MASKI Jesus nia moris-hiʼas akontese kleur ona, maibé neʼe la dehan katak ida-neʼe la kona ita ohin loron. Apóstolu Paulo hatudu katak Jesus nia moris-hiʼas mak importante tebes hodi hatete: “Kristu moris hiʼas ona husi mate; nia mak fuan uluk husi sira hotu neʼebé toba tiha ona. Basá nuʼudar mate mosu mai husi ema ida, moris-hiʼas husi mate mós mosu mai husi ema ida. Nuʼudar iha Adão ema hotu mate, nuneʼe mós iha Kristu ema hotu sei hetan moris.”—1 Korinto 15:20-22.

Jesus moris hiʼas iha loron 16, fulan-Nisan, tinan 33. Neʼe mak loron neʼebé ema judeu sira hasaʼe ba Jeová ai-fuan ka fini primeiru husi sira-nia toʼos iha templu iha Jerusalém. Paulo bolu Jesus nuʼudar “fuan uluk”, no ida-neʼe hatudu katak iha ema seluk neʼebé sei hetan moris-hiʼas husi mate.

Buat neʼebé Paulo hatete tuirmai hatudu rezultadu husi Jesus nia moris-hiʼas. Nia hatete: “Basá nuʼudar mate mosu mai husi ema ida, moris-hiʼas husi mate mós mosu mai husi ema ida.” Tanba ita hotu simu sala husi Adão, tan neʼe ita hotu mate. Maibé hodi fó ninia moris ba ita, nia loke dalan atu ema bele hetan moris-hiʼas no sai livre husi rezultadu aat husi sala no mate. Paulo hakerek iha Roma 6:23: “Sala nia kolen mak mate, maibé Maromak nia prezente mak moris rohan-laek iha Kristu Jesus, ita Naʼi.”

Jesus rasik esplika kona-ba oinsá ninia mate no moris-hiʼas kona ita. Nia hatete kona-ba ninia an: “Ema tenke foti Oan-Mane, atu ema hotu neʼebé fiar iha nia bele hetan moris rohan-laek. Basá Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.”—Joao 3:14-16.

Hanoin toʼok katak ita moris iha mundu neʼebé la iha moras, terus no triste. (Apokalipse 21:3, 4) Neʼe esperansa neʼebé kapás loos. Matenek-naʼin ida dehan: “Rate sira fó-hanoin ema katak ita-nia moris neʼe ba tempu uitoan deʼit, maibé esperansa moris-hiʼas hatudu katak mate mak ba tempu uitoan deʼit.”