Ia ty Mandeha An-dagnitse Agne?
Vale’e ara-baiboly
Andrianagnahare ro mijobogne o Kristiana handeha an-dagnitse agne reo, sady voafetra avao ka ty isa iareo. Mandeha an-dagnitse agne iareo naho fa mate. (1 Petera 1:3, 4) Toko’e hanam-pinoagne naho ho soa findesam-batagne avao iareo. Tsy hahafeno fepetse handeha an-dagnitse agne iareo naho tsy izay.—Efesianina 5:5; Filipianina 3:12-14.
Inogne ty raha hatao iareo an-dagnitse agne?
Ho mpanjaka naho mpisorogne miarake amy i Jesosy agnate ty 1 000 taogne iareo. (Apokalypsy 5:9, 10; 20:6) O fitondragne vaovao an-dagnitse agne iohoe ndra i “lagnitse vaovaoy” ro hifehe i “tane vaovaoy” ndra o ndaty maren-tane an-tane etoao. Hampea’e ka o ndatio mba hanjare voririke amy ty lafi’e iaby, arake ty nagnirian’Andrianagnahare aze tam-boaloha’e tagne.—Isaia 65:17; 2 Petera 3:13.
Fire ty isa o ndaty ho an-dagnitse agneo?
Mirehake ty Baiboly tie 144 000 ty isa o ndaty hovelomegne mba hiaigne an-dagnitse agneo. (Apokalypsy 7:4) Nitrea i apostoly Jaona tamy ty fahitagne “i Anak’agnondrỳ nitsangagne tamy i Vohy i Ziona eo, sady nisy 144 000 niarake tama’e.” (Apokalypsy 14:1-3) I Jesosy fa nivelomegne tamy ty matey o “Anak’agnondry” iohoe. (Jaona 1:29; 1 Petera 1:19) Ty toeragne ambone tana i Jesosy naho i 144 000 hiara-manjaka ama’e an-dagnitse rey o ‘Vohy i Zionao.’—Salamo 2:6; Hebreo 12:22.
“Agnondry tsy ampe” ty irehafagne o ndaty ‘tinoka naho jinobogne’ mba hiara-manjaka amy i Kristy reo. (Apokalypsy 17:14; Lioka 12:32) Midika zay tie tsy ampe avao iareo naho oharegne amo o agnondry i Jesosio iaby.—Jaona 10:16.
Heve-diso miomba o ndaty ho an-dagnitse agne reo
Heve-diso: Mandeha an-dagnitse agne iaby naho fa ndaty soa fagnahy.
Ty maregne: Mampitamà ty Andrianagnahare tie hiaigne nainai’e an-tane etoa ty ankamaroa o ndaty soa fagnahio.—Salamo 37:11, 29, 34.
Hoe ty Jesosy: “Tsy nisy nandeha mban-dagnitse mbeo.” (Jaona 3:13) Te hirehake reke tie tsy nisy nandeha mban-dagnitse mbeo o ndaty soa fagnahy nimate taloha’e rey, agnisa izay ty Abrahama, i Mosesy, i Joba naho i Davida. (Asan’ny Apostoly 2:29, 34) Nitamà ty hiaigne nainai’e an-tane etoa iareo.—Joba 14:13-15.
‘Fitsanganagne voaloha’e’ ty irehafagne i fitsangana i ndaty ho an-dagnitse agne rey. (Apokalypsy 20:6) Midika zay tie hisy fitsanganagne hafa ka, le i fitsanganagne hoahy ze ndaty hiaigne nainai’e an-tane etoa rey.
Mirehake ty Baiboly tie “tsy hisy fate sasa” naho fa minday ty Fanjakàn’Andrianagnahare. (Apokalypsy 21:3, 4) Tsy maintsy ho an-tane etoa ty hahatanteraha o faminaniagne iohoe, satria mbe lia ty tan-dagnitse agne naho nisy nimate zao.
Heve-diso: Ty ndaty tsikiraidraike ro mijobogne tie ho an-dagnitse agne reke sa ho an-tane etoa.
Ty maregne: I Andrianagnahare ro mijobogne tie ia amo o Kristiana tsy mivalikeo ro mahazo i ‘loka homei’e ze tinoka’e amy ty alala i Kristy Jesosỳ.’ Fiaignagne an-dagnitse agne o loka iohoe. (Filipianina 3:14) Tsy miankigne amy ty fagniria ty ndaty raike areke ty fijobognagne aze.—Matio 20:20-23.
Heve-diso: Tsy fagneva ty ho an-dagnitse agne ty ndaty raike kanao ampitamaegne tie hiaigne nainai’e an-tane etoa.
Ty maregne: Rehafe ty Baiboly tie “ndatiko” naho “ndaty jinoboko” vaho “tahie i Jehovah’ o ndaty hiaigne nainai’e an-tane etoa reo. (Isaia 65:21-23) Hahazo fitahiagne vata’e iareo satria ho tanterake amy iareo i fikasan’Andrianagnahare tamy ty voaloha’e hoahy o ndatioy, le tihoe ho voririke naho ho velogne nainai’e amy i paradisa an-tane etoay.—Genesisy 1:28; Salamo 115:16; Isaia 45:18.
Heve-diso: Tsy ara-bakiteny i isake 144 000 rehafe ty boke Apokalypsy.
Ty maregne: Maregne fa misy isake tsy ara-bakiteny ty amy Apokalypsy ao. Faie ara-bakiteny, ohatse, i tihoey “agnaragne 12, le i agnara i apostoly 12 i Anak’agnondrỳ.” (Apokalypsy 21:14) Azo atao ka ty mirehake tie ara-bakiteny i isake 144 000. Dineho zao:
Rehafe ty Apokalypsy 7:4 fa “ty isa o nisiagne tampò [ndra azo antoke fa ho an-dagnitse agne], le 144 000.” Faie rehafe ty andinin-teny magnarakarake io ty miomba i “vahoake maro tsy vatse isahegney.” Hovonjen’Andrianagnahare ka ze agnisa o “vahoake maro” iohoe. (Apokalypsy 7:9, 10) Naho ohatse tsy ara-bakiteny i 144 000 fa irehafagne ndaty tsiefa, le tsy hay zane ze maha sambe hafa aze amy i “vahoake maro tsy vatse isahegney.” a
Rehafe ty Baiboly tie ‘vinily boake amo o ndatio eo ho lohavoa” o 144 000 rehoe. (Apokalypsy 14:4) Ampaha’e kidikidy avao ty atao tihoe “lohavoa.” Tena mete zay mba hirehafagne o hiara-manjaka amy i Kristỳ an-dagnitse agne reo, satria tsy ampe avao ty isa iareo naho oharegne amy ty isa ty ndaty hindese iareo an-tane etoa.—Apokalypsy 5:10.
a Nirehake ty heve’e miomba i isake 144 000 rehafe i Apokalypsy 7:4 ty Profesora Robert Thomas. Hoe reke: ‘Isake voafaritse soa io fa tsy manahake i isake tsy voafaritse rehafegne amy Apokalypsy 7:9 aoy. Naho tsy ara-bakiteny io, le tsy misy isake azo rambesegne ara-bakiteny ty amy i bokey ao.’—Apokalypsy 1-7: Fagnazavagne ty Apokalypsy (angilé), peje 474.
Va'e ho Tea'o Ka
ESSENTIAL BIBLE TEACHINGS
Inogne o Fanjakàn’Andrianagnahare Zao?
Tamy ty fanompoagne natao i Jesosy, le ty Fanjakàn’Andrianagnahare ty foto-keve ty fampianara’e. Tagnate ty taogne maro, le nangatake ty hiavia o Fanjakagne iohoe ze mpanonjohy ty lia’e.
FAMPIANARA TY BAIBOLY
Andramo ty fampianara’ay Baiboly
Afake mianatse Baiboly maimaim-poagne miarake amy ty ndaty hagnampe azo hianatse aze rehe.