Natao mba hahamora ty fagnentea’o andinin-teny amy Baiboly ao naho ze fitantaragne mifanandrife amy ty olagne atrehe’o ty boke toy. Tsy izay avao fa hagnampe azo hahatrea andinin-teny mete soa ka mba hampaherezagne ty hafa naho hagnampeagne iareo handrambe fanapahan-kevetse mampifale i Jehovah. Filio ze foto-kevetse mahaliagne azo. Isake foto-kevetse, le misy fagnonteneagne afake magnampe. Hazavaegne ao ka ze hevetse lahibey tantaraegne amy i andinin-tenỳ ao. (Henteo ty efajoro tihoe “ Akore ty Fampiasagne ty Boke Toy?”) Ty fampiasa’o ty boke toy, le hagnampe azo hahatrea torohevetse azo ampiharegne naho tari-dalagne vaho fampaherezagne boake amy ty Saontsin’Andrianagnahare ao. Hahatrea harena sarobily hozaraegne amy ty hafa ka rehe, agnisa izay ohatse ty toro lalagne ara-baiboly azo’o ampiasaegne mba hagnampeagne naho hampaherezagne iareo.

Tsy ze kila andinin-teny mirehake miomba i foto-kevetsey ro tanisaegne ato, fa ze tena ilaegne avao. Irehe ro mbe hanao fikarohagne fagnampe’e naho ilaegne zay. (Oh 2:1-6) Ampiasao ty Fitaovagne Fikarohagne Hoahy ty Vavolombelo i Jehovah naho ty Fanondroagne Boke ty Vavolombelo i Jehovah mba hahazoa’o fagnazavagne fagnampe’e miomba i andinin-tenỳ naho ty fomba hampiharagne aze. Henteo ka ze boke niboake tafara amy izay rehe maharake ze fagnazavagne fara’e.

Lonike abey ty boke toy mba hagnampe azo hahazo fahendreagne, fahalalagne naho hahatakatse soa ty hevetse boake amy ty Saontsin’Andrianagnahare ao. Naho mampiasa ty boke toy rehe, le ho rese lahatse tie “velogne naho mahery ty Saontsin’Andrianagnahare.”​—He 4:12.