Iha mundu tomak, ema barak neʼebé hatete katak sira mak Jesus Kristu nia dixípulu, envolve an makaʼas iha buat polítiku. Ema balu apoia kandidatu polítiku ruma ka partidu ruma tanba hakarak komunidade atu simu sira-nia relijiaun no prinsípiu kona-ba morál. Tan neʼe, polítiku-naʼin sira sempre koʼalia kona-ba asuntu morál no mós sosiál ruma atu bele hetan apoiu husi ema neʼebé relijiozu. No iha rai balu, relijiaun Kristaun ida bele sai nuʼudar nasaun nia relijiaun.

 Ita rasik hanoin oinsá? Kristu nia dixípulu sira tenke envolve an iha buat polítiku ka lae? Jesus nia ezemplu bele ajuda Ita atu hetan resposta ba pergunta neʼe. Jesus hatete: “Haʼu fó ezemplu ba imi, hodi nuneʼe imi mós tenke halo tuir buat neʼebé haʼu halo.” (João 13:15) Jesus hatudu ezemplu diʼak saida kona-ba envolve an iha buat polítiku?

 Lae. Jesus lakohi envolve an iha mundu nia sistema polítika.

 Jesus lakohi buka pozisaun polítika ruma. Uluk Satanás oferese atu halo Jesus nuʼudar ukun-naʼin ba ema nia governu hotu. Satanás oferese ba Jesus “nasaun hotu iha mundu tomak”. Maibé Jesus lakohi simu. (Mateus 4:8-10) a Iha tempu seluk, ema barak nota katak Jesus iha hahalok diʼak oioin atu sai ukun-naʼin ida neʼebé diʼak no sira koko obriga Jesus atu envolve an iha buat polítiku. Bíblia hatete: “Jesus hatene katak sira atu mai kaer nia hodi obriga nia atu sai liurai, tan neʼe nia hasees an fali hodi saʼe ba foho mesamesak.” (João 6:15) Jesus lakohi halo tuir ema sira-neʼe nia hakarak. Jesus lakohi duni envolve an iha buat polítiku.

 Jesus la apoia opiniaun ruma kona-ba asuntu polítiku nian. Porezemplu iha Jesus nia tempu, ema Judeu la gosta atu selu taxa ba governu Roma no sira sente katak ida-neʼe la justisa no fó todan ba sira. Ema Judeu balu koko atu hetan Jesus nia apoia kona-ba asuntu neʼe. Maibé Jesus lakohi debate kona-ba selu taxa mak buat neʼebé justu ka lae. Jesus hatete ba sira: “Fó ba César buat neʼebé César nian, no fó ba Maromak buat neʼebé Maromak nian.” (Marcos 12:13-17) Jesus nafatin neutrál kona-ba buat polítiku, maibé nia hatudu ho klaru katak presiza duni selu taxa ba governu Roma tuir buat neʼebé sira deside ona. Maski nuneʼe, nia la dehan katak ema tenke halo tuir buat hotu neʼebé governu husu. Se governu husu buat neʼebé Maromak deʼit mak merese atu simu, hanesan adorasaun no laran-metin, ema ida labele fó ida-neʼe ba governu.—Mateus 4:10; 22:37, 38.

 Jesus apoia no hanorin kona-ba governu neʼebé iha lalehan, neʼe mak Maromak nia Ukun. (Lucas 4:43) Jesus la envolve an iha buat polítiku tanba nia hatene katak Maromak nia Ukun mak bele hadiʼa mundu tuir Maromak nia hakarak, laʼós ema nia governu. (Mateus 6:10) Nia komprende katak Maromak nia Ukun sei troka ema nia governu hotu.—Daniel 2:44.

 Lae. Jesus nia dixípulu sira halo tuir ninia mandamentu atu la sai “mundu neʼe nian”. (João 15:19) Sira halo tuir Jesus nia ezemplu no nafatin la sai parte ba mundu nia sistema polítika. (João 17:16; 18:36) Duké envolve an iha buat polítiku, sira halo tuir Jesus nia mandamentu atu haklaken no hanorin kona-ba Maromak nia Ukun.—Mateus 28:18-20; Apóstolu 10:42.

 Buat neʼebé importante liu hotu ba ema Kristaun iha apóstolu sira-nia tempu mak halo tuir Maromak. Maibé sira mós hatene katak sira presiza hatudu respeitu ba autoridade sira. (Apóstolu 5:29; 1 Pedro 2:13, 17) Sira halo tuir lei no selu taxa. (Roma 13:1, 7) Maski sira la envolve an iha buat polítiku, maibé sira uza ho didiʼak sistema legál no arranju oioin neʼebé governu prepara.—Apóstolu 25:10, 11; Filipe 1:7.

 Bíblia hatudu ho klaru katak Jesus no mós ninia dixípulu sira iha apóstolu sira-nia tempu la envolve an iha buat polítiku. Tan neʼe mak nuʼudar ema Kristaun, Testemuña ba Jeová iha mundu tomak mós nafatin neutrál kona-ba buat polítiku. Hanesan ema Kristaun iha apóstolu sira-nia tempu, sira halaʼo knaar neʼebé Jesus haruka sira atu halo, neʼe mak “haklaken liafuan diʼak kona-ba Maromak nia Ukun”.—Mateus 24:14.