ዓለምለኻዊ ዕዮ ስብከትና፡ ብቐንዱ በቲ ናይ የሆዋ መሰኻኽር ዚገብርዎ ወፈያ እዩ ዚምወል። a ኣብ ቦታታት ኣምልኾና ሳጹናት ውጽኢት ኣሎ፣ ኣብቲ ወፈያታት ዚግበረሉ ኣብ ኢንተርነት ዚርከብ ገጽ ድማ ወፈያታት ዚግበረሉ ኻልእ መገድታት ተዘርዚሩ ኣሎ። ሓደ ሰብ ንዓለምለኻዊ ዕዮ፡ ንወጻኢታት ጉባኤኡ፡ ወይ ንኽልቲኡ ወፍያ ምእንቲ ኺገብር፡ በበይኑ ኣማራጺታት ቀሪቡ ኣሎ።

 ናይ የሆዋ መሰኻኽር ዕሽር ኪህቡ ወይ ካብ ኣታዊኦም ውሱን ሚእታዊት ኪውፍዩ ትጽቢት ኣይግበረሎምን እዩ። (2 ቈረንቶስ 9:7) ኣብ ኣኼባታትና እናዞርና ገንዘብ ኣይንእክብን ወይ ናብ ኣኼባታትና መእተዊ ኣይነኽፍልን ኢና። ኣገልገልትና እውን ንጥምቀት፡ ንቐብሪ፡ ንመርዓ፡ ወይ ንኻልእ ሃይማኖታዊ ኣገልግሎታት ኣየኽፍሉን እዮም። ገንዘብ ኪረኽቡ ኢሎም ከም ምሻጥ ምግቢ፡ ባዛር፡ ቢንጎ፡ ካርኒቫል፡ እንግዶት፡ ሸተኽ በተኽ፡ ወይ ካልእ ሜላታት ኣይጥቀሙን እዮም፣ ገንዘብ ኪዋጻእ ከኣ ኣይልምኑን እዮም። ለገስቲ መን ምዃኖም ኣይንገርን እዩ። (ማቴዎስ 6:2-4) ኣብ ወብሳይታትናን ጽሑፋትናን ድማ ገንዘብ ዚርከበሉ መወዓውዒ ኣይወጽእን እዩ።

 ኵለን ጉባኤታት ናይ የሆዋ መሰኻኽር ኣብቲ ንህዝቢ ኽፉት ዝዀነ ኣኼባታተን ወርሓዊ ጸብጻብ ገንዘብ የቕርባ እየን። እቲ እተወፈየ ገንዘብ ብግቡእ ይተሓዝ ከም ዘሎ ንምርግጋጽ፡ ሕሳብ ኵለን ጉባኤታት ብስሩዕ ይምርመር እዩ።—2 ቈረንቶስ 8:20, 21።

•   ሳጹናት ውጽኢት፦ ኣብቲ ኣብ ኣዳራሻት መንግስቲ ኣምላኽ፡ ኣዳራሻት ዓብዪ ኣኼባ፡ ወይ ኣኼባታት ኣብ እንገብረሉ ኻልእ ቦታታት ዚርከብ ሳጹናት ውጽኢት ብጥረ ገንዘብ ወይ ብቸክ ክትውፊ ትኽእል ኢኻ።

•   ብኢንተርነት ዚግበር ወፈያታት፦ ኣብ ብዙሓት ሃገራት፡ ነቲ ብክረዲት ካርድን ብደቢት ካርድን ካብ ባንክ ብምምሕልላፍን ብኻልእ ኤለክትሮኒካዊ ሜላታትን ክትውፍየሉ እትኽእል “Donate to Jehovah’s Witnesses” ዚብል ገጽ ክትጥቀም ትኽእል ኢኻ። b ገሊኦም ናይ የሆዋ መሰኻኽር ብሓደ ኻብዚ ሜላታት ገይሮም ኣብ ወወርሒ ብስሩዕ ዚህብዎ ወፈያ ‘ኣዋህሊሎም’ ይልግሱ እዮም።—1 ቈረንቶስ 16:2።

•   ብመደብ ዚግበር ልግሲ፦ ገሊኡ ወፈያታት ኣቐዲምካ መደብ ምግባር፡ ወይ ሕጋዊ መደብ ምግባር፡ ወይ ክልቲኡ ይሓትት እዩ። ከምዚ ዝኣመሰለ መደብ፡ ነቲ ኣብ ሃገርካ ዘሎ ምስ ግብሪ እተተሓሓዘ ሕድገታት ክትጥቀመሉ የኽእለካ እዩ። ብዙሓት ሰባት ብዛዕባ እቲ ብህይወት ከለዉ ዚገብርዎ ወይ ምስ ሞቱ ዚዕየየሉ ግብረ ሰናያዊ ልግሲ ዝሓሸ ሓበሬታት ብምርካቦም ተጠቒሞም እዮም። ነዚ ዚስዕብ ሜላታት ወፍያ ዚምልከት ዝርዝር ሓበሬታ እንተ ደሊኻ፡ ነቲ ኣብ ከባቢኻ ዚርከብ ቤት ጽሕፈት ጨንፈር ናይ የሆዋ መሰኻኽር ተወከስ፦

  •   ናይ ባንክ ሕሳብ

  •   መድሕንን ናይ ጡረታ ኽፍሊትን

  •   ዘይንቀሳቐስ ንብረት

  •   ኣክሲዮንን ቦንድን

  •   ለበዋን ሕድርን

 ብዛዕባ እቲ ኣብ ከባቢኻ ዚርከብ ሜላታት ወፈያ ዝያዳ ሓበሬታ እንተ ደሊኻ፡ “Donate to Jehovah’s Witnesses” ኣብ ዚብል ገጽ ርአ።