Iha loron-sesta, 24 Fevereiru 2023, mak tinan ida ona neʼebé akontese funu iha Ukránia. Tuir relatóriu balu, maizumenus soldadu naʼin-300.000 husi Ukránia no Rúsia mak mate ka hetan kanek, no povu baibain maizumenus naʼin-30.000 mak mate iha funu, maibé tuir loloos karik númeru neʼe barak liu buat neʼebé fó sai iha relatóriu.

 Triste mak funu neʼe seidauk deʼit atu remata.

•   “Besik tinan ida liu ona husi tempu neʼebé militár Rúsia tama Ukránia, la iha sinál neʼebé hatudu katak konflitu neʼe sei remata. Haree hanesan la iha nasaun ida mak sei manán, no nasaun rua neʼe la hetan solusaun atu konkorda malu.”—NPR (National Public Radio), 19 Fevereiru 2023.

 Ema barak sente triste tanba konflitu oioin neʼebé lori susar no terus ba ema baibain neʼebé la halo sala iha mundu tomak. Bíblia fó esperansa saida? Loron ida funu sei la iha tan ka lae?

 Bíblia koʼalia kona-ba funu ida neʼebé sei salva ema, laʼós atu halakon ema. Funu neʼe nia naran mak Armagedon, no Bíblia dehan katak neʼe mak “funu iha Maromak neʼebé Kbiit Boot Liu Hotu nia loron boot”. (Apokalipse 16:14, 16) Liuhusi funu neʼe Maromak sei halakon ema nia governu neʼebé hamosu funu oioin. Atu aprende oinsá Armagedon sei lori dame neʼebé ba nafatin, lee informasaun tuirmai:

•   “Saida mak funu Armagedon?”

•   “Ita hein namanas ba Armagedon”