Hakat hitu atu lee Bíblia

“Iha ema nia istória, ema faʼan Bíblia barak liu fali livru sira seluk. Laʼós neʼe deʼit, tinan-tinan ema nafatin faʼan Bíblia barak liu fali livru sira seluk.”—LIVRU TIME.

“Dala ruma haʼu lee Bíblia, maibé haʼu baruk atu mate ho buat neʼebé haʼu lee.”—KEITH, TOKADÓR IDA NARAN-BOOT HUSI RAI-INGLATERRA.

MASKI ema barak iha Bíblia rasik, maibé sira ladún aprende buat barak husi buat neʼebé sira lee. Ema seluk fali, hafolin buat neʼebé sira lee iha Bíblia. Porezemplu, feto ida naran Nancy hatete: “Husi tempu neʼebé haʼu komesa atu lee Bíblia dadeer-dadeer no hanoin kleʼan kona-ba buat neʼebé haʼu lee, haʼu sente katak haʼu prontu atu hasoru problema naran deʼit neʼebé mosu. Durante tinan 35, kuandu haʼu sente laran-kraik, buat neʼebé ajuda haʼu liu fali buat seluk mak toman atu lee Bíblia.”

Se Ita seidauk lee Bíblia, Ita sente hakfodak ka lae, atu hatene katak Bíblia ajuda ona ema iha sira-nia moris? Se Ita lee Bíblia beibeik, Ita hakarak komprende no sente ksolok liután hodi lee Bíblia ka lae? Se nuneʼe, koko atu halo tuir hakat hitu tuirmai neʼe.

HAKAT 1​—Lee ho razaun loos

▪ Karik Ita hakarak lee Bíblia tanba Bíblia iha liafuan neʼebé kapás, ka karik Ita sente katak Ita iha obrigasaun atu halo ida-neʼe, ka Ita sente katak Ita bele hetan konsellu kona-ba oinsá atu bele moris iha mundu neʼebé iha problema barak. Maibé, razaun diʼak liu atu Ita lee Bíblia mak hakarak atu aprende lia-loos kona-ba Maromak. No mós, Ita sei hetan buat diʼak barak se Ita-nia hakarak mak atu buka-hatene oinsá mak Bíblia nia mensajen kona Ita-nia moris.

Eskritura kompara Bíblia ho espellu atu hatudu katak importante atu lee Bíblia ho razaun loos. Bíblia hatete: “Basá ema rona deʼit liafuan karik, maibé la halo tuir nia, ema neʼe hanesan ema neʼebé hateke ba nia oin iha espellu no haree  duni nia oin rasik. Nia haree tiha didiʼak nia oin, hafoin haluha kedas nia ilas oinsá loos. Maibé ema neʼebé hateke didiʼak ba ukun-fuan loloos neʼebé soi ema, ema neʼebé tau duni nia laran ba nia, laʼós rona deʼit nia hafoin haluha kedas, ema neʼebé halo tuir duni nia, ema neʼe sei hetan Maromak nia bensa iha buat hotu neʼebé nia halo.”—Tiago 1:23-25.

Ema iha ezemplu neʼe haree ninia oin iha espellu maibé la halo buat ida atu hadiʼa nia an. Karik nia haree nia an lalais deʼit, ka karik nia ladún iha hakarak atu hadiʼa nia an. Hanesan neʼe mós ho ita, se ita ladún lee Bíblia ho didiʼak ka la halo tuir buat neʼebé ita lee, ida-neʼe sei ladún ajuda ita. Maibé, ita bele sente ksolok neʼebé loos se ita lee Bíblia tanba ita hakarak sai “ema neʼebé halo tuir”, no neʼebé husik Maromak nia hanoin atu hadiʼa ita-nia hanoin no hahalok.

HAKAT 2​—Hili tradusaun neʼebé diʼak

▪ Karik iha tradusaun Bíblia barak neʼebé Ita bele hili. Maski tradusaun hotu husi Maromak nia Liafuan bele ajuda Ita, maibé tradusaun balu uza liafuan neʼebé antigu ona ka aas demais no susar atu komprende. (Apostolu 4:13) Tradusaun balu troka Bíblia nia mensajen tanba ema nia lisan. Porezemplu, hanesan ita haree tiha ona iha livru neʼe, tradusaun balu troka Maromak nia naran Jeová ho títulu “Maromak” ka “Naʼi”. Nuneʼe bainhira hili tradusaun Bíblia, buka ida neʼebé tradús ho loloos no uza liafuan neʼebé fasil atu komprende.

Ema rihun ba rihun iha mundu tomak haree katak Tradusaun Mundu Foun mak klaru no fasil atu komprende. * Hanoin toʼok kona-ba katuas ida iha rai-Bulgária. Nia tuir reuniaun husi Testemuña ba Jeová no simu Bíblia Tradusaun Mundu Foun ida. Depois, nia hatete: “Haʼu lee ona Bíblia ba tinan barak, maibé haʼu seidauk lee tradusaun ida neʼebé hanesan neʼe neʼebé fasil atu komprende no kona loos haʼu-nia laran.”

HAKAT 3​—Halo orasaun

▪ Tanba Bíblia mak Maromak nia Liafuan, Ita bele komprende Bíblia diʼak liután hodi husu Maromak nia ajuda. Diʼak atu harohan hanesan ema neʼebé hakerek salmu ida, neʼebé hatete: “Halo haʼu-nia matan nakloke, atu nuneʼe haʼu bele haree buat furak husi Ita-nia ukun-fuan.” (Salmo 119:18) Dala hotu neʼebé Ita lee Bíblia, halo orasaun ba Maromak hodi husu ninia ajuda atu Ita komprende ninia Liafuan. Ita mós bele hatoʼo obrigadu ba Maromak tanba fó Ita Bíblia, basá se la iha Bíblia Ita la bele hatene Maromak.—Salmo 119:62.

Maromak rona orasaun hanesan neʼe ka lae? Hanoin toʼok kona-ba buat neʼebé akontese ba biin-alin naʼin-rua iha rai-Uruguai. Sira la komprende buat neʼebé Bíblia hatete iha Daniel 2:44 no sira halo orasaun ba Maromak atu haruka ema ruma atu ajuda sira komprende. Iha tempu neʼe kedas, sira seidauk taka Bíblia, Testemuña ba Jeová naʼin-rua mai sira-nia uma, no lee eskritura neʼebé feto sira-neʼe foin husu ba Maromak atu ajuda sira komprende. Testemuña sira-neʼe esplika katak eskritura neʼe koʼalia kona-ba tempu neʼebé Maromak sei halakon ema nia governu hodi troka ho Ninia Reinu, ka ukun. * Biin-alin naʼin-rua neʼe fiar duni katak Maromak hatán sira-nia orasaun.

HAKAT 4​—Lee loroloron

▪ Ema barak buka Maromak nia Liafuan kuandu deʼit sira hasoru terus ruma. Porezemplu, kompañia ida neʼebé halo livru sira hatete katak depois terrorista sira ataka rai-Estadus Unidus iha loron 11 Setembru 2001 “ema derrepente komesa sosa Bíblia barak”. Maibé, Bíblia fó laran-manas mai ita atu ita lee nia loron-loron, hodi hatete: “Ukun-fuan husi livru neʼe labele husik husi ó-nia ibun, no ó tenke lee ho lian neineik loron no kalan, atu ó la kole halo buat hotu tuir buat  neʼebé hakerek iha ninia laran; tanba ho ida-neʼe ó sei halo ó-nia dalan sai susesu no ó sei halo hahalok ho matenek.”—Josué 1:8.

Tansá mak diʼak atu lee Bíblia beibeik? Hanoin toʼok ema ida neʼebé hetan atake-fuan no depois deside atu han ai-han neʼebé diʼak liu ba ninia saúde. Maibé, se nia han ai-han diʼak bainhira nia sente moras deʼit, ida-neʼe sei ajuda nia ka lae? Lae. Nia tenke han beibeik ai-han neʼebé diʼak ba nia saúde. Hanesan neʼe mós hodi lee Bíblia loroloron sei ajuda Ita atu ‘halo Ita-nia dalan sai susesu’.

HAKAT 5​—Troka beibeik dalan neʼebé Ita lee

▪ Lee Bíblia husi Gênesis toʼo Apokalipse karik diʼak, maibé iha mós dalan seluk neʼebé Ita bele lee neʼebé halo Ita sente kmaan. Haree toʼok ezemplu balu tuirmai.

Lee kona-ba ema ida iha Bíblia. Lee kapítulu sira ka livru sira iha Bíblia neʼebé koʼalia kona-ba Maromak nia atan ida, hanesan tuirmai neʼe:

• José: Gênesis 37-50.

• Rute: Rute 1-3.

• Jesus: Mateus 1-28; Marcos 1-16; Lucas 1-24; Joao 1-21. *

Lee kona-ba tema ida. Lee eskritura sira neʼebé koʼalia kona-ba tema neʼebé Ita hili. Porezemplu, Ita bele buka informasaun kona-ba orasaun, no depois lee saida mak Bíblia hatete kona-ba orasaun, no lee mós orasaun balu neʼebé hakerek iha Bíblia. *

Lee ho lian. Diʼak tebes atu lee Bíblia ho lian. Karik Ita bele mós lee hamutuk ho Ita-nia família, troka malu atu lee parágrafu sira ka husu família ida-idak atu lee ema iha istória ida nia liafuan. (Apokalipse 1:3) Ema balu gosta rona Bíblia neʼebé grava ona. Feto ida hatete: “Susar ba haʼu atu sai toman atu lee Bíblia, tan neʼe haʼu hahú hodi rona Bíblia neʼebé grava ona. Agora haʼu sente katak lee Bíblia diʼak liu fali lee livru seluk.”

HAKAT 6​—Hanoin kleʼan

▪ Ohin loron, iha buat barak iha ita-nia moris neʼebé halo ita la iha tempu. Tan neʼe susar atu fó tempu atubele hanoin kleʼan kona-ba buat neʼebé ita lee iha Bíblia. Maibé, hanesan ita presiza nata didiʼak ai-han atu ita-nia isin bele simu ai-han neʼe, nuneʼe mós kuandu ita lee Bíblia, ita presiza hanoin didiʼak kona-ba buat neʼebé ita lee atubele hetan buat diʼak. Ita halo ida-neʼe hodi hanoin fila fali buat neʼebé ita foin lee no husu ita-nia an pergunta hanesan: ‘Saida mak haʼu aprende kona-ba Maromak Jeová? Oinsá mak haʼu bele halo tuir ida-neʼe? Oinsá mak haʼu bele uza ida-neʼe atu ajuda ema seluk?’

Hodi hanoin kleʼan hanesan neʼe, bele halo Bíblia nia mensajen book ita-nia laran no halo ita haksolok liután atu lee Maromak nia Liafuan. Salmo 119:97 hatete: “Haʼu hadomi tebes Ita-nia ukun-fuan! Loron tomak ida-neʼe mak haʼu hanoin.” Ema neʼebé hakerek salmu neʼe, hanoin kleʼan kona-ba buat neʼebé nia lee iha Bíblia, no ida-neʼe ajuda nia atu haburas domin ba buat neʼebé nia aprende.

HAKAT 7​—Husu ajuda atu komprende

▪ Maromak hatene katak ita mesak la bele komprende buat hotu iha ninia Liafuan. Bíblia rasik hatete katak iha “buat sira neʼebé susar atu hatene loloos”. (2 Pedro 3:16) Iha livru Apostolu koʼalia kona-ba ema-boot ida husi rai-Etiópia neʼebé la komprende buat neʼebé nia lee iha Bíblia. Nuneʼe, Maromak haruka Ninia atan ida atu ajuda ema neʼe, no rezultadu mak ema neʼe “tuir nia dalan ho ksolok waʼin tebes”.—Apostolu 8:26-39.

Ita mós bele komprende no sente ksolok liután kuandu Ita lee Bíblia hodi husu ajuda husi ema seluk. Ita bele husu Testemuña ba Jeová, ka hakerek ba diresaun iha pájina 4 iha livru neʼe atu bele estuda Bíblia neʼebé la selu.

[Nota–rodapé]