Hoe ty Jehovah tamy i Samoela: ‘Akia ho amy i Jese agne, fa ty raike amo o ana-dahi’eo ro ho mpanjaka o Israelio.’ Le nandeha ty Samoela. Naho nahatrea ty voalohan’ana i Jese reke, le nieretseretse tie: ‘Itoy ty hofilie i Jehovah.’ Faie tsie io hoe ty Jehovah. Le hoe ty Jehovah: ‘Ty agnate fo o ndatio ro henteako fa tsy ty fitsangana’e.’

Natoro i Jese i Samoela ty enegne amo o ana-dahi’eo. Faie hoe ty Samoela: ‘Tsisy finily i Jehovah iareo. Fa izay iaby vao ty ana’o?’ Le hoe ty Jese: ‘Mbe miarak’ agnondry agne ty Davida faralahy.’ Naho fa niavy ty Davida, le hoe ty Jehovah tamy i Samoela: ‘Io ty nifilieko.’ Nihosora i Samoela menake amy izay ty loha i Davida, fa i reke ty ho mpanjaka o Israelio.

Tafara izay, le nialy tamo o Israelitao o Filistinao. Nanagne maramila bey naho abo atao tihoe Goliata iareo. Nagnambanembane o Israelitao avao reke sady nikorake tihoe: ‘Mijobogna ndaty raike hialy amako. Naho mandrese reke, le ho ndevo’areo zahay, faie naho reseko reke, le ho ndevo’ay nareo.’

Maramila Israelita i zoke i Davida rey. Naho fa nanese hanegne hoahy iareo reke, le naharey ty feo i Goliata. Le hoe reke: ‘Hialy ama’e raho.’ Le hoe ty Saoly Mpanjaka: ‘Ihe anio mbe ajaja.’ Le hoe ty Davida: ‘Hagnampe ahy ty Jehovah.’

 Nengà i Saoly hagnisia i Davida ty akanjo findese’e mialy, faie hoe ty Davida: ‘Tsy leoko toy.’ Nanday piletse ty Davida, le nangalake vato bory dime tam-bavasaka ey. Natao’e tagnate kitapo’e tao i vato rey, le nilay mbamy i Goliata mbeo reke. Hoe ty Goliata: ‘Ty hajaja’o hoe tia hao kahe! Mbetoa rehe fa le ampihinaneko o vorogneo naho o bibio.’ Tsy natahotse ty Davida. Hoe reke: ‘Ihe minday mesabey naho lefogne, fa izaho minday ty tahina i Jehovah. Tsy izahay ro iali’areo fa i Jehovah. Ho trea’areo soa fa mahery ambone o mesabeio naho o lefogneo ty Jehovah. Hatao’e ze handresea’ay anareo.’

Nangalake vato raike ty Davida, le napile’e an-kandry i Goliata ey. Nalente i Jehovah an-kandri’e eo i vatoy, le nidaraboke ambaneo reke. Nilay iaby i Filistina rey. Matoky i Jehovah manahake i Davida ka vao rehe?