Domin ba Maromak no domin ba ema mak book Testemuña ba Jeová atu fahe mensajen husi Bíblia ba ema hotu, inklui mós sira neʼebé uluk la interese. (Mateus 22:37-​39) Domin ba Maromak mak book ami atu halo tuir Jesus nia mandamentu atu “fó sasin ho didiʼak.” (Apóstolu 10:42; 1 João 5:3) Atu halo tuir mandamentu neʼe, ami banati-tuir Maromak nia profeta sira iha tempu uluk neʼebé kontinua haklaken Maromak nia liafuan. (Jeremias [Yeremia] 25:4) No domin ba ema mós book ami atu hakaʼas an “haklaken liafuan diʼak kona-ba Maromak nia Ukun”, neʼebé bele salva ema hotu, inklui mós sira neʼebé uluk dehan katak sira la interese.​—Mateus 24:14.

 Bainhira ami fila fali ba uma ida neʼebé uluk ema dehan la interese, dala barak ami hasoru ema neʼebé interese tebes. Hanoin toʼok razaun tolu tuirmai neʼe:

•   Ema foun muda ba uma neʼe.

•   Ema seluk iha uma neʼe hatudu interese ba ami-nia mensajen.

•   Ema bele troka sira-nia hanoin. Ema nia situasaun ka situasaun iha mundu neʼe bele book ema atu buka “Maromak nia matadalan” no hatudu interese ba Bíblia nia mensajen. (Mateus 5:3) Hanesan ho apóstolu Paulo, ema neʼebé uluk kontra makaʼas mós bele troka sira-nia hanoin.​—1 Timóteo 1:​13.

 Maski nuneʼe, ami nunka obriga ema atu simu ami-nia mensajen. (1 Pedro 3:​15) Ami fiar katak ema ida-idak tenke foti desizaun rasik kona-ba ninia fiar.​—Deuteronômio (Ulangan) 30:19, 20.