దాదాపు 2,600 సంవత్సరాల క్రితం, యూదుల్ని బబులోనుకు చెరగా తీసుకెళ్లారు. వాళ్లు అక్కడ 70 సంవత్సరాలు ఉన్నారు. వాళ్లు అక్కడ ఎలాంటి పరిస్థితుల్లో జీవిస్తారో దేవుడు బైబిల్లో ముందే రాయించాడు. బైబిల్లో ఇలా ఉంది: ‘ఇండ్లు కట్టించుకొని వాటిలో నివసించుడి, తోటలు నాటి వాటి ఫలములను అనుభవించుడి, పెండ్లిండ్లు చేసికొని కుమారులను కుమార్తెలను కనుడి ... నేను మిమ్మును చెరగొనిపోయిన పట్టణముయొక్క క్షేమముకోరుడి.’ (యిర్మీయా 29:1, 4-7) యూదులు నిజంగా ఈ వచనాల్లో చెప్పినట్లే జీవించారా?

 ప్రాచీన బబులోను ప్రాంతానికి లేదా చుట్టుపక్కల ప్రాంతాలకు చెందిన 100 మట్టి పలకల్ని పరిశోధకులు పరిశీలించారు. బబులోను పరిపాలనకు శాంతిగా లోబడుతూ చాలామంది యూదులు తమ సంస్కృతి, మతాచారాల ప్రకారం జీవించారని ఆ పలకలు తెలియజేస్తున్నాయి. అవి క్రీస్తు పూర్వం 572 నుండి 477 సంవత్సరాలకు చెందినవి. వాటిలో అద్దెకు తీసుకోవడం, వ్యాపార పనులు, రుణపత్రాలు (ప్రామీసరీ నోట్లు), ఇతర ఆర్థిక సంబంధమైన వివరాలు ఉన్నాయి. ఒక రెఫరెన్సు పుస్తకం ఇలా చెప్తుంది: ‘ఈ దస్తావేజులను బట్టి చెరలో ఉన్న యూదులు పల్లెటూళ్లలో సాధారణ జీవితం గడిపారని అర్థమౌతుంది. వాళ్లు పొలం పనులు చేసేవాళ్లు, ఇళ్లు కట్టుకునేవాళ్లు, పన్నులు కట్టేవాళ్లు, రాజుకు అవసరమైన సేవలు అందించేవాళ్లని తెలుస్తుంది.’

 అల్‌-యహూదు లేదా యూదా-పట్టణం అనే ప్రాంతంలో చాలామంది యూదులు ఉన్నారని ఈ ప్రాముఖ్యమైన పలకల్లో తేలింది. ఆ పలకల్లో ఒక యూదా కుటుంబంలోని నాలుగు తరాల వాళ్ల పేర్లు చెక్కి ఉన్నాయి, వాటిలో కొన్ని ప్రాచీన హీబ్రూ అక్షరాల్లో ఉన్నాయి. ఆ పలకల్ని కనుగొనకముందు బబులోనులో చెరగా ఉన్న యూదుల జీవితం గురించి పండితులకు (స్కాలర్స్‌కు) పెద్దగా తెలీదు. ఇశ్రాయిల్‌ ఆంటిక్విటీస్‌ అథారిటిలోని బోర్డ్‌ ఆఫ్‌ డైరెక్టర్స్‌లో ఒకరిగా పనిచేస్తున్న డా. ఫిలిప్‌ వుకసావోవిక్‌ ఇలా చెప్తున్నాడు: “చివరికి, ఈ పలకల వల్ల మనం అప్పటి యూదుల గురించి తెలుసుకోగలిగాం, వాళ్ల పేర్లు ఏంటో, వాళ్లు ఎక్కడ నివసించారో, ఎప్పుడు నివసించారో, వాళ్లేం చేసేవాళ్లో తెలుసుకోగలిగాం.”

 ఎక్కడ జీవించాలో, ఏ పని చేయాలో నిర్ణయించుకునే విషయంలో బందీలుగా వెళ్లిన యూదులకు కొంతవరకు స్వేచ్ఛ ఉండేది. వాళ్లు “అల్‌-యహూదులోనే కాదు, ఇంకా పన్నెండు వేర్వేరు నగరాల్లో కూడా జీవించారు” అని వుకసావోవిక్‌ చెప్తున్నాడు. కొంతమంది రకరకాల నైపుణ్యాలు నేర్చుకున్నారు, అవి తర్వాత కాలంలో యెరూషలేమును తిరిగి కట్టినప్పుడు ఉపయోగపడ్డాయి. (నెహెమ్యా 3:8, 31, 32) యూదులు తమ సొంతూరుకు వెళ్లిపోవచ్చని చెప్పిన తర్వాత కూడా కొంతమంది యూదులు బబులోనులోనే ఉండిపోవాలని నిర్ణయించుకున్నారు అనే విషయాన్ని కూడా అల్‌-యహూదు పలకలు నిరుపిస్తున్నాయి. దీన్నిబట్టి బైబిల్లో చెప్పినట్లు యూదులు బబులోనులో కొంతమేరకు ప్రశాంతమైన పరిస్థితుల్లోనే జీవించారని చెప్పవచ్చు.