Oinsá atu sai sidadaun neʼebé diʼak maski la mete iha buat polítiku?

BUAT rua saida mak Jesus halo iha ninia serbisu haklaken? Primeiru, Jesus la halo mudansa iha buat polítiku nian, maibé nia hakaʼas an atu troka ema nia laran. Porezemplu, hanoin kona-ba buat importante neʼebé Jesus koʼalia iha ninia diskursu iha foho ida. Antes Jesus koʼalia kona-ba tansá presiza atu sai hanesan masin no naroman, nia fó-hatene ba ninia rona-naʼin sira oinsá atu hetan kontente neʼebé loos. Nia hatete: “Ksolok ba sira neʼebé hamlaha no hamrook ba justisa.” Jesus hatutan tan: “Ksolok ba sira neʼebé laran-kmaus, . . . sira neʼebé laran moos, . . . sira neʼebé harii dame.” (Mateus 5:1-11) Jesus ajuda ninia dixípulu sira atu hatene katak importante tebes atu troka sira-nia hanoin hodi tuir buat neʼebé Maromak hatete kona-ba buat neʼebé loos no sala, no tansá importante atu serbí Maromak ho laran tomak.

Segundu, kuandu Jesus haree ema sira neʼebé hasoru susar, nia hanoin sira tebetebes no hakarak duni ajuda sira hodi hamenus sira-nia susar. Maski nuneʼe, Jesus la koko atu halakon ema nia terus hotu. (Mateus 20:30-34) Maski Jesus kura ema barak neʼebé moras, maibé nia la halakon moras hotu. (Lucas 6:17-19) Nia fó kmaan ba sira neʼebé ema hanehan, maibé ema barak terus nafatin tanba la iha justisa. Nia fó-han ba ema balu, maibé rai-hamlaha kona nafatin ema barak.—Marcos 6:41-44.

Troka ema nia laran no hamenus terus

Duké halo mudansa iha buat polítiku nian ka halakon ema nia terus hotu, Jesus hakaʼas an liu atu troka ema nia laran no hamenus sira-nia terus. Tanbasá? Tanba Jesus hatene katak lakleur tan Maromak sei uza Ninia Ukun atu halakon ema nia governu hotu no buat hotu neʼebé hamosu terus ba ema. (Lucas 4:43; 8:1) Nuneʼe, kuandu Jesus nia dixípulu sira hakaʼas nia atu kura ema barak tan, Jesus hatete ba sira: “Ita bá fatin seluk, iha knua sira besik atu haʼu haklaken mós iha neʼebá, basá tan neʼe mak haʼu mai.” (Marcos 1:32-38) Maski Jesus ajuda ema barak hodi hamenus sira-nia terus, maibé buat neʼebé importante liu ba nia mak atu haklaken no hanorin Maromak nia liafuan.

Ohin loron, Testemuña ba Jeová hakaʼas an atu halo tuir Jesus nia ezemplu iha sira-nia serbisu haklaken. Sira hanoin tebes ema no hakaʼas an atu fó ajuda hodi hamenus sira-nia susar. Maski nuneʼe, Testemuña sira la koko atu halakon situasaun aat iha mundu neʼe. Sira fiar katak Maromak nia Ukun deʼit mak bele halakon buat hotu neʼebé hamosu terus ba ema. (Mateus 6:10) Hanesan Jesus, sira hakaʼas an atu troka ema nia laran, laʼós atu halo mudansa iha buat polítiku nian. Ida-neʼe loos tanba problema iha mundu neʼe laʼós kona-ba buat polítiku nian, maibé kona-ba ema nia morál. Tanba ema barak la halo tuir Maromak nia matadalan kona-ba buat neʼebé loos ka sala.

Sidadaun neʼebé diʼak

Maski Testemuña ba Jeová la mete iha buat polítiku nian, maibé sira hatene katak sira iha responsabilidade nuʼudar ema kristaun atu sai sidadaun neʼebé diʼak. Tan neʼe, sira hatudu respeitu ba governu no ba sira neʼebé iha pozisaun boot. Liuhusi sira-nia livru sira no sira-nia serbisu haklaken, sira fó laran-manas ba ema hotu iha sira-nia komunidade atu halo tuir lei sira  husi governu. Maibé, kuandu governu halo lei ruma neʼebé kontra Maromak nia ukun-fuan, sira sei “halo tuir Maromak nia hakarak liu ema sira-nian”.—Apostolu 5:29; Roma 13:1-7.

Testemuña ba Jeová vizita ema hotu iha sira-nia komunidade atu estuda Bíblia ho ema hotu neʼebé hakarak. Sira la husu ema atu selu hodi estuda Bíblia. Rezultadu ba ida-neʼe mak ema rihun ba rihun troka ona sira-nia laran. Tinan-tinan, sira ajuda ema barak atu manán hasoru toman aat hanesan fuma, hemu tua demais, uza droga, joga osan, no halo sala-foʼer. Tanba ema sira-neʼe aprende atu halo tuir Bíblia nia matadalan iha sira-nia moris, sira sai moos iha dalan morál no sai sidadaun neʼebé diʼak.

Liután neʼe, hodi estuda Bíblia, neʼe ajuda ema ida-idak iha família laran atu hatudu respeitu ba malu no haburas relasaun neʼebé besik liu entre feen-laʼen, inan-aman ho oan sira, no nuʼudar maun-alin. Kuandu família iha relasaun neʼebé metin ba malu, ida-neʼe bele hametin komunidade.

Husi informasaun sira neʼebé ita foin lee neʼe, ita bele komprende katak Bíblia nunka apoia relijiaun atu kahur malu ho buat polítiku nian. Maski nuneʼe, Bíblia haruka ema kristaun loos atu sai sidadaun neʼebé diʼak. Oinsá mak sira bele halo ida-neʼe? Hodi halo tuir Jesus nia mandamentu atu sai hanesan masin no naroman ba mundu neʼe.

Sira neʼebé hakaʼas an atu halo tuir Kristu nia mandamentu neʼe, sei lori buat diʼak ba sira-nia an, ba sira-nia família, no ba sira-nia komunidade. Testemuña ba Jeová iha Ita-nia área, sei kontente atu esplika liután kona-ba sira-nia serbisu atu hanorin Bíblia neʼebé halaʼo daudauk iha Ita-nia komunidade. *

[Nota–rodapé]

[Liafuan neʼebé foti husi pájina 10]

Jesus la halo mudansa iha buat polítiku nian, maibé nia hakaʼas an atu troka ema nia laran

[Liafuan neʼebé foti husi pájina 11]

Testemuña ba Jeová hatene katak sira iha responsabilidade atu sai sidadaun neʼebé diʼak