ప్రస్తుతం ఈ లోకంలో . . .

నా జాతి, దేశం, తెగ, మతం మాత్రమే గొప్పవి అనే భావాలు ఎక్కువైపోవడం వల్ల ప్రపంచవ్యాప్తంగా మనుషుల మధ్య ద్వేషం బాగా పెరిగిపోయింది.

దేవుడు ఏమంటున్నాడు . . .

యేసుక్రీస్తు భూమ్మీద ఉన్న కాలంలో మనుషుల మధ్య తేడాలు ఎక్కువగా ఉండేవి. ముఖ్యంగా యూదులు, సమరయులు ఒకరినొకరు ద్వేషించుకునేవాళ్లు. (యోహాను 4:9) స్త్రీలను చిన్నచూపు చూసేవాళ్లు. అంతేకాకుండా యూదా మతనాయకులు సామాన్య ప్రజలను హీనంగా చూసేవాళ్లు. (యోహాను 7:49) కానీ, యేసు మాత్రం వాళ్లలా ఉండలేదు. ఆయన్ని వ్యతిరేకించేవాళ్లు “ఇతడు పాపులను చేర్చుకొని వారితో కూడ భోజనము చేయుచున్నాడని” అన్నారు. (లూకా 15:2) యేసు దయ, ఓర్పు, సహనం చూపించాడు. ఎందుకంటే ప్రజలు దేవునికి దగ్గరయ్యేలా సహాయం చేయడానికే ఆయన వచ్చాడు కానీ వాళ్లకు తీర్పు తీర్చడానికి కాదు. ఆయన ప్రతీది ప్రేమతోనే చేశాడు.—యోహాను 3:17; 13:34.

అందర్నీ సమానంగా చూస్తూ సహనం చూపించడానికి ప్రేమ సహాయం చేస్తుంది. ప్రేమ ఉంటే ఇతరుల్లో లోపాలున్నా మనం వాళ్లతో హృదయపూర్వకంగా స్నేహం చేస్తాం. కొలొస్సయులు 3:13 ఇలా చెప్తుంది: “ఎవడైనను తనకు హానిచేసెనని యొకడనుకొనినయెడల ఒకని నొకడు సహించుచు ఒకని నొకడు క్షమించుడి.”

“ప్రేమ అనేక పాపములను కప్పును గనుక అన్నిటికంటె ముఖ్యముగా ఒకనియెడల ఒకడు మిక్కటమైన ప్రేమగలవారై యుండుడి.”—1 పేతురు 4:8.

లోకంలో ఇలా ఉంది . . .

చాలా దేశాల్లో శాంతి భద్రతలు కాపాడేందుకు ప్రతీఒక్కరు వాళ్లకు ఇష్టం వచ్చినట్లు ప్రవర్తించకుండా కొన్ని హద్దులు పెట్టారు.

దేవుడు ఏమంటున్నాడు . . .

“[ప్రేమ] అమర్యాదగా నడువదు.” (1 కొరింథీయులు 13:5) యేసుక్రీస్తు అందరితో సహనంగా ఉన్నా మర్యాదలేని ప్రవర్తనను, కపటాన్ని, వేరే ఏ చెడు ప్రవర్తనను సహించలేదు. ఆయన వాటన్నిటిని ధైర్యంగా ఖండించాడు. (మత్తయి 23:13) “దుష్కార్యము చేయు ప్రతివాడు వెలుగును ద్వేషించును” అని ఆయన చెప్పాడు.—యోహాను 3:20.

క్రైస్తవ అపొస్తలుడైన పౌలు “చెడ్డదాని నసహ్యించుకొని మంచిదానిని హత్తుకొని యుండుడి” అని చెప్పాడు. (రోమీయులు 12:9) అలా చెప్పినవాటిని పాటించాడు కూడా. ఉదాహరణకు, ఆయన కాలంలో కొంతమంది యూదా క్రైస్తవులు, యూదులుకాని ఇతర క్రైస్తవులకు దూరంగా ఉండేవాళ్లు. కానీ యూదా క్రైస్తవుడైన పౌలు మాత్రం అలా దూరంగా లేడు. ఆయన వాళ్లను ప్రేమపూర్వకంగా, ధైర్యంగా సరిదిద్దాడు. (గలతీయులు 2:11-14) “దేవుడు పక్షపాతి కాడని,” తన ప్రజల మధ్య తేడాలు ఉండడం దేవునికి నచ్చదని పౌలుకు తెలుసు.—అపొస్తలుల కార్యములు 10:34.

క్రైస్తవులుగా యెహోవాసాక్షులు మంచి చెడుల విషయంలో బైబిలు చెప్తున్నదాన్ని బట్టే నిర్ణయాలు తీసుకుంటారు. (యెషయా 33:22) అందుకే చెడ్డ పనులు చేసేవాళ్లను వాళ్ల మధ్య ఉండనివ్వరు. క్రైస్తవ సంఘం పరిశుద్ధంగా ఉండాలంటే దేవుని నియమాలను, సూత్రాలను పాటించని వాళ్లను సంఘంలో ఉంచకూడదు. కాబట్టి యెహోవాసాక్షులు, “ఆ దుర్మార్గుని మీలో నుండి వెలివేయుడి” అనే దేవుని ఆజ్ఞను పాటిస్తారు.—1 కొరింథీయులు 5:11-13.

“యెహోవాను ప్రేమించువారలారా, చెడుతనమును అసహ్యించుకొనుడి.”—కీర్తన 97:10.

అందరూ ఏమంటున్నారు . . .

మనుషుల్లో చెడుతనం సహజంగానే ఉంటుంది కాబట్టి చెడును ఎప్పటికీ తీసివేయలేము.

దేవుడు ఏమంటున్నాడు . . .

హబక్కూకు ప్రవక్త యెహోవా దేవునికి ఇలా ప్రార్థన చేశాడు: “నన్నెందుకు దోషము చూడనిచ్చుచున్నావు? బాధ నీవేల ఊరకయే చూచుచున్నావు? ఎక్కడ చూచినను నాశనమును బలాత్కారమును అగుపడుచున్నవి, జగడమును కలహమును రేగుచున్నవి.” (హబక్కూకు 1:3) అలా దిగులు పడుతున్న అతనికి చెడ్డవాళ్లను ఖచ్చితంగా శిక్షిస్తాను, ఆ మాట “తప్పక జరుగును,” అది “జాగుచేయక వచ్చును” అని యెహోవా అభయమిచ్చాడు.—హబక్కూకు 2:3.

ఈలోగా చెడ్డవాళ్లకు మారే అవకాశం ఉంది. “దుష్టులు మరణము నొందుటచేత నా కేమాత్రమైన సంతోషము కలుగునా? వారు తమ ప్రవర్తనను దిద్దుకొని బ్రదుకుటయే నాకు సంతోషము; ఇదే ప్రభువగు యెహోవా వాక్కు.” (యెహెజ్కేలు 18:23) చెడ్డ పనులు మానుకుని యెహోవాను ఆరాధించడానికి ప్రయత్నించే వాళ్లు భవిష్యత్తు విషయంలో ఏ భయం లేకుండా ఉండవచ్చు. “నా ఉపదేశము నంగీకరించువాడు సురక్షితముగా నివసించును వాడు కీడు వచ్చునన్న భయము లేక నెమ్మదిగా నుండును.”—సామెతలు 1:33. ◼ (g15-E 08)

“ఇక కొంతకాలమునకు భక్తిహీనులు లేకపోవుదురు వారి స్థలమును జాగ్రత్తగా పరిశీలించినను వారు కనబడకపోవుదురు. దీనులు భూమిని స్వతంత్రించుకొందురు బహు క్షేమము కలిగి సుఖించెదరు.”—కీర్తన 37:10, 11.