Haʼu moris iha rai-Uganda iha distritu Gomba. Ema barak iha neʼebá mak kiak. Ami-nia sidade la iha eletrisidade, no iha kalan ami halakan lampu neʼebé uza mina rai.

 Haʼu-nia inan-aman, neʼebé toʼos-naʼin, muda husi rai-Ruanda ba Uganda. Sira kuda kafé no hudi, no hudi sira-neʼe halo sai tua-sabu neʼebé ema bolu waragi. Haʼu-nia inan-aman mós hakiak manu, bibi, fahi no karau. Tuir haʼu-nia kultura no dalan neʼebé haʼu-nia inan-aman haboot haʼu, haʼu fiar katak feen tenke halo tuir nia laʼen iha tempu hotu no labele fó sai ninia hanoin rasik.

 Bainhira haʼu tinan 23, haʼu muda ba rai-Ruanda, iha neʼebá mak haʼu ba diskoteka ho ema seluk ho idade hanesan haʼu. Tanba haʼu bá beibeik diskoteka ida, patraun ba diskoteka neʼe fó haʼu billete espesiál neʼebé husik haʼu tama gratis deʼit. Haʼu mós gosta filme neʼebé hatudu ema baku malu no violénsia makaʼas. Haʼu-nia moris no atividade halimar nian neʼebé haʼu hili, halo haʼu sai lanu-teen neʼebé la iha morál no halo violénsia.

 Iha tinan 2000, haʼu komesa hela hamutuk ho feto ida naran Skolastique Kabagwira, no ami hetan oan naʼin-tolu. Tuir buat neʼebé haʼu aprende kuandu sei kiʼik, haʼu hanoin katak haʼu-nia feen tenke hakneʼak iha haʼu-nia oin kuandu nia hasé ka husu buat ruma ba haʼu. Haʼu mós dehan katak sasán hotu iha uma laran mak haʼu-nian deʼit, no haʼu bele uza tuir haʼu-nia hakarak. Dala barak haʼu sai husi uma iha kalan no tama fali maizumenus tuku tolu dadeer ho lanu todan. Haʼu dere odamatan no se Skolastique neineik atu loke odamatan, haʼu baku nia.

 Iha tempu neʼebá, haʼu serbisu nuʼudar manajer ba kompañia seguransa nian, no haʼu hetan saláriu diʼak. Iha uma, Skolastique koko dada haʼu atu tuir igreja Pentekostál, tanba nia hanoin neʼe sei troka haʼu-nia hahalok. Maibé haʼu lakohi. Haʼu komesa selingkuh ho feto seluk. Tanba haʼu-nia hahalok violénsia no la iha morál, Skolastique no ami-nia oan naʼin-tolu muda no hela ho ninia inan-aman.

 Haʼu-nia kolega ida neʼebé idade ona koʼalia ho haʼu kona-ba haʼu-nia moris. Nia anima haʼu atu fila fali ba Skolastique. Nia dehan katak la diʼak ba haʼu-nia oan sira hela ketak husi sira-nia aman. Tan neʼe, iha tinan 2005, haʼu para hemu tua, husik feto seluk, no fila ba Skolastique. Iha tinan 2006 ami kaben. Maski nuneʼe, haʼu sei nafatin halo violénsia no abuza haʼu-nia feen.

 Iha tinan 2008, Testemuña ba Jeová ida naran Joel vizita ami-nia uma, no haʼu rona ba nia mensajen. Ba fulan balu, nia ho Testemuña ba Jeová seluk naran Bonaventure vizita beibeik haʼu, no ami halo diskusaun naruk kona-ba Bíblia. Haʼu husu pergunta barak, liuliu kona-ba livru Apokalipse. Tuir loloos, haʼu hakarak atu hatudu katak Testemuña ba Jeová mak sala. Porezemplu, haʼu husu tanbasá sira dehan katak “ema-lubun boot” neʼebé temi iha Apokalipse 7:9 sei hela iha rai, maibé versíkulu neʼe dehan katak “hamriik iha [Maromak nia] kadunan nia oin no iha Bibi-Oan [Jesus Kristu] nia oin.” Joel ho pasiénsia fó resposta ba haʼu-nia pergunta sira. Nia hatudu mai haʼu Isaias 66:1, neʼebé esplika katak Maromak bolu rai nuʼudar ninia fatin ‘atu tau ninia ain’. Entaun, tuir loloos ema-lubun boot hamriik iha rai iha Maromak nia kadunan nia oin. No haʼu lee Salmo 37:29, neʼebé dehan katak ema laran-loos sei moris ba nafatin iha rai.

 Ikusmai, haʼu halo desizaun atu estuda Bíblia. Entaun Bonaventure estuda ho Skolastique no haʼu. Buat neʼebé ami aprende husi Bíblia motiva haʼu atu troka haʼu-nia moris. Haʼu aprende atu hatudu respeitu ba haʼu-nia feen. Haʼu la husu tan nia atu hakneʼak iha haʼu-nia oin kuandu nia hasé haʼu ka hakarak husu buat ruma, no haʼu la dehan tan katak sasán hotu mak haʼu-nian deʼit. Haʼu mós para ona atu haree filme neʼebé hatudu violénsia. Atu halo mudansa sira-neʼe la fasil, presiza duni haraik an no hakaʼas an atu kontrola haʼu-nia an.

 Tinan balu liubá, haʼu lori haʼu-nia oan-mane primeiru naran Cristão, atu hela ho haʼu-nia família iha rai-Uganda. Maibé depois lee tiha Deuteronómio 6:4-7, haʼu komprende katak Maromak fó responsabilidade atu haboot ami-nia oan ba haʼu no haʼu-nia feen, no neʼe inklui hanorin sira kona-ba Bíblia nia matadalan. Bainhira ami lori fila ami-nia oan-mane ba uma, ami hotu kontente tebes!

 Haʼu aprende katak Jeová mak Maromak neʼebé laran-sadiʼa, no haʼu fiar metin katak nia fó ona perdua ba haʼu-nia hahalok no hanoin uluk nian. Haʼu kontente katak Skolastique mós komesa estuda Bíblia. Ami dedika ami-nia moris ba Jeová no hetan batizmu hamutuk iha loron 4 Dezembru 2010. Agora ami fiar malu, no kontente atu aplika Bíblia nia matadalan iha ami-nia moris família nian. Haʼu-nia feen kontente tebes tanba haʼu fila uma kedas depois serbisu. Nia mós hafolin dalan neʼebé haʼu hatudu dignidade no respeitu ba nia. Nia mós agradese katak haʼu halo desizaun atu la hemu tan tua, no katak haʼu laʼós tan ema siʼak-teen. Iha tinan 2015, haʼu simu knaar atu serbí nuʼudar katuas no tau matan irmaun-irmán sira iha kongregasaun. Husi ami-nia oan naʼin-lima, tolu hetan ona batizmu.

 Bainhira haʼu foin komesa estuda Bíblia ho Testemuña ba Jeová, haʼu husu pergunta barak antes haʼu prontu atu simu sira-nia hanorin. Maibé buat neʼebé haʼu gosta liu mak dalan neʼebé sira uza Bíblia atu fó resposta ba haʼu-nia pergunta sira. Skolastique no haʼu hafolin ema neʼebé serbí Maromak loos no hakaʼas an atu moris tuir ninia ukun-fuan sira hotu, laʼós balu deʼit. Haʼu agradese tebes ba Maromak Jeová tanba dada ona haʼu atu sai parte ba ninia família espirituál. Kuandu haʼu hanoin kona-ba haʼu-nia moris uluk nian, haʼu fiar duni katak ho Maromak nia ajuda, ema neʼebé hakarak troka sira-nia moris, bele duni hetan susesu no halo Maromak kontente.