ንኣኮኡ ኻብ ሞት ብዛዕባ ዘድሓነ ወዲ እስከ ንምሃር። ኣኮ እቲ ወዲ፡ ሃዋርያ ጳውሎስ ነበረ። ስም እቲ ወዲ ኣይንፈልጦን ኢና፣ ብትብዓት እንታይ ከም ዝገበረ ግና ንፈልጥ ኢና። እንታይ ከም ዝገበረ ኽትፈልጥ ትደሊዶ፧—

ጳውሎስ ኣብ የሩሳሌም ተኣሲሩ ነበረ። ብዛዕባ የሱስ ስለ ዝሰበኸ እዩ ተኣሲሩ ዝነበረ። ገሊኦም ክፉኣት ሰባት ከኣ ንጳውሎስ ስለ ዝጸልእዎ፡ ክፉእ ሓሰቡ። ‘እቲ ሓለቓ ሽሕ ንጳውሎስ ናብ ቤት ፍርዲ ኼምጽኦ ንሕተቶ። ንሕና ድማ ኣብ መገዲ ተሓቢእና ጸኒሕና፡ ጳውሎስ ኪሓልፍ ከሎ፡ ክንቀትሎ ኢና!’ በሉ።

ወዲ ሓብቱ ንጳውሎስ ድማ ብዛዕባ እቲ ሓሳቦም ሰምዐ። እሞኸ እንታይ ገበረ፧ ናብቲ ቤት ማእሰርቲ ኸደ፣ ንጳውሎስ ከኣ ነገሮ። ብኡብኡ፡ ጳውሎስ፡ ‘እዚ ሓሳቦም ንሓለቓ ሽሕ ንገሮ’ በሎ። ወዲ ሓብቱ ንጳውሎስ ነቲ ሓለቓ ሽሕ ምንጋር ከቢድዎ ዝነበረዶ ይመስለካ፧— እወ፣ ከመይሲ፡ እቲ ሓለቓ ሽሕ ክቡር ሰብ እዩ ነይሩ። ይኹን እምበር፡ ወዲ ሓብቱ ንጳውሎስ ተባዕ ነበረ፣ ነቲ ሓለቓ ሽሕ ከኣ ነገሮ።

እቲ ሓለቓ ሽሕ እንታይ ከም ዚገብር ይፈልጥ ነበረ። ንጳውሎስ ኪከላኸለሉ ኢሉ ድማ፡ ዳርጋ 500 ወተሃደራት ኣዳለወ! በታ ለይቲ እቲኣ፡ ንጳውሎስ ናብ ቂሳርያ ኺወስድዎ ኣዘዞም። እሞኸ ህይወት ጳውሎስ ድሒናዶ፧— እወ፡ እቶም ክፉኣት ሰባት ኬጥቅዕዎ ኣይከኣሉን! እቲ ኽፉእ ሓሳቦም ፈሸለ።

ካብዚ ዛንታ እዚ እንታይ ትምሃር፧— ንስኻ እውን ከም ወዲ ሓብቱ ንጳውሎስ ተባዕ ክትከውን ትኽእል ኢኻ። ንኻልኦት ብዛዕባ የሆዋ ኣብ እንዛረበሉ እዋን፡ ተባዓት ክንከውን ኣሎና። ንስኻኸ ተቢዕካ ብዛዕባ የሆዋ ኽትዛረብ ዲኻ፧— ከምኡ እንተ ጌርካ፡ ህይወት ሰብ ከተድሕን ትኽእል ኢኻ።