“Simba o teots’andrò sady tsy azo iaignagne ty tane toy.”​—I Mpiambegney (angilé).

 Manjare miatreke olagne lahibey o ndatio, ie amy izao ty raha atao’e avao ty mahavy izay. Magneke o mpahay siansao fa ty raha atao o ndatio avao ty mahavy o hafanagneo. Nagnovaova o toets’andrò zay sady nahavy loza maro. Intoagne iaby ty ohatse amy izay:

•   Miseho mateteke tihoe tena mikorontagne o toets’andrò, ohatse manjare mafana bey i androy, ndra misy faosa, ndra oram-bey. Ireo ty mahavy o tondra-dranò ndra afo magnorò.

•   Mitsonike i gilasỳ, agnisa izay i gilasy amy ty Lengontane Avaratse agney.

•   Mitombo ty haabo i riakey.

 Voakasike ty fiovaovà o toets’andrò ty tane toy iaby. Izao ty nirehafe ty gazete New York Times naho fa boake nagnazava ty raha miseho amy ty firenena 193 reke: “Mila vonje ty tane toy.” Maro ty marare sady mate noho ty fiovaovà o toets’andrò. Izay ty nahavy ty Fikambanagne Iraisam-pirenena Miomba ty Fahasalamagne nirehake tihoe “ty fiovaovà o toets’andrò ty atahoragne tena hamparare o ndatio.”

 Faie mbe misy raha azo tamaegne naho henteagne ty raha rehafe ty Baiboly. Fa nirehafe io mialoha o raha miseho treantikagne amy hinane zaò. Faie tsy izay avao fa hazavae’e ka tie nagnino tikagne ro matoky fa hanao raha ty Andrianagnahare. Rehafe ty Baiboly tie ino ty raha hataon’Andrianagnahare mba hanagnantikagne hoavy fanjaka.

 Ie. Fa ampoizentikagne tie hiseho ze o fiovaovà ty toets’andro noho ty fiakara o hafanagneo zao, naho fa henteagne ty raha rehafe ty Baiboly.

 Faminaniagne: “Amy ty andro fara’e, le hisy fotoan-tsarotse tsy mora atrehegne. Fa ho tea tegna o ndatio, ... ho mora mivalike, ... tsy ho azo ifagnarahagne, ... ho mpifotetse, ho bey zizo.”​—2 Timoty 3:1-4.

 Nirehake mialoha o Baibolio tie ho raty toetse o ndatio, le izay ty agnisa ty anto’e mahavy iareo hanimba o tontolo iaignagneo. Maro ty fitondram-panjakagne naho mpandraharaha tea vola losotse, le tsy midare ty taranake afara ao. Te hiara-miasa avao iareo mba hampijanognagne ty fiakara o fanao. Faie tsy mete mitovy hevetse amy ty raha toko’e hatao iareo.

 Trea boake amo o faminaniagne io areke tie tsy azo tamaegne hagnova ty raha atao’e sady hiaro o taneo o ndatio. Ie aza rehafe ty Baiboly fa “vao mainke hiharaty” o ndaty tea tegnao.​—2 Timoty 3:13.

 Rehafe ty Baiboly fa tena tea i Jehovah a, i Andrianagnahare Mpamorogney, ty tane toy naho o ndaty mipetrake etò. Misy andinin-teny telo retoagne manoro fa tena hanao raha ty Andrianagnahare.

1.  1. ‘Tsy tihoe tsy misy dika’e ty namboaran’Andrianagnahare ty tane toy fa namboare’e hitobohagne.’​—Isaia 45:18.

    Hotanterahen’Andrianagnahare ty raha nisafirie’e miomba ty tane toy. (Isaia 55:11) Tsy henga’e ho poteke io ndra tsy ho azo hitobohagne.

2.  2. ‘Ze ndaty mpandefetse avao ro handova ty tane toy, le tena ho fale satria tena hiadagne. Ze ndaty maregne ro handova ty tane toy, le hitoboke eo nainai’e.”​—Salamo 37:11, 29.

    Mampitamà ty Andrianagnahare fa hiaigne nainai’e an-tane etoy o ndatio sady hilamigne ty amy izay.

3.  3. “Fa ty raty fagnahy horinganegne tsy hisy an-tane toy.”​—Ohabolana 2:22.

    Mampitamà ty Andrianagnahare fa hamonovono ze misatry raha manao raha raty, agnisa izay ze manimba ty tane toy.

 Akore ty ataon’Andrianagnahare mba ho tanterake ty fampitamà’e miomba ty tane toy? Hampiasa fitondram-panjakagne raike reke. I Fanjakàn’Andrianagnaharey io. (Matio 6:10) An-dagnitse agne ty misy o Fanjakagne iohoe sady hifehe ty tane toy iaby. Tsy voatere hanao fifagnarahagne amy ty fitondra o ndatio io mba hagnavotagne ty tane toy naho o tontolo iaignagneo. Hisolo ze fitondram-panjaka o ndatio iaby io.​—Daniela 2:44.

 Hanao raha soa hoahy o ndatio naho o tontolo iaignagneo i Fanjakàn’Andrianagnaharey. (Salamo 96:10-13) Intoagne iaby ty raha hatao i Jehovah Andrianagnahare amy ty alala o Fanjakagne iohoe.

•   Hagneregne o tontolo iaignagneo amy ty toko’e ho ie

   Hoe ty Baiboly: “Hifale i tane fatram-beỳ naho ty tane maike, le hirebeke ty lemake maike sady hamelagne hoe folera.”​—Isaia 35:1.

   Ino ty dika izay? Hohavaoze i Jehovah ty planeta tane toy. Hahere’e amy ty toko’e ho ie ndraike iaby aza ndra ty toeragne poteke noho ty raha atao o ndatio.

•   Hifehe o toets’andrò

   Hoe ty Baiboly: “Mampitony o tio-bey io ty [Jehovah], le tsy mivalitaboake sasa i onjan-driakey.”​—Salamo 107:29.

   Ino ty dika izay? Tsy hijale sasa noho ty fikorontagna o toets’andrò tikagne satria vita i Jehovah ty mifehe o natiorao.

•   Hampianatse o ndatio hikolokolo ty tane toy

   Hoe ty Baiboly: “Hanao ze hampahiratse azo raho, sady hanoro ze lalagne handehana’o.”​—Salamo 32:8.

   Ino ty dika izay? Nimea i Jehovah andraikitse hikarakara o taneo o ndatio. (Genesisy 1:28; 2:15) Hampianatse antikagne amy ty fomba hagnatanterahagne soa ze andraikitse zay reke, amy izay tika tsy manimba ty tane toy naho o tontolo iaignagneo.