Talily Soa Nisorate i Matio 7:1-29
7 “Ko mitsaratsara sasa nareo mba tsy hotsaraegne;
2 satria arakarake ze fitsaragne atao’areo ro hitsaragne anareo, le arakarake ze fagnaragnagne ampiasae’areo ro hagnaragna iareo anareo.
3 Nagnino areke rehe ro magnente i akata kidikidy amy ty maso i rahalahi’oy, ie amy izao misy hatae bey miebagne ty amy i maso’oy ey?
4 Ndra, akore moa ty ahafaha’o mirehake amy i rahalahi’oy tie: ‘Etia hafahako i akata amy i maso’oy eỳ’, ie amy izao tsy trea’o tie misy hatae bey miebagne ty amy i maso’oy?
5 Ry mpanao soamiatreke! Afaho hey i hatae bey amy i maso’oỳ, amy izay hotrea’o soa ty fomba hagnafahagne i akata kidikidy amy i maso i rahalahi’oy eỳ.
6 “Ko meigne o amboao o raha masigneo. Ko atorake amo o lambo eo ka o vatosoa* sarobilio, tsy mone holiàlià’e avao, le ndra inareo ka ro hifotera’e sady horimidrimite’e.
7 “Mangataha avao, le homeagne nareo. Mipaliava avao, le hahatrea nareo. Mampinkonkogna avao, le hosokafegne nareo,
8 satria ze mangatake ro hahazo, le ze mipay ro hahatrea, le ze mampinkonkogne ka ro hosokafegne.
9 Azo antoke fa naho fa mangatake mofo ama’areo ty ana’areo, le tsy homea’areo vato.
10 Ndra naho fa mangatake fiagne ama’areo, le tsy homea’areo meregne.
11 Inareo aza ndra tie ndaty tsy voririke* mahay magnomey raha soa ty ana’areo, somandrake fa i Rae’areo an-dagnitse agney! Azo antoke fa hagnomey raha soa hoahy ze mangatake ama’e reke.
12 “Ze raha tea’areo hatao o ndatio ama’areo ro anò’areo amy iareo. Naho ty maregne, le izay ty raha tea i Lalànay naho o Mpaminanio hampianaregne.
13 “Miziliha amy i vavahady terey, satria bey sady malalake i vavahady naho i lalagne mbamy i famonovonoagney mbeoy, le maro ty mizilike agne;
14 fa i vavahady naho i lalagne mbamy i havelogney mbeoy tere sady maifitse, le tsy ampe avao ty mahatrea aze.
15 “Mitaoa amo o mpaminany sandoke avy ama’areo eo mirongogne volon’anak’agnondrio, satria manahake o amboahako keré mafeo ty agnate iareo ao.
16 Ty raha atao* i ndaty rey ty hamantara’areo aze. Misy ndaty vao handrofotse voaloboke amo o raha mitiry misy fatipatikeo ey? Oho’o, tsy hisy zay.
17 Fa hai’areo tie ze hatae soa ro mamoa voa soa, fa ze hatae raty mamoa voa raty.
18 Ty hatae soa le tsy ombia hamoa voa raty, le ty hatae raty tsy ombia hamoa voa soa.
19 Naho misy hatae tsy mamoa voa soa, le hofiràegne sady horoagne agnate afo ao.
20 Manahake izay avao ka areke, fa ty raha atao iareo ro hamantara’areo i ndaty mpaminany sandoke rey.
21 “Tsy ze mirehake amako tie: ‘O Tompo, Tompo’, ro hizilike amy i Fanjakà i lagnitsey ao, fa ze manao ty zoton’arofo i Raeko an-dagnitse agney avao.
22 Fa amy ze andro zay, le maro ty hanao amako tihoe: ‘O Tompo, Tompo, tsy fa naminany tamy ty agnara’o vao zahay, sady fa nandroake demonia tamy ty agnara’o, vaho nanao fahagagagne maro tamy ty agnara’o?’
23 Faie izao ty horehafeko amy iareo: ‘Tsisy fahafantarako anareo ndra kidikidy! Misintaha agne* nareo mpandika lalànao!’
24 “Ze maharey o raha rehafeko zao sady magnorike aze areke, le manahake ty lahilahy raike mahimbagne nagnoregne ty tragno’e tambone lamilamy ey.
25 Ie niavy bey i oragney sady nandranovohitse vaho nikofofoke i tiokey, le tsy nihomake i tragnoy satria naoregne tambone lamilamy ey.
26 Fa ze maharey o raha rehafeko zao ka faie tsy magnorike aze, le manahake ty lahilahy raike minegne nagnoregne ty tragno’e tambone faseke ey.
27 Ie niavy bey i oragney sady nandranovohitse vaho nikofofoke i tiokey, le nihomake i tragnoy sady le tsy nisy hotinimpogne.”
28 Naho fa boake nirehake ze raha rezay ty Jesosy, le nigaga iaby i vahoakey noho ty fomba fampianara’e.
29 Ty anto’e, nampianatse iareo manahake o ndaty managne fahefagneo reke fa tsy manahake o mpampianatse lalànao.
Fagnamarehagne ambane peje
^ Ndra: “perla.”
^ Ndra: “raty fagnahy.”
^ Abt: “ty voa vokare.”
^ Abt: “Misintaha ahy.”
