1, 2. Oinsá Jeová nia haree ba ninia atan sira?

 DALA ruma ita nuʼudar inan-aman hakfodak hodi haree ita-nia oan ida-idak nia matenek. Karik ida matenek iha desportu, ida seluk hatene pinta dezeñu, no seluk tan matenek hodi inventa buat oioin. Maski sira ida-idak iha matenek neʼebé la hanesan, ita sempre kontente hodi ajuda oan sira haburas sira-nia matenek neʼe.

² Jeová mós iha interese ba ninia oan sira iha rai. Nia haree ninia atan sira nuʼudar “buat sira neʼebé folin-boot husi nasaun” tanba sira hatudu laran-metin ba nia. (Ageu [Hagai] 2:7) Maibé, kuandu ita koñese ita-nia irmaun-irmán sira, ita mós haree katak sira ida-idak iha matenek oioin. Porezemplu, irmaun balu matenek atu hatoʼo diskursu, balu tan hatene organiza buat oioin iha kongregasaun. Irmán balu iha matenek atu aprende língua seluk hodi aumenta sira-nia serbisu haklaken, no balu tan hatene oinsá atu tau matan ba ema moras ka fó laran-manas ba ema. (Roma 16:1, 12) Ita haksolok tebes hodi bele hamutuk ho irmaun-irmán sira hanesan neʼe iha ita-nia kongregasaun.

3. Iha lisaun neʼe, ita sei koʼalia kona-ba pergunta saida deʼit?

 ³ Maibé, ema kristaun balu, liuliu joven sira ka ema neʼebé foin hetan batizmu, sira seidauk hatene saida mak sira bele halo iha kongregasaun. Entaun, oinsá mak ita bele ajuda sira atu laʼo ba oin iha Jeová nia organizasaun? Tanbasá mak ita presiza halo tuir Jeová nia ezemplu hodi buka-hatene sira-nia matenek?

4, 5. Jeová haree hahalok saida deʼit husi Jideaun? Ita bele aprende saida husi Jeová nia ezemplu?

⁴ Bíblia hatudu katak Jeová haree ninia atan sira-nia matenek, maibé liután neʼe, nia mós haree oinsá sira-nia matenek bele aumenta iha futuru. Porezemplu, bainhira Jeová hili Jideaun atu funu hasoru ema Midian neʼebé domina povu Izraél, karik Jideaun sente hakfodak ho anju nia liafuan neʼebé dehan: “Jeová hamutuk ho ó, ó asu-waʼin.” Tuir Jideaun nia hanoin, nia la iha kbiit nuʼudar “asu-waʼin” atu salva Maromak nia povu. Maibé, Jeová haree katak nia bele uza duni Jideaun.—Lee Juízes (Hakim-Hakim) 6:11, 12. a

⁵ Jeová iha fiar ba Jideaun atu salva Izraél tanba nia haree Jideaun nia kbiit no matenek oioin. Porezemplu, Jeová haree oinsá Jideaun uza ninia forsa tomak hodi baku trigu-kain. Baibain toʼos-naʼin sira halo ida-neʼe iha liʼur hodi aproveita anin huu sai trigu kulit, maibé Jideaun halo ninia serbisu subasubar iha sama uvas fatin atu nuneʼe ema Midian labele hadau. Iha Jeová nia oin, Jideaun mak ema badinas, maibé liután neʼe, nia mós halo desizaun matenek hodi sees husi perigu. Sin, Jeová haree Jideaun nia kapasidade no fó treinu ba nia.

6, 7. (a) Jeová nia haree ba Amós la hanesan ho ema Izraél nian. Oinsá? (b) Saida deʼit mak hatudu katak Jeová la hili sala Amós?

⁶ Jeová mós haree profeta Amós nia kapasidade neʼebé ema la haree. Profeta Amós haree hanesan ema baibain deʼit, neʼebé serbisu iha toʼos no hein bibi. Tan neʼe, bainhira Jeová hili Amós atu fó sai ninia tesi-lia ba suku sanulu husi nasaun Izraél neʼebé adora buat falsu, karik ema balu hanoin katak Jeová hili sala profeta.—Lee Amós 7:14, 15. b

⁷ Maski Amós mai husi knua neʼebé dook husi sidade, maibé nia hatene buat barak kona-ba nasaun sira seluk nia kostume oioin no ukun-naʼin sira-nia hahalok. Karik nia hatene Izraél nia situasaun tanba nia rona husi ema neʼebé laʼo bá-mai liuhusi ninia knua hodi halo negósiu. (Amós 1:6, 9, 11, 13; 2:8; 6:4-6) Liután neʼe, ita bele dehan katak Amós mós hakerek-naʼin neʼebé diʼak. Nia uza liafuan simples no kroʼat. Nia brani atu fó sai Maromak nia kastigu ba amlulik aat Amazias. Jeová haree Amós nia matenek neʼebé karik ema seluk la haree, no hili nia hodi hatoʼo Ninia mensajen.—Amós 7:12, 13, 16, 17.

8. (a) Jeová promete saida ba David? (b) Tanbasá mak Salmo 32:8 fó laran-manas ba ema neʼebé sente sira-nia matenek la toʼo?

⁸ Jeová haree ninia atan hotu nia matenek no kbiit, no nia hakarak ajuda ita ida-idak atu uza kapasidade neʼe. Jeová promete ba Liurai David atu sempre ‘tau matan ba nia’ hodi fó matadalan neʼebé  David presiza. (Lee Salmo [Mazmur] 32:8. c) Tanbasá mak ida-neʼe fó laran-manas ba ita? Maski ita taʼuk ka la fiar an, maibé Jeová bele ajuda ita atu kumpre buat ruma neʼebé ita rasik nia matenek la toʼo. Hanesan aman ida neʼebé tau matan ba ninia oan nuʼudar nia aprende oinsá atu lori bisikleta, nuneʼe mós ho ita-nia Aman Jeová neʼebé sempre tau matan didiʼak ba ita hodi laʼo ba oin iha lia-loos. Liután neʼe, Jeová sei uza ita-nia maluk kristaun hodi ajuda ita halo nuneʼe. Maibé oinsá?

9. Oinsá mak ita bele halo tuir Paulo nia konsellu atu “buka” ema seluk nia diʼak?

⁹ Apóstolu Paulo fó laran-manas ba ema kristaun hotu atu ‘buka ema seluk nia diʼak’. (Lee Filipe 2:3, 4.) Ho liafuan sira-neʼe, Paulo hakarak hanorin ita atu buka-hatene hahalok diʼak sira husi ita-nia maluk no temi kona-ba neʼe. Entaun, ita sente oinsá bainhira ema ruma temi ita-nia hahalok diʼak? Baibain ida-neʼe book ita atu kontinua laʼo ba oin. Hanesan neʼe mós, se ita haree didiʼak ita-nia maluk no hafolin sira, ida-neʼe ajuda sira atu serbí Jeová ho laran-manas liután.

10. Liuliu sé deʼit mak presiza hetan laran-manas?

¹⁰ Ita hotu presiza hetan laran-manas husi ita-nia maluk. Maibé maluk joven no irmaun foun presiza hetan laran-manas atu envolve sira-nia an iha kongregasaun. Ida-neʼe sei ajuda sira atu sente katak sira hola parte duni iha Jeová nia organizasaun. Bíblia fó anima ba irmaun sira atu laʼo ba oin no kumpre kritériu hodi bele kaer responsabilidade tan iha kongregasaun. Maibé se ita ladún hatudu katak ita hafolin sira-nia serbisu, karik ida-neʼe sei hanetik sira atu aumenta serbisu ba Jeová.—1 Timóteo 3:1.

11. (a) Oinsá mak katuas kristaun ida ajuda irmaun joven ida atu laʼo ba oin? (b) Ita aprende saida husi ezemplu neʼe?

¹¹ Katuas kristaun ida naran Ludovic hatete: “Hodi hatudu interese ba irmaun seluk, ida-neʼe ajuda sira atu laʼo ba oin lalais.” Porezemplu, kona-ba irmaun joven ida naran Julien, Ludovic hatete: “Nia moedór no kuandu nia koko atu halo buat ruma iha kongregasaun, nia sente an no halaʼo ninia knaar ho sabraut uitoan. Maibé haʼu haree katak Julien mak ema neʼebé laran-diʼak tebes no sempre prontu atu ajuda ema seluk. Tan neʼe, duké hatún Julien, haʼu haree deʼit ba ninia hahalok diʼak sira hodi temi ida-neʼe no fó laran-manas ba nia.” Ida-neʼe ajuda Julien atu laʼo ba oin hodi sai atan ba kongregasaun, no agora nia mós serbí nuʼudar pioneiru regulár.

12. Hodi bele ajuda ita-nia maluk, ita presiza halo saida? Fó ezemplu.

¹² Se ita hakarak ajuda ita-nia maluk sira hodi laʼo ba oin iha Jeová nia organizasaun, ita labele haree deʼit ba sira-nia fraku, maibé presiza buka-hatene sira-nia matenek no hahalok diʼak. Jesus halo ida-neʼe ba apóstolu Pedro. Maski foufoun ninia dixípulu neʼe haree hanesan ema neʼebé la bele tau fiar, maibé Jesus hanaran nia Pedro, neʼebé iha arti “Fatuk”. Hodi nuneʼe, Jesus hatete nanis katak Pedro sei sai metin hanesan fatuk.—João 1:42.

13, 14. (a) Oinsá Barnabé nia haree ba joven Marcos? (b) Oinsá mak katuas ida ajuda irmaun Alexandre? (Haree dezeñu iha pájina 28.)

¹³ Mai ita hanoin kona-ba oinsá Barnabé ajuda João, neʼebé mós bolu Marcos. (Apóstolu 12:25) Durante Paulo nia viajen primeiru nuʼudar misionáriu, Marcos iha knaar atu ajuda Paulo ho Barnabé.  Maibé bainhira sira toʼo iha Pamfília, Marcos husik hela Paulo ho Barnabé, neʼebé sei presiza laʼo rai iha fatin neʼebé nakonu ho perigu. (Apóstolu 13:5, 13) Entaun, Barnabé halo saida? Duké haree Marcos nia fraku, karik Barnabé tau fokus ba Marcos nia hahalok diʼak hodi tau fiar ba nia. Lakleur, Barnabé fó treinu ba Marcos, neʼebé ikusmai sai metin iha lia-loos. (Apóstolu 15:37-39) Liutiha tinan balu, Marcos serbisu fali hodi ajuda Paulo neʼebé sai dadur iha Roma. No bainhira Paulo hakerek karta ba kongregasaun iha Koloso, nia gaba Marcos. (Koloso 4:10) Ita bele fiar katak Barnabé sente kontente kuandu Paulo husu Marcos atu ajuda nia.—2 Timóteo 4:11.

¹⁴ Irmaun ida naran Alexandre, neʼebé foin hetan knaar nuʼudar katuas kristaun, hanoin-hetan kona-ba irmaun ida neʼebé ajuda nia, hodi dehan: “Bainhira haʼu sei joven, susar tebes ba haʼu atu halo orasaun iha ema barak nia oin. Maibé irmaun katuas ida ajuda haʼu oinsá atu prepara an no la sente taʼuk. Liután neʼe, nia fó oportunidade beibeik mai haʼu atu halo orasaun iha grupu haklaken duké hasai knaar neʼe husi haʼu. Ikusmai, haʼu sai toman ona.”

15. Oinsá mak Paulo hatudu katak nia hafolin ninia maluk kristaun sira?

¹⁵ Kuandu ita haree ita-nia maluk kristaun nia hahalok diʼak ruma, ita gaba sira kona-ba neʼe ka lae? Iha livru Roma kapítulu 16, Paulo temi ninia maluk kristaun naʼin-20 liu ho sira-nia hahalok diʼak neʼebé kona nia laran. (Roma 16:3-7, 13) Porezemplu, Paulo gaba Andróniko ho Junias tanba sira-nia laran-metin no sira iha lia-loos kleur liu fali nia. Paulo mós temi kona-ba Rufo nia inan neʼebé hatudu laran-luak ba nia.

16. Kuandu ita gaba joven sira, ida-neʼe bele ajuda sira atu halo saida?

¹⁶ Kuandu ita mós gaba ema seluk, ida-neʼe sei lori rezultadu diʼak. Porezemplu, labarik-mane ida iha rai-Fransa, naran Rico, nia sente laran-tun tanba ninia aman neʼebé fiar la hanesan lakohi nia atu hetan batizmu. Tan neʼe, Rico hanoin barak katak nia tenke hein toʼo sai boot atu hetan batizmu. Rico mós triste tan tanba alunu seluk iha eskola goza nia kona-ba ninia fiar. Maibé katuas ida iha ninia kongregasaun naran Frederico, gaba nia hodi hatete: “Tanba ó hamriik hasoru terus neʼe, ó hatudu katak ó aten-brani hodi haklaken.” Liafuan sira-neʼe fó laran-manas ba Rico atu laʼo ba oin no mós atu hadiʼa relasaun ho ninia aman. Ikusmai kuandu Rico foin tinan 12, nia hetan batizmu.

17. (a) Oinsá ita bele ajuda ita-nia irmaun sira atu hakaʼas an liután? (b) Oinsá mak misionáriu ida ajuda maluk joven sira? Ida-neʼe lori rezultadu saida?

¹⁷ Bainhira ita fó-agradese ba ita-nia maluk kona-ba knaar neʼebé sira halaʼo, ida-neʼe bele book sira atu hakaʼas an liután hodi serbí Jeová. Irmán Silvia d neʼebé  serbí iha Betel ba tinan barak ona dehan katak diʼak se irmán sira mós gaba irmaun sira. (Provérbios [Amsal] 3:27) Dala ruma irmán sira nota ema seluk nia matenek oioin neʼebé irmaun sira haree liu deʼit. Hodi nuneʼe, irmaun sira bele hetan laran-manas laʼós deʼit husi irmaun sira neʼebé iha esperiénsia ona maibé mós husi irmán sira. Irmaun misionáriu ida iha rai-Giana Franseza naran Jerome ajuda irmaun joven barak atu sira mós sai misionáriu. Nia dehan: “Kuandu haʼu gaba irmaun joven sira kona-ba dalan neʼebé sira haklaken ka fó komentáriu, ida-neʼe sei halo sira aten-brani no matenek liután atu halo nuneʼe.”

18. Tanbasá mak diʼak atu serbisu hamutuk ho ita-nia irmaun joven sira?

¹⁸ Kuandu ita serbisu hamutuk ho ita-nia maluk kristaun, ida-neʼe bele book sira atu laʼo ba oin iha lia-loos. Porezemplu, katuas ida bele husu irmaun joven ida neʼebé hatene uza komputadór atu print informasaun ruma husi jw.org neʼebé fó laran-manas ba irmaun-irmán sira neʼebé idade. Ka, se ita presiza hadiʼa buat ruma iha Reuniaun-Fatin, ita bele husu joven ida atu serbisu hamutuk. Hodi halo hanesan neʼe, ita iha oportunidade atu koñese sira diʼak liután, gaba sira, no haree oinsá treinu neʼe lori rezultadu diʼak.—Provérbios (Amsal) 15:23.

19, 20. Tanbasá ita presiza ajuda joven no irmaun neʼebé foun atu laʼo ba oin?

¹⁹ Bainhira Jeová hili Josué atu sai ulun-naʼin ba Izraél, Nia haruka Moisés atu “hametin” no “fó laran-manas” ba nia. (Lee Deuteronômio [Ulangan] 3:28. e) Ohin loron, ema neʼebé tama ita-nia organizasaun aumenta ba beibeik. Ita presiza irmaun sira barak liután atu kaer responsabilidade hodi tau matan ba kongregasaun. Tan neʼe, ita hotu tenke ajuda maluk joven no irmaun neʼebé foun atu laʼo ba oin. Ida-neʼe sei fó laran-manas ba sira atu serbí Jeová tempu-tomak no “kumpre kritériu atu hanorin ema seluk”.—2 Timóteo 2:2.

²⁰ Maski ita iha kongregasaun neʼebé boot ka grupu neʼebé kiʼik, mai ita hotu hametin ita-nia organizasaun nia futuru. Hodi halo nuneʼe, ita banati-tuir Jeová, neʼebé sempre buka-hatene hahalok diʼak sira husi ninia atan.