Eponitos Akiro nukajokak kanejai Yawe, Edeke loiyalama, loekoto ikalia kere iyalama. (1 Timoteo 1:11) Ngesi alibunet naka edukone. Eyauni edukone kokisil loka apugan aiyalama kokale narai epolounete idwe kayuara naka iurak kec. Ibusakinit Ikristayon arimarit ikisilia luka apugan anu aiwadik edukone kec.​—Kosiom Luka 2:1, 4, 5.

Epone bo ani eseseno Edeke edukone? Ekoto ngesi ekiliokit ka aberu kimorikikina nepepe. Ekoto Yawe ekiliokit ka aberu omunokina bonik. (Iburanian 13:4) Elait Yawe elacit. (Malaki 2:16) Konye ecamakit ngesi Ikristayon alacakin kosodete adukokin bobo arai edotiar idiopet.​—Kosiom Matayo 19:3-6, 9.

Esubit Yawe ikiliok ka angor kanu aitodolikin akec aswamisio kokale. (Ageun 2:18) Kwape akou na ekale, ibusakinit ekiliokit aidar luko okaleke kotoma aijanakin luka kwan ka luka omoyo. Ekoto ekiliokit orai lo ejaas ka amina naepol nejai akeberu. Ibusakinit ekiliokit ka aberu ayongit ka amina yenice. Kwape mam ikiliok ka angor edolitotor, elacet loka aiyalama kokale nges aisisiaun aitimonor.​—Kosiom Ipeson 4:31, 32; 5:22-25, 33; 1 Petero 3:7.

Arai ejaas atiokisio toma odukone kus, ibusakinit esu aitam aiyaite yenice kamina. (1 Ikorinton 13:4, 5) Mam Akirot  Naka Edeke ecamakinit atiakakin kwapa epone lo aitinag atiokisio nuidilasi odukone.​—Kosiom 1 Ikorinton 7:10-13.

Ekoto Yawe idwe iyalamasi. Ijaikinit nges ijo aicoreta nuejokuka nuipedoria ijo adumun epone loiyalamar atumun kon. Ekoto nges ijo aimedaun kotoma acoa ka aijen naka iuriak kon. (Ikolosain 3:20) Ekoto Yawe bobo ijo adumun ailel kaijanakin nges ka Okokuke.​—Kosiom Ekalimonokinan 11:9–12:1; Matayo 19:13-15; 21:15, 16.

Ibusakinit ijo aswam kagogong kanu aijanakin inyamat, neperot, ka inapen nejaas idwe kon. (1 Timoteo 5:8) Konye kanu idwe kon adumun aiyalama, isisianakisi bobo kesi amina Edeke ka aisisiaun nuikamunitos nges. (Ipeson 6:4) Anyunet kon na amina Edeke epedori cut atiror itayon luka idwe kon. Arai kitosom Akirot naka Edeke, ingarakinete aicoreta kon aiteten aomisio idwe kopone aloejok.​—Kosiom Ikisila 6:4-7; Awaragasia 22:6.

Kimedaete idwe arai kisinyikok ka aisialamikin kes. Ekotosi bobo kesi aitetenio ka aicorio. Aitutuor ngin eyuari kesi kotoma koponesio luisimikete kesi adumun aiyalama. (Awaragasia 22:15) Ido, mam ibusakinit aicor kotoma adedeng.​—Kosiom Ikolosain 3:21.

Iwadikatos Ajenak Luka Yawe itaboi luipu lu epedorete aingarakin auriak ka idwe. Erasi itabon lu luejasi kede awadikaeta nuka Ebaibuli.​—Kosiom Isabulin 19:7, 11.