‘అసలు మామూలు మనుషులకు దేవునితో స్నేహం ఎలా సాధ్యం?’ అని మీకనిపించవచ్చు. అయితే ప్రపంచవ్యాప్తంగా చాలామంది దేవుడు వాళ్లను స్నేహితులుగా చూస్తున్నట్లు నమ్ముతున్నారు. మీకూ అలాగే అనిపిస్తుందా? లేక దేవునికి స్నేహితులవ్వాలని, ఇంకా మంచి స్నేహితులవ్వాలని అనుకుంటున్నారా?

దేవుని స్నేహితులుగా ఆయనతో ఒక మంచి సంబంధం కలిగి ఉండడం సాధ్యమే అని బైబిల్లో ఉంది. దేవుడు, అబ్రాహాము అనే భక్తున్ని “నా స్నేహితుడు” అని పిలిచినట్టు బైబిల్లో ఉంది. (యెషయా 41:8) “దేవునియొద్దకు రండి, అప్పుడాయన మీయొద్దకు వచ్చును” అనే ప్రేమతో కూడిన ఆహ్వానం కూడా యాకోబు 4:8⁠లో ఉంది. కాబట్టి దేవునికి దగ్గరై ఆయనతో స్నేహం చేయడం సాధ్యమేనని అర్థం అవుతుంది. కానీ దేవుడు కనబడడు కదా మరి ఆయనకు స్నేహితులమవడం ఎలా?

ఈ ప్రశ్నకు జవాబు తెలుసుకోవడానికి ముందు మామూలుగా మన మధ్య స్నేహాలు ఎలా మొదలౌతాయో ఆలోచిద్దాం. సాధారణంగా పేర్లు తెలుసుకోవడంతో స్నేహాలు మొదలౌతాయి. తర్వాత తరచుగా మాట్లాడుకుంటూ, ఆలోచనలు-ఇష్టాయిష్టాలు తెలుసుకుంటూ స్నేహం పెంచుకుంటాం. ఒకరి పనుల్లో ఒకరు చేదోడువాదోడుగా ఉన్నప్పుడు ఆ స్నేహబంధం బలపడుతుంది. దేవునితో స్నేహం కూడా అంతే. ఎలానో తెలుసుకుందాం. (w14-E 12/01)