Ema rihun ba rihun iha mundu tomak hatene kona-ba “Maromak nia Reinu” nuʼudar buat neʼebé fó esperansa ba ema. Sira temi beibeik liafuan neʼe iha orasaun Ami Aman neʼebé Naʼi Jesus mak hanorin, hodi dehan: “Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.”—Mateus 6:10, Liafuan diak ba imi, segunda edisaun.

Maski ema reza beibeik kona-ba Maromak nia Reinu, maibé realidade mak relijiaun barak ladún hanorin kona-ba Reinu neʼe katak sá. Matenek-naʼin ida naran H. G. Wells hatete: ‘Wainhira Jesus sei iha rai, nia haklaken no hanorin beibeik kona-ba Reinu lalehan nian, maibé relijiaun kristaun sira ohin loron maioria ladún iha interese atu hanorin kona-ba ida-neʼe.’ Neʼe halo ema duvida—‘Tanbasá?’

Maibé ami Testemuña ba Jeová hakaʼas an atu haklaken Maromak nia Reinu, neʼe katak Maromak nia Ukun. Hanoin toʼok: Revista ida-neʼe, neʼebé Ita-Boot lee daudauk, ami tradús ba língua hamutuk 220 no kada fulan halo kópia besik millaun 46. Tuir loloos, Livru Haklaken neʼe mak revista neʼebé fahe barak liu iha mundu tomak. Entaun, revista neʼe koʼalia liuliu kona-ba saida? Haree toʼok revista neʼe nia títulu kompletu mak: Livru Haklaken—Fó sai Maromak Jeová nia Ukun. a

Tanbasá mak ami hakaʼas an tebes haklaken Maromak nia Reinu? Razaun ida mak tanba ami fiar metin katak Bíblia mak Maromak nia Liafuan no iha Bíblia laran mensajen kona-ba Maromak nia Reinu mak importante tebes. Liután neʼe, ami mós fiar katak liuhusi Maromak nia Ukun deʼit mak bele hadiʼa problema hotu neʼebé ohin loron ema la bele rezolve.

Tan neʼe, ami Testemuña ba Jeová hakaʼas an atu laʼo tuir Jesus nia ain-fatin hodi haklaken kona-ba Maromak nia Reinu. Wainhira Jesus sei iha rai, iha ninia moris tomak nia hanoin liu atu haklaken Maromak nia Reinu. (Lucas 4:43) Tansá mak Jesus hafolin tebes Maromak nia Reinu? Reinu neʼe sei lori bensaun saida deʼit ba Ita-Boot? Bele loke tan ba pájina tuirmai atu buka resposta husi Bíblia.