak tebes atu moris diʼak liu. No nuʼudar ema neʼebé halo desportu tinju, nia hanoin: ‘Iha neʼebé mak haʼu bele hetan naran-boot no sai riku?’ Kuandu nia maizumenus tinan 25, nia hanoin katak iha rai-Europa ninia mehi bele sai realidade. Maibé tanba nia la iha dokumentu sira, nia tenke tama ilegál.

Iha tinan 1998, kuandu Pascal tinan 27, nia komesa halo viajen. Nia hakat fronteira hodi tama ba rai-Gana, depois neʼe rai-Togu no rai-Benín. Ikusmai nia toʼo iha sidade Birni Nkonni iha rai-Nijer. Maibé ninia viajen sai perigu liután. Pascal nia planu mak atu saʼe trek hodi liu rai-maran Saara. Se nia bele toʼo Tasi Mediterráneu, nia sei saʼe ró atu bá Europa. Maibé nia la konsege toʼo neʼebá tanba buat rua hanetik nia iha rai-Nijer.

Primeiru, ninia osan la toʼo. Segundu, nia hasoru irmaun pioneiru ida naran Noé no komesa estuda Bíblia. Buat neʼebé Pascal aprende book ninia laran no troka ninia planu atu hetan naran-boot no sai riku. Agora, nia hakarak moris tuir Maromak nia hakarak. Iha tinan 1999, Pascal hetan batizmu. Tanba nia hakarak hatudu ninia agradese ba Jeová, nia foti pioneiru regulár iha rai-Nijer, iha sidade neʼebé nia hetan lia-loos. Pascal sente oinsá kona-ba ninia serbisu pioneiru? Nia hatete: “Haʼu-nia moris kapás tebes!”

Hanesan Pascal, irmaun-irmán barak sai kontente liu hodi tau uluk Maromak nia hakarak iha sira-nia moris. Hodi halo nuneʼe, sira balu husik sira-nia hela-fatin iha Europa hodi muda ba Áfrika atu serbí iha fatin neʼebé presiza haklaken-naʼin barak liután. Testemuña ba Jeová maizumenus naʼin-65 husi Europa, entre tinan 17 no 70, muda ba rai-Benín, Burkina Faso, Nijer no Togu a iha Áfrika Oeste hodi haklaken iha neʼebá. Saida mak book sira atu foti desizaun boot hanesan neʼe? Sira hetan susesu ka lae?

Anne-Rakel husi rai-Dinamarka hatete: “Uluk haʼu-nia inan-aman serbí nuʼudar misionáriu iha rai-Senegál. Sira sempre konta ho laran-manas kona-ba tempu neʼe no ida-neʼe book haʼu hodi hakarak moris hanesan.” Maizumenus tinan 15 liubá, kuandu Anne-Rakel tinan 20 liu, nia muda ba rai-Togu hodi serbí iha kongregasaun ba ema tilun-diuk sira. Ninia desizaun book ema seluk ka lae? Nia hatete: “Liutiha tempu balu, haʼu-nia alin-feto no alin-mane mós muda iha neʼe.”

 Irmaun Aurele, kaben-naʼin husi rai-Fransa neʼebé tinan 70, hatete: “Tinan lima liubá, haʼu komesa simu pensaun, no haʼu tenke foti desizaun—atu moris hakmatek iha rai-Fransa hodi hein ba mundu foun, ka aumenta serbisu haklaken.” Aurele hili atu aumenta ninia serbisu haklaken. Besik tinan tolu liubá, Aurele no ninia feen Albert-Fayette, muda ba rai-Benín. Aurele hatete: “Hodi fó ami-nia an atu serbí Jeová mak desizaun diʼak liu hotu.” Ho oin-midar, nia hatutan tan: “No afinál, iha ami-nia haklaken fatin parte balu mak hanesan mundu foun ba ami.”

Tinan 16 liubá, Clodomir no ninia feen Lysiane, muda husi rai-Fransa ba rai-Benín. Foufoun, sira hanoin tebes sira-nia família no belun sira iha Fransa, no hanoin barak katak sira sei nunka toman ho fatin foun. Maibé tuir loloos, sira la iha razaun atu hanoin barak tanba sira hetan haksolok tebes. Clodomir hatete: “Durante tinan 16, ami ajuda ema barak atu simu lia-loos, maizumenus tinan-tinan ema ida.”

Kaben-naʼin husi rai-Fransa naran Sébastien no Johanna mós muda ba rai-Benín iha tinan 2010. Sébastien hatete: “Iha kongregasaun neʼe, ami iha buat barak atu halo. Hodi serbí iha neʼe mak hanesan hetan treinu makaʼas husi Jeová.” Ema simu lia-loos ka lae? Johanna hatete: “Ema sente hamrook ba lia-loos. Kuandu ami laʼo pasiar deʼit, ema hapara ami hodi husu pergunta kona-ba Bíblia no atu simu livru.” Oinsá mak sira-nia desizaun atu muda kona sira-nia moris kaben nian? Sébastien hatete: “Ami-nia moris kaben nian sai metin liután. Haʼu sente kontente atu haklaken hamutuk ho haʼu-nia feen loron tomak.”

Eric no ninia feen Katy mós serbí nuʼudar pioneiru iha rai-Benín parte norte. Tinan 10 liubá, kuandu sira sei iha rai-Fransa, sira komesa lee ita-nia livru sira kona-ba rai neʼebé presiza haklaken-naʼin, no koʼalia ho irmaun-irmán pioneiru sira. Ida-neʼe book sira atu muda ba rai seluk iha tinan 2005. Sira kontente atu haree ema barak tama lia-loos. Eric hatete: “Tinan rua liubá, ami-nia grupu iha sidade Tanguiéta iha haklaken-naʼin 9, maibé agora naʼin-30. Domingu-domingu ema naʼin-50 toʼo 80 tuir reuniaun. Hodi haree kongregasaun sai boot hanesan neʼe mak buat neʼebé furak, la bele kompara ho buat seluk!”

Irmaun-irmán neʼebé muda ba rai seluk hodi ajuda serbisu haklaken hasoru susar saida deʼit? Anne-Rakel iha alin naran Benjamin neʼebé tinan 33. Iha tinan 2000, kuandu nia sei iha rai-Dinamarka, nia hasoru misionáriu ida neʼebé serbí iha rai-Togu. Benjamin hatete: “Kuandu haʼu hatete ba misionáriu neʼe katak haʼu hakarak foti pioneiru, nia dehan: ‘Karik ó bele pioneiru iha rai-Togu.’” Benjamin hanoin didiʼak kona-ba neʼe. Nia hatete: “Iha tempu neʼebá, haʼu seidauk tinan 20, maibé haʼu-nia biin naʼin-rua serbí ona iha rai-Togu. Ida-neʼe halo fasil ba haʼu atu muda ba neʼebá.” Maibé iha rai-Togu, Banjamin hasoru susar ida. Nia hatete: “Haʼu la hatene lia-fransés nein ida. Durante fulan neen mak susar tebes tanba la bele koʼalia ho ema.” Maibé liutiha tempu balu, nia hatene koʼalia lia-fransés. Agora Benjamin serbí iha Betel iha rai-Benín hodi haruka livru sira no ajuda iha departamentu komputadór nian.

Eric no Katy, neʼebé temi ona, bainhira sira iha rai-Fransa, sira serbí iha kongregasaun neʼebé koʼalia língua seluk. Maibé kuandu muda ba Benín, sira sente oinsá? Katy hatete: “Susar atu hetan uma neʼebé diʼak atu hela. Ba fulan barak ami hela iha uma neʼebé la iha eletrisidade no bee.” Eric hatutan tan: “Ami-nia viziñu loke múzika makaʼas toʼo kalan-boot. Ami tenke pasiénsia no toman ho situasaun foun.” Sira hatete: “Susar sira neʼebé ami hasoru mak kiʼik deʼit se kompara ho haksolok neʼebé ami hetan tanba serbí iha fatin neʼebé ema seidauk rona lia-loos.”

Michel no Marie-Agnès, neʼebé tinan lima liubá muda ba rai-Benín husi rai-Fransa, foufoun sira mós sente laran-susar. Michel neʼebé agora besik tinan 60, hatete: ‘Ema balu hanoin katak ami-nia desizaun atu muda mak perigu! Neʼe loos, ita sente taʼuk se ita la fiar katak Jeová mak apoia ita. Maski ami muda hodi serbí Jeová, maibé tuir loloos, Jeová mak ajuda ami.’

Irmaun-irmán sira neʼebé muda ba rai seluk hodi ajuda haklaken hatete katak importante atu halo tuir hakat tuirmai neʼe: Halo planu didiʼak, sai toman ho situasaun foun, la gasta osan demais, no tau fiar ba Jeová.—Lucas 14:28-30.

Irmaun Sébastien neʼebé temi uluk, hatete: “Antes atu muda, Johanna ho haʼu hakaʼas an atu rai osan ba tinan rua duké gasta atu halimar no hola sasán  arbiru deʼit.” Sira serbisu iha Europa tinan ida fulan rua ka liu, hodi bele serbí nuʼudar pioneiru ba tinan tomak iha rai-Benín.

Maizumenus irmán klosan naʼin-20 mak muda ba Áfrika Oeste husi rai seluk. Ida mak Marie-Thérèse. Iha rai-Fransa, nia serbisu nuʼudar xofér bís, maibé iha tinan 2006, nia foti feriadu ba tinan ida atu pioneiru iha rai-Nijer. Ikusmai, nia hakarak serbí nafatin iha Nijer. Marie-Thérèse hatete: “Kuandu haʼu fila fali ba Fransa, haʼu husu haʼu-nia patraun atu troka haʼu-nia planu kona-ba serbisu, no nia hatán. Agora, haʼu serbisu nuʼudar xofér bís husi fulan-Maiu toʼo Agostu, no husi Setembru toʼo Abríl, haʼu pioneiru iha rai-Nijer.”

Sira neʼebé “buka uluknanain” Maromak nia Ukun bele tau fiar katak Jeová sei tau matan ba sira-nia presiza. (Mateus 6:33) Ezemplu ida mak Saphira husi rai-Fransa, neʼebé pioneiru iha rai-Benín. Iha tinan 2011, nia fila ba ninia rai atu serbisu hodi manán osan neʼebé natoon atu serbí tinan ida tan iha Áfrika. Saphira hatete: “Iha loron-sesta mak loron ikus ba haʼu atu serbisu, maibé haʼu presiza serbisu ba loron sanulu tan hodi haʼu-nia osan bele toʼo ba tinan ida iha Benín. No haʼu iha semana rua deʼit iha Fransa. Kona-ba situasaun neʼe, haʼu halo orasaun ba Jeová. Lakleur, kompañia ida neʼebé fahe serbisu telefone haʼu atu serbisu hodi troka ema seluk nia fatin ba semana rua.” Loron-segunda, Saphira bá serbisu-fatin foun hodi simu treinu husi ema neʼebé atu falta serbisu. Saphira hatete: “Haʼu hakfodak tebes tanba ema neʼe mak irmán ida neʼebé presiza falta serbisu hodi tuir Eskola Serbisu Pioneiru! Ninia patraun lakohi fó feriadu ba irmán neʼe se nia la hetan ema seluk atu troka ninia fatin. Nia mós husu Jeová atu ajuda nia, hanesan haʼu.”

Irmaun-irmán balu hela kleur iha Áfrika Oeste no haree rai neʼe hanesan sira rasik nia rai. Irmaun seluk tan hela iha neʼe ba tinan balu deʼit no depois fila fali ba sira rasik nia rai. Maski nuneʼe, esperiénsia neʼebé sira hetan sei ajuda sira-nia moris, tanba sira hatene katak haksolok neʼebé loos mak mai husi serbisu ba Jeová.