AISISIAET NA 35

Epone Loipedoria Oni Aitolomunun Aseuneta Nuejokuka

KOBOLIAK

Oni kere ejaas aseuneta nuibusakinit aitolomunun. Aseuneta ngun epedorete araut nuejok arai nueroko ido etirorete eidicanewok ka Yawe. Kwape aanyunet, aticepak ekotokin oni aitolomun aseunet naikamunit neiboiyo, epone lodumunet ikapun, keda adukokin. Naitolomunia oni aseuneta nuejok, idumuni oni aiyalama ido isiyalamikinete ngun Yawe.

1. Epone ani ipedoria ijo aitwasam Ebaibuli aingarakinia jo aitolomunun aseuneta nuejok?

Eroko ijo itolomuna aseunet, ilip aingarakinio kaneejai Yawe ido komoo kotoma Obaibuli akiro nuitodunitos epone loesesenia ngesi ngun. (Kosiom Awaragasia 2:3-6.) Kotoma akiro ace, ijaikinit Yawe aicoreta nuiriamara kejautene loetereikina kaoni. Arai erai kwangin, nuejok aswam nges arimaar nuicorakinit Ebaibuli.

Do bo arai emamei aicorakinet naka Ebaibuli nairiamara kejautene loetereikina kajo? Kojautene kangon da ingarenikini Yawe ijo “korot lotikilosio.” (Isaia 48:17) Kopone ani? Kopone lo ijo aimo aicoreta nuka Ebaibuli nuingarakinete ijo. Eraasi aicoreta nuka Ebaibuli abeit naitodunit epone loepupio ido loewomooma Yawe. Ipedori oni ajenun epone loepupio Yawe kanuikamunitos adiokirot kotoma aisiom ace kotoma akiro nuinerit Ebaibuli. Ipedori oni aitolomun aseuneta nuisiyalamikinete Yawe kimisiik oni epone loepupio ngesi.

2. Anyoika bo nuibusakinit ijo airereor eroko itolomuna aseunet?

Ebala Ebaibuli ebe: “ericit loecobe alositeke.” (Awaragasia 14:15) Apolouke ebe ibusakinit oni aomoom eroko itolomuna aseunet. Naiwomooma ijo nuikamunitos akiro ngun, kingitakin ebe, ‘Anu bo aicoreta nuka Ebaibuli nuapedori eong aitwasam? Ani bo aseunet naeinakini aomisioka araut nuinapakina? Epone ani etiroria akaseunet luce? Nuepolok kakere, isiyalamikini kereka akaseunet Yawe?’—Ikisila 32:29.

Ejaatar Yawe kapedor naka alimokin oni nuejok ka nueroko. Naimisiikinia oni ikisila ka aicoreta nuka Edeke ido kakapakina atupakin kes, ingarakinete ngun oni aituutoor aomisiowok. Eraas aomisio epone loipupia ijo kotomakon kanuikamunitos nuejok ka nueroko. (Iromayon 2:14, 15) Aomisio nuituutooritai, ingarakinete oni aitolomun aseuneta nuejok.

KISISIAU NUIPU

Kisisiau epone loepedoriata aicoreta nuka Ebaibuli keda aomisiowok aingarakin oni aitolomun aseuneta nuejok.

3. Kocamak Ebaibuli ingarenik ijo

Epone ani epedoriata aicoreta nuka Ebaibuli aingarakin oni naiwutar oni aitolomun aseuneta? Koboliak EBIDIO, kosodete aimor aingiseta nuetupakinete.

EBIDIO: Kocamak Aicoreta Nuka Ebaibuli Aingarenikin Ijo (5:54)

Inyoin bo ailajaara aseun?
Kanuinyo ijaikinitor Yawe oni ailajaara aseun?
Anyoika bo nuijaikinit Yawe oni kanu aingarakin oni aitwasam ailajaarawok naka aseun kopone kaloejok kakere?

Kanu aanyun aicoretait adiopet naka Ebaibuli, kosiom Ipeson 5:15, 16. Kosodete aitetem epone loipedoria ijo ‘ayuunun apak’ kanu . . .

asiomenen Ebaibuli duc.
araun ekiliokit arai aberu najokan kodukone, arai bo nat aurian, esapat ka apese naejok.
alosenen toma airiamununeta.

4. Ituutoono akoniwomisio aitolomunun aseuneta nuejok

Naejaar aicorakinet naka Ebaibuli naikamunit idiobore, epatanar aiswamaun aseunet naejok. Do bo arai emamei aicorakinet naibecokina keda ejautene ngol? Koboliak EBIDIO, kosodete aimor aingiset naetupakini.

EBIDIO: “Inyikok Ajaut Kaomisio Nuelaete” (5:13)

Kotoma obidio, anyoika bo nuabu iinac kiswama kanu aituutoor akeomisio ka aiswamaun aseunet naisiyalamikini Yawe?

Kanuinyo mam ibusakinitor oni alimokin luce aiswamakin oni aseuneta nuibusakinit oni ikulepek aitolomun? Kosiom Iburanian 5:14, kosodete aimor aingiseta nuta:

Karaida esubit bala epatana alimokin luce aiswamakin oni aseunetawok, anyoika nuibusakinit oni ikulepek apedorit atiakun?
Anu bo iboro luepedorete aingarakin ijo aituutoor aomisiokon ka aitolomun aseuneta nuejok?

Kwape ka amaapu, epedorete aomisiowok aingarakin oni aseun nuedolit aswam kotoma aijar

5. Koyongite aomisio nukaluce

Mam itunga kere iswamaunete aseuneta nueputosi. Epone ani itodunia oni ebe iyongit oni aseuneta nukaluce? Kwape aanyunet irereo aanyuneta nu aarei:

Aanyunet na 1: Iinac naenaikit anapit edabada kotoma airiamun naka akirosinei nuka aiyengun arai bo kosawan luka ailajaarake, abwot atukot naepupioto aanacan nuipu erono esesenete nges enapit edabada.

Kosiom Iromayon 15:1 keda 1 Ikorinton 10:23, 24, kosodete aimor aingiseta nuta:

Katupitos ikokoron lu, ani bo aseunet naepedori iinac ngin aitolomun? Anyoika bo nuiswamauni ijo arai ejai itungananan yenimam aomisioke ecamunitos aswam iceboro konye kocamakinitos akoniwomisio ijo aswam ngun?

Aanyunet na 2: Ejeni onac ediopet ebe mam Ebaibuli imikit aimat ajon konye eseunit ngesi aisac aimat ajon. Onyaraari onac ece ngesi keda iinacan ice buke koanyuni ngesi iinacan emasete ajon.

Kosiom Ekalimonokinan 7:16 keda Iromayon 14:1, 10, kosodete aimor aingiseta nuta:

Katupitos ikokoron lu, ani bo aseunet naepedori onac ngol aitolomun? Anyoika bo nuiswamauni ijo kianyu ijo itunganan iswamai ibore yenimam akoniwomisio ecamakinitos ijo aswam?

Anu bo nuibusakinit ijo aswam kanu aitolomun aseuneta nuejok?

1. Kilip Yawe aingarakin ijo aseun nuibusakinit ijo aswam.—Yakob 1:5.

2. Komoo kotoma Obaibuli ka itaabon luinomunit atukot aicoreta nuipedori ijo aitwasam. Ipedori bobo ijo ainerakin keda iinacan luemisiaritos.

3. Koomoom epone loepedoriata akoniseuneta atiror aomisiokon ka nukaluce da.

EBAKASI ICETUNGA EBE: “Ipedor ijo aswam nuikoto kere. Mam aomisio nukaluce arai bo epone loepupioto kesi eraasi nuepolok?”

Kanuinyo ibusakinitor oni apodokinit epone loepupio Yawe ka epone loepupioto luce?

NUIDAU AISISIAUN

Itolomuni oni aseunet naejok arai ijenu oni epone loepupio Yawe kanuikamunitos ediojautene kasodete bobo aomoom arai epedorete aswamisiowok aingarakin luce arai bo ainakin kes ationis.

Ainyogoor

Epone ani ipedoria ijo aitolomun aseuneta nuisiyalamikinitos Yawe?
Epone ani ipedoria jo aituutoor aomisiokon?
Epone ani ipedoria oni aitodun ebe iyongit oni aomisio nukaluce?

Apak naingetakinitor aisisiaet na:

Nuebeit ijo aitodolikin

Koomoom ber ijo aseunet naebeit ijo aiswamaun. Kotupak akiro auni nuejaasi asaduku naebala ebe “ Anu bo nuibusakinit ijo aswam kanu aitolomun aseuneta nuejok?”

Ace:

Your other goal