Iha tinan 1930 nia hahú, Testemuña ba Jeová seidauk haklaken iha Indonézia, Malázia, no mós área neʼebé agora bolu nuʼudar Papua Giné Foun. Oinsá liafuan diʼak bele toʼo iha rai sira-neʼe? Sukursál Austrália (agora sukursál Australásia) sosa ró neʼebé naruk metru 16 ho laan rua no uza mákina. Sira hanaran ró neʼe Lightbearer (Ida neʼebé lori naroman) tanba ema hotu neʼebé saʼe ró mak pioneiru a no sira uza ró neʼe atu lori naroman lia-loos nian ba área sira neʼebé dook.—Mateus 5:14-16.

 Iha Fevereiru 1935, irmaun naʼin-hitu saʼe ró husi sidade Sydney, iha Austrália nia parte leste atu bá Portu Moresby, iha Giné Foun. Durante sira-nia viajen neʼe, sira han ikan neʼebé sira kail no para iha ponte-kais balu atu enxe mina, sosa hahán, no hadiʼa ró. Iha loron 10 Abríl 1935, sira-nia ró sai husi sidade Cooktown, Queensland, Austrália. Bainhira ró neʼe halai liu área Great Barrier Reef neʼebé perigu ba ró atu liu, sira rona lian oin-seluk husi ró nia mákina no sira presiza hamate mákina. Sira presiza halo desizaun atu fila fali ka nafatin kontinua sira-nia viajen ba Giné Foun. Ró nia kapitaun naran Eric Ewins dehan: “Ami lakohi fila fali.” Entaun ró Lightbearer kontinua ninia viajen hodi uza laan, no ikusmai sira toʼo Portu Moresby ho seguru iha 28 Abríl 1935.

 Bainhira mekániku hadiʼa daudaun ró nia mákina, irmaun Frank Dewar hein ró no irmaun sira seluk haklaken liafuan diʼak iha Portu Moresby. Frank neʼebé ema koñese nuʼudar “pioneiru badinas” dehan: “Haʼu lori livru barak no laʼo ba fatin neʼebé dook maizumenus kilómetru 32 atu haklaken iha neʼebá.” Atu fila fali ba ró, nia liu husi dalan seluk no nia presiza hakur mota kiʼik neʼebé iha lafaek. Nia hakur mota neʼe ho kuidadu no fila ba sidade ho seguru. Sira-nia hakaʼas an atu haklaken iha neʼebá lori rezultadu diʼak. Ema balu neʼebé simu livru sira iha tempu neʼebá ikusmai sai Testemuña ba Jeová.

 Kuandu ró nia mákina diʼak ona, ró Lightbearer sai husi Portu Moresby no bá illa Java neʼebé iha tempu neʼebá rai-Olanda mak ukun (agora Indonézia). Sira para iha ponte-kais balu atu sosa sasán neʼebé sira presiza, ikusmai iha 15 Jullu 1935, sira toʼo iha sidade Batavia (agora Jakarta).

 Bainhira sira toʼo, irmaun Charles Harris tun husi ró no hela iha Java hodi kontinua haklaken liafuan diʼak ho laran-manas. b Irmaun Charles dehan: “Iha tempu neʼebá, ami-nia fokus mak atu fahe livru neʼebé esplika kona-ba Bíblia no muda ba sidade tuirmai. Haʼu lori livru oioin iha língua Arabi, Xinés, Olandés, Inglés no Indonézia. Ema barak kontente atu simu ita-nia publikasaun, tan neʼe haʼu fahe livru barak, maizumenus livru hamutuk 17.000 tinan-tinan.”

 Tanba Charles haklaken ho laran-manas, neʼe dada autoridade Olanda nia atensaun. Loron ida, xefe ba soldadu husu Testemuña ida neʼebé haklaken iha Java: “Testemuña naʼin-hira mak haklaken iha Java parte leste?” Neʼe mak área neʼebé irmaun Charles haklaken. Irmaun neʼe hatán: “Ida deʼit.” Xefe neʼe hakilar: “Ó hanoin ó bele bosok haʼu ka? Imi-nia livru iha fatin hotu, klaru katak presiza ema barak atu fahe livru barak hanesan neʼe.”

 Ró Lightbearer sai husi Indonézia no toʼo Singapura iha 7 Agostu. Bainhira ró neʼe para iha ponte-kais oioin, irmaun sira uza ró nia koluna boot no loke ho lian boot diskursu neʼebé grava ona. Neʼe dada ema barak nia atensaun. Loloos jornál Singapore Free Press fó sai katak “ema sira bele rona lian neʼebé boot iha tasi ibun . . . iha kuarta kalan”. Jornál neʼe esplika katak diskursu neʼe úniku tanba loke husi ró Lightbearer no husi tempu neʼebé ró neʼe toʼo iha Singapura, ró Austrália neʼe sempre loke diskursu sira husi asosiasaun Watch Tower. Jornál neʼe mós hatutan tan: “Bainhira klima diʼak, ema bele rona ho momoos diskursu sira-neʼe . . . maski dook kilómetru tolu ka haat.”

 Bainhira ró Lightbearer para iha Singapura, irmaun Frank Dewar simu knaar foun. Nia konta: “Ami hotu hela hamutuk iha ró bainhira ami komesa haklaken iha Singapura. Maibé kuandu ró Lightbearer atu kontinua halo fali viajen, irmaun Eric Ewins fó-hatene haʼu buat ida neʼebé halo haʼu hakfodak. Irmaun Eric dehan mai haʼu: ‘Frank, uluk ó dehan katak ó hakarak atu haklaken iha Siam (agora Tailándia). Tan neʼe agora ita fahe malu iha neʼe. Agora ó bele bá neʼebá!’ Haʼu hakfodak no dehan: ‘Haʼu la hatene oinsá atu bele toʼo Siam!’” Eric esplika ba Frank katak nia bele saʼe komboiu husi Kuala Lumpur (agora Malázia). Frank bá Kuala Lumpur. No fulan balu liutiha mak nia toʼo iha Tailándia. c

 Ró Lightbearer bá Malázia nia sorin oeste no para iha Johore Bahru, Muar, Malaka, Klang, Portu Swettenham (agora Portu Klang), no Penang. Iha ponte-kais ida-idak, sira uza koluna boot iha ró atu loke diskursu Bíblia. Irmán Jean Deschamp neʼebé haklaken iha Indonézia iha tempu neʼebá dehan: “Ema interese loos ba ró neʼe duké ba buat seluk.” Bainhira diskursu remata, irmaun sira-neʼe tun husi ró no fahe livru sira ba ema neʼebé hatudu interese.

 Ró sai husi Penang no liu tasi Malaka toʼo Medan, Sumatra (agora Indonézia). Irmaun Eric Ewins konta kona-ba tempu neʼe hodi dehan: “Ami kontente hela iha Medan. Ema barak hakarak atu rona ba liafuan diʼak.” Sira fahe livru maizumenus 3.000 ba ema iha neʼebá.

 Sira saʼe ró ba parte súl no sira haklaken iha ponte-kais sira neʼebé boot iha Sumatra parte leste. Iha Novembru 1936, ró fila fali ba Singapura. Iha neʼebá, irmaun Eric Ewins fahe malu ho irmaun sira. Liutiha semana balu, irmaun Eric kaben ho irmán Irene Struys neʼebé hela iha Singapura. Tuirmai sira kontinua serbí nuʼudar pioneiru iha Sumatra. Tan neʼe, ró Lightbearer presiza kapitaun foun.

 Kapitaun foun mak Norman Senior, nia mak irmaun neʼebé tuir ona treinamentu kona-ba oinsá atu lori ró. Nia mai husi Sydney no toʼo iha Singapura iha Janeiru 1937. Tuirmai irmaun sira-neʼe saʼe ró bá Borneo no Celebes (agora Sulawesi) hodi haklaken iha fatin oioin, inklui mós fatin dook toʼo kilómetru 480.

 Bainhira ró Lightbearer tama ponte-kais iha Samarinda, Borneo (agora Kalimantan), ponte-kais nia administradór la fó lisensa ba irmaun sira atu haklaken ba ema iha neʼebá. Maibé depois Norman esplika kona-ba atividade haklaken neʼebé sira halo, administradór neʼe la bandu tan sira no nia mós foti livru balu.

 Iha tempu seluk, pastór ida konvida Norman atu hatoʼo diskursu iha ninia igreja. Maibé duké hatoʼo rasik diskursu, Norman loke diskursu lima hodi uza fonógrafu. Pastór neʼe kontente loos no nia mós foti livru balu atu fó ba ninia kolega sira. Maibé pastór seluk la gosta buat neʼebé Testemuña sira halo. Tanba irmaun sira-neʼe haklaken ho badinas, pastór sira-neʼe hirus no husu autoridade sira bandu ró Lightbearer atu labele tama ba ponte-kais seluk.

 Iha Dezembru 1937, ró Lightbearer fila fali ba Austrália tanba pastór sira book autoridade atu bandu irmaun sira. Ró toʼo iha ponte-kais Sydney iha Abríl 1938 no sira tuir reuniaun boot iha Sydney. Neʼe mak tinan tolu liutiha husi tempu neʼebé ró Lightbearer sai husi Sydney. Maizumenus iha tinan 1940, irmaun sira faʼan ró neʼe, depois tempu neʼebé governu Austrália komesa bandu Testemuña nia atividade. Irmaun Eric dehan: “Ró neʼe ajuda ami atu kumpre serbisu importante.” Nia esplika katak tempu neʼebé nia serbí ho ró Lightbearer mak “tempu neʼebé kontente liu” iha ninia moris.

 Irmaun sira uza ró Lightbearer atu kari fini lia-loos iha fatin barak neʼebé iha populasaun barak. Maski ema balu kontra, maibé sira-nia serbisu haklaken neineik-neineik lori rezultadu diʼak. (Lucas 8:11, 15) Agora iha haklaken-naʼin 40.000 liu iha área sira-neʼe. Rezultadu furak husi irmaun sira-neʼe nia serbisu badinas no ró Lightbearer mak buat neʼebé folin-boot duni mai ita.