INFORMASAUN husi jornál ida naran The Chosun Ilbo husi rai-Koreia, hatete hanesan neʼe: “Shim Cheong, ema diʼak loos neʼebé la hatene buat ida kona-ba Jesus, nia agora iha infernu ka lae?”

Liafuan iha jornál neʼe halo ema barak hirus. Tanbasá? Iha ema Koreia nia istória ida, Shim Cheong mak feto kapás neʼebé fó ninia moris atu ajuda ninia aman neʼebé matan-delek. Ba tinan barak ona, ema iha rai-Koreia gaba no estima Shim Cheong. Tuir loloos, ema Koreia haree nia nuʼudar oan-feto ida neʼebé hatudu ezemplu diʼak liu tanba nia hadomi tebes ninia aman.

Ema barak hanoin se Shim Cheong terus iha infernu tan deʼit seidauk batizmu nuʼudar kristaun ida, neʼe la justisa no sira la simu. Tuir loloos, ema dehan istória neʼe akontese kleur ona antes mensajen kona-ba Jesus toʼo iha feto neʼe nia suku.

Informasaun neʼe fó sai mós entrevista ho ulun-naʼin ida husi igreja. Jornalista husu ba nia se ema ida mate antes nia iha oportunidade atu aprende kona-ba Jesus, nia sei bá infernu ka lae? Saida mak nia hatán? Nia dehan: “Ita la hatene. Maibé ita fiar katak Maromak iha planu [ba ema sira hanesan neʼe].”

Livru Katólika nian ida (The New Catholic Encyclopedia) hatete: “Presiza sarani atubele hetan salvasaun. Jesus rasik dehan katak ema la moris husi bee no espíritu karik, nia la bele tama iha Maromak nia Reinu (Jn 3.5).” Tanba ida-neʼe mak ema balu fiar katak sira neʼebé seidauk sarani, sira mate bá infernu ka terus iha dalan seluk.

Maibé iha ema seluk dehan katak ida-neʼe la loos. Iha ema rihun ba rihun neʼebé mate ona seidauk aprende kona-ba Bíblia. Ema hanesan neʼe merese atu terus ba nafatin iha infernu ka lae? Saida mak Bíblia hatete kona-ba ema sira-neʼe?

Maromak la fó kastigu ba ema mate sira neʼebé seidauk iha oportunidade atu aprende kona-ba Maromak nia ukun-fuan sira. Apóstolu 17:30 koʼalia kona-ba ema neʼebé la hatene Maromak loos hodi hatete: “Uluk Maromak husik deʼit hahalok sira hanesan neʼe.” Se nuneʼe, Bíblia fó esperansa ka lae ba ema neʼebé mate antes sira aprende kona-ba Maromak?

Ita bele hatene resposta husi Jesus nia liafuan neʼebé nia hatete ba naʼok-teen ida neʼebé mate iha ninia sorin. Mane neʼe dehan ba Jesus: “Hanoin-hetan haʼu bá kuandu Ita tama iha Ita-nia Ukun.” Jesus hatán oinsá? Nia dehan: “Haʼu hatete loloos ba ó ohin, ó sei hamutuk ho haʼu iha Paraízu.”—Lucas 23:39-43.

Ho liafuan sira-neʼe, Jesus promete ba mane neʼe katak nia sei tama iha lalehan ka lae? Lae. Tanba atu tama ba lalehan, presiza “moris dala ida tan” husi bee no espíritu santu, maibé mane neʼe seidauk halo ida-neʼe. (João 3:3-6) Tuir loloos, Jesus promete katak naʼok-teen neʼe sei moris fali iha Paraízu. Mane neʼe ema judeu ida, no nia hatene ho didiʼak kona-ba jardín Eden iha tempu uluk neʼebé hakerek iha livru primeiru iha Bíblia. Nia hatene neʼe mak Paraízu iha rai. (Gênesis [Kejadian] 2:8) Jesus nia promesa fó fiar ba mane neʼe katak nia sei moris fali iha Paraízu, ka jardín furak bainhira Maromak halo mundu neʼe sai fali Paraízu.

Bíblia promete katak Maromak sei fó “moris-hiʼas ba ema diʼak no ema aat”. (Apóstolu 24:15) “Ema aat” neʼe mak ema neʼebé la halo tuir Maromak tanba sira la hatene Maromak nia hakarak. Jesus sei fó moris-hiʼas ba naʼok-teen neʼebé koʼalia ho nia, no mós ba ema rihun ba rihun neʼebé mate antes sira aprende kona-ba Maromak. Tuirmai, iha mundu Paraízu, sira sei aprende kona-ba Maromak nia hakarak, no sira sei iha oportunidade atu hatudu  katak sira hadomi Maromak hodi halo tuir ninia ukun-fuan sira.

Bainhira ema sira-neʼe hetan moris-hiʼas, sira sei hetan tesi-lia tuir sira-nia hahalok antes sira mate ka lae? Lae, tanba Roma 6:7 hatete: “Ema neʼebé mate, selu ona tusan hotu husi ninia sala.” Bainhira sira mate, sira selu hotu tiha ona sira-nia sala. Entaun, Maromak la tesi lia ba sira-nia hahalok uluk nian. Aban-bainrua nia sei tesi lia ba sira tuir sira-nia hahalok depois sira hetan tiha moris-hiʼas. Sira neʼebé moris hiʼas fali sei iha oportunidade atu halo saida?

Hetan tiha moris-hiʼas, ema sei iha oportunidade atu aprende Maromak nia ukun-fuan. Bíblia dehan Maromak sei loke livru simbóliku sira, neʼe hanesan nia fó ukun-fuan sira ba ema. Maromak sei haree ema sira-neʼe halo tuir ka lae. Tuirmai sira sei hetan tesi-lia “tuir sira-nia hahalok”. (Apokalipse 20:12, 13) Ba ema barak, iha tempu neʼebá mak sira foin simu oportunidade primeiru atu aprende no halo tuir Maromak nia hakarak hodi bele hetan moris rohan-laek.

Hanorin husi Bíblia ida-neʼe ajuda ema barak atu haburas fali sira-nia fiar ba Maromak. Neʼe mak feto ida naran Yeong Sug nia esperiénsia. Husi kiʼik kedas, nia mak ema Katólika no ninia família balu mak padre. Nia tama konventu tanba nia hakarak atu sai madre. Maibé ikusmai nia sai tiha tanba nia la gosta hahalok neʼebé nia haree iha konventu. Nia mós la bele simu hanorin kona-ba infernu tanba nia sente katak fó-terus ba ema iha ahi, neʼe hanesan Maromak la hatudu domin no justisa.

Loron ida, Testemuña ba Jeová hatudu ba Yeong Sug eskritura neʼe husi Bíblia: “Ema neʼebé moris hatene katak sira sei mate; maibé ema neʼebé mate ona, sira la hatene buat ida, ka la iha tan kolen ba sira.” (Eclesiastes [Pengkhotbah] 9:5) Testemuña neʼe ajuda Yeong Sug atu komprende katak ninia beiʼala sira la terus iha infernu, maibé sira hanesan toba deʼit hodi hein tempu neʼebé sira sei moris fali.

Tanba Yeong Sug hatene katak ema barak seidauk rona lia-loos husi Bíblia, nia halo tuir Jesus nia liafuan iha Mateus 24:14 neʼebé dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.” Agora Yeong Sug hola parte atu haklaken liafuan diʼak no fahe ninia esperansa husi Bíblia ba ema seluk.

Bíblia dehan katak, “Maromak la todan ba sorin, maibé iha nasaun hotu, Maromak simu ema hotu neʼebé taʼuk ba nia no halo buat loos”. (Apóstolu 10:34, 35) Maromak “hadomi justisa no buat loos”, tan neʼe ita bele fiar duni Maromak sei halo buat hotu ho justisa.—Salmo (Mazmur) 33:5.