Talily Soa Nisorate i Jaona 12:1-50
12 Niavy ta Betania ao ty Jesosy enegne andro taloha i Pasakey. Tao ty nisy i Lazarosy, i nivelome’e tamy ty matey.
2 Nisy nikarakara hanegne hariva hoahy i Jesosy ty tao, le i Marta ty nanjotso i hanegney hoahy iareo. Agnisa ty niarake nihinagne* tama’e ka ty Lazarosy.
3 Le nangalake ze tavoangy misy menake magnitse narda tsy mitampoke sady tena lafo vily zay ty Maria, le naili’e tan-tombo i Jesosy eo. Nifafà’e tamy i volo’ey i tombo i Jesosỳ naho fa niavy eo. Le nirey nagneneke i tragnoy ty hagny i menakey.
4 Faie hoe ty Jodasy Iskariota, i mpiana i Jesosy hifotetse azey:
5 “Nagnino naho navily 300 denaria i menake magnitse ignehoe, le nimeagne o mahantrao ty vili’e?”
6 Nirehake izay ty Jodasy, faie tsy noho ty fiferegnesa’e o mahantrao ty nahavy aze nirehake izay, fa noho ireke mpangalatse sady ireke ka ty nitagne i boatem-bolay. Lava nangalare’e avao ty vola tao.
7 Le hoe ty Jesosy: “Engao’areo avao reke, fa ho fagnomanagne i andro handevegnagne ahỳ ze o raha atao’e zao.
8 Ty ama’areo eo lava hisy ndaty mahantra avao. Fa iraho tsy raha ho ama’areo eo avao.”
9 Maro ty Jiosy nahay tie tamy i tanàgney eo ty Jesosy. Nandeha mbama’e mbeo areke iareo, tsy tihoe mba hagnente aze avao fa mba hagnente i Lazarosy ka, i nivelome’e tamy ty matey.
10 Niarake nidineke ty fomba hamonoagne i Lazarosy ka o lahibey ty mpisorogneo,
11 satria noho ireke ty nahavy i Jiosy maro nandeha ta Betania agne rey hino i Jesosy.
12 Ie nihamaray igne, le nirey i ndaty niavy hamonje fete rey tie ho avy a Jerosalema ao ty Jesosy.
13 Nangalake sampana dante areke iareo, le nandeha mbama’e mbeo hanalaka aze. Nirehake mafe hoe izao ka iareo: “Mba rombaho reke! Hotahiegne abey i avy amy ty tahina i Jehovah-y, i Mpanjaka o Israelioy!”
14 Naho fa nahatrea anam-birìke ty Jesosy, le nitingitse ambone’e ey. Nitanterake tamy izay i faminaniagne manao tihoey tie:
15 “Ko matahotse ry anak’ampela i Ziona! Inge i mpanjaka’oy mitingitse anam-birìke.”
16 Tsy nitaka i mpiana i Jesosy rey o raha rehoe tamy ty voaloha’e, faie naho fa nimeagne voninahitse ty Jesosy vaho izay nitsiaro iareo tie nagnatanterake i raha nisorategne miomba aze rey i raha natao i vahoakeỳ.
17 Lava nirehake miomba i Jesosy avao i vahoake nagnatreke teo tamy ireke nitoka i Lazarosy boake an-kibory aoy naho namelogne aze tamy ty matey.
18 Noho ty fahareiza i vahoakey o fahagagagne natao’e iohoe ka ty nahavy iareo nanalaka aze.
19 Nifampirehake areke o Fariseò tie: “Trea’areo hinaneo? Tsisy raha vitantikagne ndra raike! Henhenke ty tontolo toy iaby magnorike aze.”
20 Nisy Grike ty tamy i ndaty niavy mba hivavake tamy i feteỳ.
21 Nandeha mbamy i Filipo mbeo iareo. A Betsaida a Galelia agne ty fiavia i Filipo. Hoe i ndaty grike rey tamy i Filipo: “Mba te hahatrea i Jesosy zahay aba!”
22 Le nandeha mbamy i Andrea mbeo ty Filipo hirehake izay. Nandeha mbamy i Jesosy mbeo iareo roe lahy naho fa niavy eo mba hirehake izay.
23 Hoe ty navale i Jesosy iareo: “Avy ty fotoagne hagnomeagne voninahitse i Ana o ndatỳ.
24 Volagneko ama’areo,* fa naho tsy alevegne ty tabiry raike sady tsy lo, le tsy hihamaro fa hijanogne ho tabiry raike avao. Fa naho alevegne reke sady lo, le hamoa maro.
25 Ze tea ty fiai’e ro hamoe aze. Fa ze malaigne ty fiai’e amy ty tontolo toy eto, le miaro aze mba hahazoa’e i havelogne nainai’ey.
26 Ze te ho mpanompo, le toko’e hagnorike ahy. Le ze misy ahy ro hisy ty mpanompoko ka. Naho misy te hanompo ahy, le hagnomey voninahitse aze ty Rae.
27 Minekoneko raho zao! Ino koahe ty raha horehafeko? O Baba, avoto amy ty fotoagne mahaore toy raho. Faie tsy maintsy hanjò ahy io, satria io ty niaviako.
28 O Baba, meo voninahitse i tahina’oy.” Le nisy fiaragnanagne boake an-dagnitse agne nanao tihoe: “Fa nagnomey voninahitse aze raho sady mbe hagnomey voninahitse aze indraike.”
29 Naho fa naharey izay i vahoake nitsangagne teoy, le nirehake tie mangotroke i androy. Fa ty ila’e nirehake tie: “Anjely o nirehake tama’e eo.”
30 Le hoe ty Jesosy: “Tsy natao ho ahy i fiaragnanagne nirei’areo anianỳ fa natao ho anareo.
31 Amy izao, le hotsaraegne ty tontolo toy sady horoahegne i mpitondra ty tontolo toỳ.
32 Faie naho fa hahantogne raho, le hitaogne ty karaza o ndaty iaby ho mbamako mbetoa.”
33 Nirehake izay reke mba hagnazavagne amy iareo i fomba himateza’e tsy ho elay.
34 Le hoe ty navale i vahoakey aze: “Nirei’ay amy i Lalànay ao tie hovelogne nainai’e ty Kristy. Nagnino areke rehe ro mirehake tie tsy maintsy hahantogne i Ana o ndatỳ? Ia o Ana o ndaty rehafe’o zao?”
35 Hoe areke ty Jesosy tamy iareo: “Kede sisa, le tsy ho ama’areo eo sasa i hazavagney. Mandehana areke amy i hazavagney mbe ama’areo eoy, amy izay tsy horese i iegney nareo. Fa ze mandeha amy i iegney ao, le tsy mahafantatse tie hombaia reke.
36 Naho mbe managne i hazavagney nareo, le manehoa finoagne aze, amy izay nareo mba ho ana ty mazava.”
Naho fa boake nirehake izay ty Jesosy, le nandeha nietake iareo reke.
37 Ndra tie nanao famantaragne maro tagnatreha iareo eo aza reke, le tsy nino aze iareo.
38 Amy izay tanterake i faminaniagne nirehafe i Isaia mpaminany manao tihoey tie: “O Jehovah, ia ty nino i raha nirehafe’ay rey?* Ia ty nanoroa i Jehovah ty fità’e?”
39 Tsy nino iareo, satria fa nirehake ka ty Isaia mpaminany tie:
40 “Nigoa’e ty maso iareo, le natao’e mafe ka ty fo iareo, amy izay tsy hahatrea ty maso iareo, le ty fo iareo ka tsy hahazo ty raha rey iareo mba tsy hiheregna iareo, le hositragneko.”
41 Nirehake o raha rehoe ty Isaia, satria fa nahatrea ty voninahi’e sady nirehake ty miomba aze.
42 Maro ka ty manam-pahefagne nino i Jesosy, faie noho ty fatahora iareo o Fariseò, le tsy nahavany nirehake izay tagnatreha o ndatio eo iareo, tsy mone horoahegne boake amy i sinagogay ao.
43 Ty anto’e, ty voninahitse boake amo o ndatio ro tena nitea iareo ambone ty voninahitse boake aman’Agnahare.*
44 Faie nirehake mafe ty Jesosy tie: “Ze mino ahy, le tsy iraho avao ro inoa’e fa i nagnirake ahỳ ka.
45 Ze mahatrea ahy, le mahatrea i nagnirake ahỳ ka.
46 Niavy raho mba hagnazava ty tontolo toy, amy izay ze kila ndaty mino ahy tsy hijanogne amy i iegney ao.
47 Fa ze maharey ty rehako faie tsy magnorike izay, le tsy mitsara aze raho. Ty anto’e, tsy niavy mba hitsara ty tontolo toy raho fa hagnavotse ty tontolo toy.
48 Ze tsy midare ahy sady tsy mandrambe ty raha rehafeko, le managne ty hitsara aze. I raha nirehafeko rey ty hitsara aze amy ty andro fara’e.
49 Ty anto’e, tsy ty heveko manokagne o rehafekò, fa ze raha nandilia i Rae, i nagnirake ahỳ, o ambarakò.
50 Haiko ka fa ty lili’e le midika ho* havelogne nainai’e. Ze raha nisaontsie i Rae amako avao areke o rehafekò.”
Fagnamarehagne ambane peje
^ Ndra: “nandre nitso-kiho amy i latabatsey eo.”
^ Abt: “Volagneko ama’areo to vata’e.”
^ Ndra: “i raha nitalilie’ay (hafa’ay)?”
^ Ndra: “ty dera boake amo o ndatio ro nitea iareo mandikoatse ty dera baoke aman’Agnahare.”
^ Ndra: “ro.”
