Jehovah a Andrianagnahare ty namboatse o fanambaliagneo voaloha’e. Mirehake ty Baiboly fa ‘nindese’e mbamy i lahilahý mbeo i ampela’ voaloha’ ey naho fa nivita voatse. Le hoe ty hafalea i Adama: “Ela ty ela le itoy ro taola ty taolako naho nofotse boake amy ty nofoko.” (Genesisy 2:22, 23) Mbe teà i Jehovah ho sambatse avao ty fanambalia o ndatio hatrake amy izao.

Naho fa manambaly o ndatio, le mitamà fa atao’e ho tomombagne iaby ze kila raha. Faie tsy mahaintsy misy raha manahiragne avao ty mpivaly ndra tie mifankatea manao akore iareo. (1 Korintianina 7:28) Hagnampe anareo mirovaly miroanake ho sambatse ty fanoroa ty Baiboly amy ty bokekele toy atoagne naho orihe’areo.—Salamo 19:8-11.

INOGNE TY RAHA REHAFE TY BAIBOLY? O lahilahio ro ambone lohàgne amy ty keleia’e.—Efesianina 5:23.

Teà i Jehovah hagnoloholo aman-katea ty vali’e ty lahilahy manambaly. (1 Petera 3:7) Nimey i Jehovah ho tovo ty lahilahy ty ampela sady irie’e ho tea naho himane ty vali’e ty lahilahy. (Genesisy 2:18) Toko’e hikokoa’o ty vali’o, le ze hahasoa aze hey ro anò vaho izay ty azo.—Efesianina 5:25-29.

Teà i Jehovah hiasy ty vali’e naho hagnampe aze hahavita’e soa ty andraiki’e ty ampela manambaly. (1 Korintianina 11:3; Efesianina 5:33) Oriho ze fanapa-han-keve’e sady anò amy ty fo’o ty fagnampea’o aze soa tie ho tomombagne ze raha anoe’e. (Kolosianina 3:18) Naho izay ty atao’o, le hofale ama’o ty vali’o naho i Jehovah.—1 Petera 3:1-6.

INOGNE TY TOKO’E HATAO’O?

• Agnonteneo i vali’o ty raha toko’e hatao’o soa tie hivagnona ty fanambalia’areo. Tsanogno soa reke, le kezaho ty hahasoa anareo

• Mahalignisa. Elaela rehe vaho hahafantatse ty raha hatao’o hahasambatse ty vali’o, le manay izay ka reke

INOGNE TY RAHA REHAFE TY BAIBOLY? Anò ze haha- soa ty vali’o. (Filipianina 2:3, 4) Atorò aze fa tsy misy raha atakalo’o aze reke sady ko haligno fa teà i Jehovah “ho lem-pò amy ze kila o ndaty” ty mpanompo’e. (2 Timoty 2:24) Dineho soa ze raha ho rehafe’o fa ‘hoe tinombo ty fibira ty azo ty rehake mirararara, fa ty reha ty mahilala ro mahajangagne.’ (Ohabolana 12:18) Hagnampe azo hahay mirehake aman-kasoa fagnahy naho hanambetambe ty fagnahy i Jehovah.—Galatianina 5:22, 23; Kolosianina 4:6.

INOGNE TY TOKO’E HATAO’O?

• Mivavaha heike mba tsy ho tsekatsekake sady hitsanogne soa ty heve i vali’o naho misy raha lahibey ho rehafegne

• Dineho soa ty raha ho rehafe’o naho ty hirehafa’o aze

INOGNE TY RAHA REHAFE TY BAIBOLY? Naho fa mpivaly nareo le “nofotse raike.” (Matio 19:5) Faie mbe sambe ndaty roe karazagne nareo, le izay ty va’e tsy hahamira ty heve’areo. Mianara hiharo hevetse naho hifampitrétré nareo. (Filipianina 2:2) Ko atao ambanen-draha zay naho fa hanapa-kevetse. Hoe ty Baiboly: “Ho avy eo ze raha safiriegne naho misy mpanoro hevetse.” (Ohabolana 20:18) Oriho ty fanoroa o Baibolio naho fa handrambe fanapahan-kevetse lahibey nareo mirovaly.—Ohabolana 8:32, 33.

INOGNE TY TOKO’E HATAO’O?

• Rehafo amy i vali’o ze raha mahafale ndra mahaboseke azo fa tsy ze raha misy naho ty eretsere’o avao ro rehafegne

• Mirehafa amy i vali’o heike naho fa misy raha hanoe’o