TY rehake tam-boaloha’e tagne nadika tihoe “sareten-tsovala” amy ty Dikan-drehake Tontolo Vaovao ao, le azo irehafagne sarete isan-karaza’e. (As 8:28, 29, 38) Faie hoe sareten-tsovala bey ty nitingira i Etiopianay fa tsy ila’e fientegne mialy rey ndra i mpanao korsa rey. Dineho moa ty anto’e retoa.

Manam-pahefagne ambone handeha lavitse i Etiopianay. ‘Ndaty ambone tambane fahefà i Kandasy mpanjakavave i Etiopia reke sady niandraikitse ty fanagna’e iaby.’ (As 8:27) Agnisa ty faritane i Etiopia taloha ty Soudan amy izao naho ty tapa’e atimo amy i Ejipta amy izao. Va’e tsy manahake i sareten-tsovala mahazatse rey areke ty nitingira’e, satria tsy maintsy ninday ze raha nilae’e amy i lia lavitse hatao’ey reke. Ty sareten-tsovala fitaonagne ndaty tamy ty taonjato voaloha’e, le nisy larò’e efatse sady nisy tragno’e. “Nalalake soa reke, le niazo nisiagne entagne naho raha maro hafa, le nahazo aigne soa ze tao. Nanjare niafake nanao lia lavitse areke o ndatio,” arake ty fagnazavagne miomba ty boke Asan’ny Apostoly.

Namaky teny i Etiopianay tamy i Filipo nagnatogne azey. Mirehake i fitantaragney tie “nilay mbamy i saretey mbeo ty Filipo sady naharey aze namaky mafe ty boke Isaia mpaminany.” (As 8:30) Tsy natao ho entegne milay mafe o sareten-tsovala iohoe. Satria nandeha moramora avao reke, le izay ty nahafaha i Etiopianay namaky teny avao sady izay ka ty nahafaha i Filipo nilay nagneagne aze.

“Nangatake i Filipo hanganike naho hitoboke agnila’e eo” i Etiopianay. (As 8:31) Tsy maintsy mitsangagne ze ndaty mitingitse i sareten-tsovala entegne milay rey. Faie amy ila’e findesagne ndaty handeha lavitse rey, le nisy toeragne hitoboha i Etiopianay naho i Filipo.

Arake ty fitantaragne amy Asan’ny Apostoly toko 8 ao naho ty porofo boake amo o tantarao, le sareten-tsovala bey tsy manahake ty findese o maramila mpialio ty sare i sareten-tsovala nitingira i Etiopianay amy ty boke aman-gazetentikagne niboake fara’e.