Se Ita mak Testemuña ba Jeová ida, Ita sei sente oinsá se polísia akompaña Ita nuʼudar Ita haklaken husi uma ba uma? Neʼe akontese ba Joseph iha Mikronézia iha tinan 2017. Nia hamutuk ho Testemuña naʼin-tolu seluk hola parte iha kampaña espesiál atu haklaken ba ema neʼebé hela iha illa izoladu.

 Maizumenus iha meiudia, Testemuña naʼin-haat neʼe toʼo iha illa kiʼik neʼebé iha populasaun maizumenus 600. Illa neʼe nia administradór simu sira iha tasi-ibun. Joseph esplika kona-ba saida mak akontese tuirmai: “Administradór dehan katak polísia nia karreta bele tula ami ba uma hotu. Ami hakfodak, maibé ho respeitu ami dehan katak ami la presiza. Ami hakarak vizita ema hanesan baibain, neʼe mak laʼo husi uma ba uma.”

 Haklaken-naʼin sira-neʼe komesa laʼo, no sira hakarak atu koʼalia ba ema barak. Haklaken-naʼin sira hatete: “Ema iha illa neʼe hatudu laran-diʼak no gosta ami-nia mensajen. Tan neʼe, ami kleur uitoan iha uma ida-idak.”

 Oras balu liutiha, polísia nia karreta halai liu Joseph dala rua. Kuandu sira mai fali ba dala terseiru, sira para. Polísia husu Joseph se sira bele tula nia ba uma seluk neʼebé nia seidauk vizita. Joseph konta: “Haʼu dehan ba sira katak haʼu la presiza. Maibé sira obriga no dehan: ‘Ó iha tempu uitoan deʼit, entaun ami sei tula ó ba uma sira seluk.’ Haʼu labele ona dehan lae tanba iha duni uma barak neʼebé haʼu seidauk vizita. Nuʼudar ami toʼo iha uma ida-idak, polísia fó-hatene haʼu família sira-neʼe nia naran no dehan katak se haʼu dere odamatan maibé ema la sai, sira sei uza karreta nia apitu atu bolu uma-naʼin.

 “Ho polísia nia ajuda, ami konsege vizita uma hotu iha loron neʼe. Ami fahe livru barak no halo arranju atu vizita fali ema neʼebé hatudu interese.”

 Polísia sira fó-hatene Joseph katak sira “kontente tebes tanba bele fahe liafuan diʼak”. Antes rai nakukun, bainhira Testemuña sira atu fila, polísia sira hamriik iha tasi-ibun no kaer hela ita-nia publikasaun sira, ho oin-midar sira hiʼit liman fó adeus.