MISY RAHAVAVE telo mitoboke amy ty tokonose kede atao tihoe Sangir Besar, a Indonezia agne. Taogne tsiampeampe lasa zay, le niara-niasa tamoron-driakey iareo telo vave. mpampianatse Baiboly ty ahafantara ty ndaty agne iareo. Faie misy asa hafa ka atao iareo.

Voaloha’e, mandeha amoron-driakey iareo mipay vato bey, le ente iareo naho fa avy eo. Manahake o labolio ty habey ty vato ila’e. Afara izay le mitoboke amy ty seza iareo, le mampiasa maritò mba hamoiafoiagne i vato rey, mba hanjare kedekede manahake o atolio. Naho fa vita zay, le atao iareo agnate ty sihoagne i vato rey, le indese iareo amy ty toeragne misy iareo agne. Atao iareo agnate ty gony bey i vato rey, le avily iareo amo o mpamboatse lalagneo.

Agnisa i rahavave rey ty Hulda. Noho ty raha iaigna’e, le manam-potoagne soa hanoagne o asa iohoe mandikoatse ty ndaty hafa reke. Nampiasa’e mba hagnomeagne ze raha paliae ty keleia’e isan’andro ty vola niazo’e tamy io. Faie nisy tanjogne hafa ka tea’e hotratseregne. Te hanagne tablety reke mba hahafaha’e hampiasa JW Library^®. Nihay i Hulda fa hagnampe aze hagnasoa ty fanompoa’e naho hagnampe aze hahatakatse soa ty hamarenagne, ty video naho ty raha hafa agnate’e ao.

Niasa roe lera isake maraindraigne reke tagnate ty vola’e raike tsy-tapa’e, mba hamoiafoiagne i vato rey naho hitaonagne aze agnate tobile ao. Tamy ty fara’e, le niampe mba hivilianagne i tabletỳ, ty vola niazo’e.

Hoe ty Hulda: “Ndra tie nirokake naho nanaintaigne aza ty vatako noho ty famoiafoiagne i vato rey, le nihalignoko iaby zay naho fa nampiasa i tabletikoy raho, satria nagnampe ahy mba hagnasoa ty fanompoako io sady nagnamora ty fagnomanako fivoriagne.” Nirehake ka reke tie nagnampe aze o tablety iohoe tamy ty fanomboha i arete-manjamagney, satria natao tamy ty internet ty fivoriagne naho ty fanompoagne tagne. Miarake fale amy i Hulda tika satria nitratse’e i tanjo’ey.